Chheⁿ-hoan ê Gōng.
1915. 4, no. 361, pp. 4
Tī Bí-kok ū chi̍t ê Chheⁿ-hoan, siàu-liân ê sî ū tng ài-ióng, kàu lāu ko͘-put-chiong tio̍h soah; in-uī khuì-la̍t put-chiok. Hit-sî bô-thâu bô-lō͘, koh bô chhun chîⁿ, si̍t-chāi toā kan-khó͘; bô só͘-huì iā m̄ káⁿ sì-kè tuì lâng kiû-khit, sī kok-hoat giâm-kìm ê iân-kò͘. I tiām-tiām sì-kè kiâⁿ sì-kè khùn, khó-sioh hó-sim lîn-bín ê lâng chió, toā-poàⁿ khoàⁿ i sī o͘-bīn-hoan m̄-chiâⁿ lâng-khoán; kàu tang-thiⁿ ê khì-hāu, lo̍h sng lo̍h seh chin kan-khó͘ kàu boē-kò͘--tit; kéng-chhat khoàⁿ i bē bián-tit nńg-sim khó-liân i, soà lâu ba̍k-sái. āu-lâi kéng-chhat khì kiû hoat-īⁿ ê tāi-jîn tio̍h chún i khì kaⁿ-ga̍k-sū ê lāi-bīn chia̍h kap khùn. Phoàⁿ-koaⁿ kóng, "I m̄-sī hoān-lâng, chóng-sī thang kiò i lâi chia hō͘ goá mn̄g khoàⁿ ū chhin-lâng á bô?" Kéng-chhat chiū kiò i lâi; tāi-jîn khoàⁿ i put-chí kan-khó͘, iau koâⁿ gō bô saⁿ thang chhēng, chiū chin khó-liân i, soà mn̄g chē-chē hāng sū, chheⁿ-hoan gōng-gōng lóng bē-hiáu ìn, m̄-chai iáu ū chhin-chhek bô, put-kò choè i kú-kú tng-ióng, lóng bô siūⁿ tio̍h tò-khì pún só͘-chāi; só͘-í lóng bē kì-tit.
Teh mn̄g ê sî ū khoàⁿ-kìⁿ chi̍t ê kiaⁿ-sí-to-lâng ê kū tē-á kuì tī ām-kún, phah-sǹg sī chheⁿ-hoan khiàn-sńg ê mi̍h, só͘-í mn̄g i sī sím-mi̍h lō͘-ēng, chheⁿ-hoan chiū ìn i kóng, tong-sî pé-chóng beh sî i chiū siúⁿ-sù hit ê tē-á hō͘ i, i put-chí tuì-tiōng m̄-kam saⁿ-lī. Koaⁿ chiū ēng po-so ê oē chiū kah i tháu chioh i khoàⁿ, m̄-kú i put-chí lún-neh. Koaⁿ chiah an-uì i kóng, "M̄-bián kiaⁿ, chò lí tháu; khoàⁿ-liáu chiàⁿ koh hêng lí." I chiū tháu-khí--lâi, phoàⁿ-koaⁿ khoàⁿ ū jī tī hit lāi-bīn, teh kóng chit ê bó͘-lâng tng-ióng chē-chē nî, chin chīn-tiong chiàu kok-hoat, i ta̍k goe̍h-ji̍t thang niá loā-chē gîn, chóng-sī hit ê chheⁿ-hoan m̄-chai. Koaⁿ chiū thó͘ khuì kóng, "Lí chin gōng ah! Nā chiàu chit ê toaⁿ lâi kiâⁿ, lí m̄-bián hō͘ i iau koâⁿ gō chhin-chhiūⁿ kin-á-ji̍t." Chiah kā i kóng gîn-hâng ū khiàm i chē-chē gîn. Koh kóng, "Hó-tit lí kin-á-ji̍t ū pêng-iú thé-thiap chhoā lí lâi chia, taⁿ goá thang thè lí siat-hoat." Sui-sî khì gîn-hâng thè i niá gîn soè-chhù, chhiàⁿ lâng lâi chiàu-kò͘.
Lán khoàⁿ chit ê kò͘-sū siūⁿ hit ê chheⁿ-hoan chin gōng, lán kiám ū khah sek i mah? Liōng-pit káⁿ bô. Pé-chóng í-keng hō͘ hit ê chheⁿ-hoan chit hāng mi̍h sī sím-mi̍h hoè, che thang pí-phēng Iâ-so͘ ê Sèng-keng; lâng-lâng khiok ē-hiáu tha̍k, nā bô kiû Sèng-sîn lâi chān iû-goân sī bē tit-tio̍h lī-ek, kiám m̄-sī gōng mah? Sī kap chit ê chheⁿ-hoan bô koh-iūⁿ. Só͘-í khó͘-khǹg lia̍t-uī ê pêng-iú tio̍h koh khah tuì-tiōng Sèng-chheh. Chú Iâ-so͘ ū kóng, "Goá sī oa̍h-miā ê Kiù-chú chiàu-sî tek-khak ē pang-chān lín, bô-lūn só͘ tú-tio̍h goá beh siông-siông kap lín saⁿ-kap tī-teh." Kiù-chú èng-ún lán ê oē sī sǹg bē-liáu, ná chhin-chhiūⁿ gîn-hâng ê toaⁿ put-sî piān-piān thang hō͘ lán ēng.
