振替郵便
1915.1，no.358，pp.11
前月的教會報有捌講起振替郵便的路用。所以阮冊房也有設，就是愛予人較利便。拍算大家袂chiâu知影；所以阮近日猶有接著傳道先生寄6箍來，是用郵便為替。按呢是著加角二銀的費；閣阮著再將彼張去領；是顛倒無利便。因為按呢才閣寫幾字來予大家知。若有欲寄錢項來，通對郵便局討一張振替的單，就寫阮遮的號，是台灣第987番，台南新樓書房。亦一爿會閣寫批得，看恁欲買甚物冊，抑是欲講甚麼話；後來將按呢寄。若一箍以內是一chiam 的費；若上一箍到五箍是兩chiam。若上五箍到十箍是四chiam：十箍到五十箍是六chiam。按呢kiám毋是較利便mah？
人用這个法度寄銀毋是kan-ta冊房的錢通寄--來；就不論甚物錢，或是慈善會，抑是中會，抑是學堂學生的所費攏通用這个振替郵便寄--來；總是佇彼張單裡著寫明是欲做甚物路用。 |
