Kau-chiàn ê Peng-huì.

Koeh Kok-goân e̍k.

1914. 11, no. 356, pp. 10-11

  Hiān-sî Au-chiu kau-chiàn ê peng, chóng-sò͘ nn̄g-chheng-bān lâng. Kau-chiàn-kok ê thó͘-tē ū choân tē-kiû lio̍k-tē ê chi̍t poàⁿ. Lūn in muí-ji̍t ê chia̍h-huì hō͘ lâng ē kiaⁿ.

  Siat-sú hō͘ chit nn̄g-chheng-bān lâng tó tī tē-ni̍h, thâu kap kha sio-chiap, nā ta̍k lâng pêng-kin 6 chhioh tn̂g, chiū ū nn̄g-bān nn̄g-chheng chhit-pah jī-cha̍p-peh lí ê tn̂g, lâi se̍h tē-kiû ū chi̍t chiu-uî. Nā ēng chûn lâi chài chiah-ê peng koè Toā-se-iûⁿ tio̍h ēng Bí-kok kong-si tē-it toā ê chûn gō͘-pah peh-cha̍p-gō͘ chiah. Pêng-siông chi̍t lâng chi̍t ji̍t só͘ chia̍h ê mi̍h nn̄g pōng poàⁿ, chiū Au-chiu ê choân-kun muí-ji̍t tio̍h chia̍h gō͘-chheng-bān pōng. Nā beh ūn-poaⁿ chiah ê kun-niû, pêng-kin hoé-chhia chi̍t-tiuⁿ chài hoè saⁿ-cha̍p tūn, tio̍h ēng hoé-chhia peh pah saⁿ cha̍p saⁿ tiuⁿ, ta̍k tiuⁿ pêng-kin tn̂g la̍k-cha̍p chhioh, chiū ūn-poaⁿ ê chhia sio-chiap-soà ū cha̍p-gō͘ lí ê tn̂g, tio̍h jī-cha̍p chiah chhia-thâu lâi thoa.

  Chit nn̄g-chheng-bān ê peng, pêng-kin in ê saⁿ chi̍t lâng saⁿ niá, chiū-sī la̍k-chheng-bān niá, lâi chiap chò-hoé, chiū-sī saⁿ-bān nn̄g-chheng lí ê tn̂g, lâi pau-uî tē-kiû, chi̍t chiu-uî khah ke. In só͘ ēng ê liú-á ū nn̄g chheng tūn ê tāng, nā ēng bé-chhia lâi chài tio̍h chi̍t chheng chiah ê bé chiàⁿ thoa ē khì. Chi̍t lâng pêng-kin chi̍t ji̍t chia̍h pōng-poàⁿ ê bah, chiū choân-kun só͘ chia̍h--ê sī saⁿ-chheng-bān pōng, tio̍h thâi nn̄g-bān gō͘-chheng chiah ê gû; ēng chiah-ê gû phoê lâi chò ê, hō͘ gō͘-cha̍p-bān lâng chò chi̍t nî ê lō͘-ēng.

  Chiong chit nn̄g-chheng-bān lâng pâi tīn lâi kiâⁿ, in só͘ chiàm ê tē tio̍h loā-chē lí? Chi̍t chheng lâng lâi chò chi̍t tuī, sì lâng chi̍t pâi, chiū chiàm tē chi̍t chheng chhioh, tuì án-ne lâi chhui-sǹg, chiū nn̄g-chheng-bān ê toā-peng só͘ tìn ê tē sī saⁿ-chheng peh-pah saⁿ-cha̍p chhit lí, nā ta̍k pâi saⁿ lī sì chhioh, chiū-sī chhit-chheng la̍k-pah chhit-cha̍p sì lí. Chiah ê peng ta̍k lâng nā phah chhèng chi̍t pái, chiū huì-liáu la̍k-cha̍p-bān kho͘, in só͘ ēng ê chhèng ta̍t-ti̍t gîn nn̄g-bān la̍k-chheng-bān kho͘, Nā toā kau-chiàn ê sî, pêng-kin chi̍t lâng phah gō͘-cha̍p pái, chiū iân-chí hoé-io̍h tio̍h huì-liáu chi̍t-chheng gō͘-pah-bān kho͘ kàu saⁿ-chheng-bān kho͘ ê tiong-kan; koh in só͘ sit-lo̍h ê kun-chong kè-chîⁿ, tāi-khài chiah ê siàu-gia̍h ê cha̍p-hūn it. Pêng-kin nā kau-chiàn chi̍t-pái tio̍h liáu gîn nn̄g chheng la̍k pah bān kho͘. Hài-ah! chit nn̄g chheng bān ê tāi-kun tī chiàn-tiûⁿ chi̍t ji̍t ê kun-huì hiah chē. Siat-sú kau-chiàn nn̄g-nî kú, só͘ liáu ê kun-huì beh àn-choáⁿ sǹg? Khó-kiàn sè-kan ê chai-hō bô chi̍t-hāng ē khah lī-hāi tī chiàn-cheng. Chhiáⁿ iú-sim tī jîn-tō chú-gī ê hiaⁿ-tī chí-moē pek-chhiat kiû Siōng-tè, hō͘ kau-chiàn-kok ê sī-toā ēng hô-pêng kái-hoat, sī sim só͘-goān.