北港的消息
1915.1，no.358，pp.4
北港。神學校的學生張明道寫批講，我放假去北港就佮in約愛蹛5禮拜。禮拜日佮出外佈道的成績不止好。每禮拜的人額平均來算有40外人，到我欲轉來彼禮拜有50外人。按呢看不止有進步。出去庄社佈道有庄頭毋捌聽著這號福音不止歡喜愛聽。來聽--的平均有80外人。毋若按呢連捌聽著的庄頭亦不止愛聽，常常叫阮去in彼庄講予in聽，按呢看機會真好。上帝恩典的門已經大開，kan-ta欠工 nā-tiāⁿ。北港市內阮亦有開三暝昏的佈道會，不止好機會。來聽--的平均有成百人，大家真歡喜聽。
論教會內的兄弟姊妹亦熱心。有的甘願毋驚見笑，佇街市內外將in代先所得著--的報人知，有的甘願予朋友親成thí笑看輕攏無驚，甘願來綴主。有的予in 的丈夫窘逐亦甘願來綴主；願大家看了請替這个北港的教會來祈禱。 |
