Ki-tok Sîn-sèng ê khak-chèng
1915. 4, no. 361, pp. 5-6
Ki-tok-kàu tī sè-kan, kàu chit-tia̍p oá 2000 nî kú. Tī chit 2000 nî ê tiong-kan thang kóng chìn-pō͘ kap hoat-ta̍t sī chin kín. Í-keng ū tsoē-tsoē lâng hâng-ho̍k sìn-khò Ki-tok lâi tsoè Ki-tok-tô͘, tsóng-sī in só͘ sìn, bô lóng saⁿ-tâng. Ū-ê sìn Ki-tok sī lâng, ū-ê sìn Ki-tok m̄-nā sī lâng, iū-koh sī Sîn. Taⁿ tó chi̍t khoán sī khah tio̍h, khiok lóng ū in ê lí-khì thang kóng, tsóng-sī nā sìn i m̄-nā ū jîn-sèng, ia̍h koh-tsài ū sîn-sèng, sī khah ún-tàng.
Taⁿ lūn jîn-sèng hit hong-bīn, chit-tsūn chhiáⁿ pā-lūn, tuì sîn-sèng hit hong-bīn lâi lūn khoàⁿ, khoàⁿ ū khak-si̍t ê chèng-kù thang sìn bô. Goá ài kú 3 khoán lâi tsoè khak-si̍t ê chèng-kù, siá tī ē-toé:-
1. Khoàⁿ I ê kà-sī thang tsoè khak-si̍t ê chèng-kù. Má-khó 1: 22 ū kóng, "Chèng lâng kî-koài i ê kàu-hùn. Tsáiⁿ-iūⁿ chèng-lâng oē án-ni kî-koài? Sī in-uī i ê kà-sī kap tha̍k-chheh-lâng put-tông, chhin-chhiūⁿ ū chiáng koân-pèng ê khoán. Chhin-chhiūⁿ i só͘ kóng, "Hoān-nā tio̍h-boâ kan-khó͘ poē tāng-tàⁿ-ê chiū-kūn goá, goá beh siúⁿ-sù lín pêng-an." Koh kóng, "Goá chiū-sī oa̍h-miā ê piáⁿ, chiū-kūn goá ê koat-toàn boē iau." ia̍h koh kóng, "Goá chiū-sī lō͘, chiū-sī chin-lí, chiū-sī oa̍h-miā, nā bô goá, chiū bô lō͘ thang chiū-kūn Pē." ia̍h koh kóng, "Lín khì phó͘ thiⁿ-ē thoân hok-im hō͘ bān peh-sìⁿ thiaⁿ, sìn lâi siū soé-lé ê tit-tio̍h kiù, m̄-sìn ê tēng-tsoē." Chit khoán ê kà-sī m̄-sī lâng só͘ oē-tit thang kóng chhut, nā m̄-sī ū sîn-sèng m̄-káⁿ kóng chit khoán ê oē. án-ni thang tsoè pîn-kù Ki-tok sī ū sîn-sèng tī-teh.
2. Khoàⁿ I só͘ kiâⁿ ê kî-chek, ia̍h thang tsoè khak-si̍t ê chèng-kù. Ki-tok tī sè-kan só͘ kiâⁿ ê kî-chek ū 35 pái, tī chit 35 pái ê tiong-kan bô tâng khoán; chin thang kiaⁿ lâng ê ní-bo̍k. Khiok hiān-kim ū tsoē-tsoē lâng bô ài sìn chit ê kî-chek ê sū; in ài kóng kî-su̍t-ka, á-sī kek-tì-ka ia̍h oē hiáu kiâⁿ. Tsóng-sī toā-toā bô saⁿ-tâng. Kî-su̍t-ka beh gián-kiù chit chhut kî-su̍t, tio̍h o̍h kuí-nā nî. Kek-tì-ka ài kek-tì chit hāng, ia̍h tio̍h kek chin kú, tsóng-sī Ki-tok kiâⁿ chióng-chióng ê kî-chek, m̄-bián án-ni, khoài-khoài chiū chiâⁿ. Lán m̄-bat thiaⁿ-kìⁿ I tio̍h huì-liáu loā-tsoē sî-kan, chiah oē kiâⁿ chit hāng ê kî-chek, tú-tú kap Siōng-tè chhòng-chō bān-mi̍h saⁿ-tâng. Siat-sú nā bô ū sîn-sèng, beh thài-oē án-ni? Só͘-í thang chhut pîn-kù i ū sîn-sèng.
3. Khoàⁿ I ê kî-tó, ia̍h thang tsoè khak-si̍t ê chèng-kù. I tī sè-kan ê sî, siông-siông ū kî-tó chhin-chhiūⁿ lâng, tsóng-sī gián-kiù i teh kî-tó ê kháu-khì kap lâng put-tông. Lán lâng kî-tó ê iàu-kín tāi-khài lóng sī hoé-tsoē kiû-sià. Ki-tok só͘ kî-tó bô chit khoán ê ì-sù. Khoàⁿ i tī si̍p-jī-kè ê sî, toā siaⁿ kiò kóng, "Goá ê Siōng-tè, goá ê Siōng-tè, siáⁿ-sū pàng-sak goá." Chit-ê chiū-sī i ka-kī tsai m̄-sī uī-tio̍h i ê tsoē, chiū-sī uī-tio̍h tam-tng sè-kan lâng ê tsoē. Chhâ-khó kó͘-tsá ê sèng-tô͘ tī kî-tó ê sî ia̍h sī lóng ū jīn ka-kī ê tsoē-koà:-
Tāi-pi̍t bat kóng, "Goá chhut-sì chiū ū kè-sit, tī lāu-bú ê heng-chêng chiū ū tsoē." Í-sài-a bat kóng, "Goá ū tsai-ē, goá tek-khak bia̍t-bô, in-uī goá bô chheng-khì, koh tiàm tī bô chheng-khì ê peh-sìⁿ ê tiong-kan." Iok-pek bat kóng, "Goá ka-kī iàm-o͘N3 chē tī hoé-hu ê tiong-kan khoán-hoé." Í-sū-lat bat kóng, "Goá ê Siōng-tè ah! in-uī goá kiàn-siàu, m̄-káⁿ ǹg lí ê bīn, goán chiah-ê tsoē-koà chin tāng." Pó-lô bat kóng, "Goá si̍t-tsāi kan-khó͘, chī-tsuī-á oē kiù goá thoat-lī tī tek-khak sí ê sin-khu ê hiap-chè ah." Iok-hān bat kóng, "Goán chiah-ê nā kóng ka-kī ê sin-khu bô tsoē, sī ka-kī khi-phiàn."
To̍k-to̍k Ki-tok m̄-bat án-ni kóng. I ê kî-tó pí lâng khah pek-chhiat, tsóng-sī bô chhut jīn-tsoē ê oē, in-uī i sûn-tsoân bô pē-pēng, tsoè Siōng-tè to̍k-siⁿ ê kiáⁿ. Iok-hān kì-tsài Ki-tok ê kî-tó m̄-nā bô jīn-tsoē, ia̍h koh-tsài kóng bô tsoē, ia̍h ēng Siōng-tè kap ka-kī pîⁿ-téng. Chhin-chhiūⁿ kóng, "Bat lí tsoè to̍k-it ê Siōng-tè kap bat lí só͘ chhe lâi ê Ki-tok, chiū-sī éng-oán-oa̍h." Koh-tsài kóng, "Hoān-nā sio̍k goá-ê ia̍h sī sio̍k lí, sio̍k lí-ê ia̍h sī sio̍k goá." Chit khoán ê oē chī-chuī káⁿ kóng? Koat-toàn m̄-sī lâng só͘ oē ēng, nā m̄-sī kap Siōng-tè tâng-téng, m̄-káⁿ chhut chit khoán ê oē.
Taⁿ lán khoàⁿ chit 3 khoán khak-si̍t ê chèng-kù put-tek-put tio̍h sìn i ū Sîn-sèng tī-teh. I ēng I ê Sîn-sèng kap jîn-sèng lâi tsoè lán sè-kan lâng ê Kiù-tsú, hō͘ sè-kan lâng thang tit-tio̍h sio̍k-tsoē, lán tio̍h iàu-kín lâi sìn-khò I.
(Tân Chheng-gī kì).
