Táⁿ-niau.
1915. 4, no. 361, pp. 9-10
Phí-jîn jīm Táⁿ-niau ê kàu-hoē chiong-kīn nn̄g-nî. Tī chit nn̄g-nî lāi, i ê chìn-pō͘ bô thang hoâ-sǹg, put-kò ke-thiⁿ toā-sè-hàn it-jia̍p lâng nā-tiāⁿ. M̄-sī choan tuì po̍k ê la̍t, khah chē sī tuì hiaⁿ-tī chí-moē ê ín-chìn, Sèng-sîn ê kám-hoà.
Lūn siat chit ê kàu-hoē ê lâi-le̍k, khí-thâu sī tuì chi̍t ê hiaⁿ-tī chhoā 4 lâng khì Ka-gī lé-pài, Gô͘ Thoân-tō Bí-kiàn ián-káng soah lo̍h-tâi chioh mn̄g, chiàⁿ chai sī Táⁿ-niāu lâng, tuì hit-tia̍p khí Gô͘ Thoân-tō chù-sîn tī chia, ta̍k-lé-pài lâi, ū-sî pài-saⁿ ê-hng iā lâi kap in chū-chi̍p kî-tó-hoē pò͘-tō. Chioh Tâng-kau hiaⁿ ê tiàm chiām-sî chò Hok-im-tn̂g, chiām-chiām ke-thiⁿ lâng lâi thiaⁿ, ū-ê tuì Chiang-hoà I-koán tit-tio̍h tō-lí, m̄-kú boē chāi, lâi-lâi khì-khì, só͘-chāi e̍h-sè, soè keh-piah nn̄g só͘-chāi, iā sī bô ha̍p-ēng. Goá lâi bô loā-kú, chiū lâi soè tī ke-boé chi̍t keng gû-bō thô͘-lâng kang-tiûⁿ, ē iông-ún pah goā lâng lâi chē. Hiān-sî muí lé-pài 30 goā lâng chū-chi̍p, ū-sî 40 goā; chóng jîn-sò͘ 70 goā lâng.
Tī kin-nî sin-le̍k 1 goe̍h 24 hō Kam Bo̍k-su sûn kàu-hoē, tī-chia tē-it hoê hiap-la̍p 4 lâng ji̍p kàu, iā ū kiâⁿ sé-lé hō͘ 2 ê gín-ná. Tuì siat kàu taⁿ 3 nî lah.
Chit ê só͘-chāi ū chi̍t sian sîn-bêng put-chí chhut-miâ, hō-chò Tāi-sū, chiàu lâng liû-thoân teh kóng sī Ka-khèng kun lâi iû-le̍k Tâi-oân kàu Táⁿ-niau ê soaⁿ, khoàⁿ soaⁿ-hêng chhin-chhiūⁿ pit-kè kóng, "Khó-sioh chit ê pit-kè-soaⁿ sī tó-teh, beh khiā-kìⁿ chhun-chhiú ng i ê chhuì soà kóng chhut "Sū". Chiàⁿ ū Tāi-sū ê sîn-hō. Ū lâng kóng m̄-sī án-ne, sī 7 goe̍h it-ji̍t khui tē-ge̍k-mn̂g, chèng iau-kuí chhut--lâi ah chia̍h, phah-sǹg in sī chit ê éng-hióng, só͘-í Tāi-sū biō ū siá "Koan-im Tāi-sū." Khiok m̄-sī ū biō, sī chi̍t-keng tiàm kàu sî Tāi-sū chng tī-hia. Tāi-sū siōng chit-tia̍p bô, kàu 6 goe̍h boé chiàⁿ lîm-sî lâi kô͘, ēng tek-pêng-á chò kut, ēng sek-choá chò phoê, ēng o͘-kim-choá chò ba̍k-chiu-jîn; bīn sī lâm-sek-ê, koh ū chhit-chheⁿ tiám, ba̍k-chiu gîn-gîn thó͘-thó͘, tn̂g oá 7 chhùn, thâu chhin-chhiūⁿ gû hoat nn̄g ki kak, tn̂g chha-put-to 3 chhùn. Sio̍k oē kóng chheⁿ-bīn niau-gê. I chē tī chō-téng koân chha-put-to 8 chhioh, sin toā 5 uî, āu-piah pa̍k chi̍t ê Koan-im-soaⁿ, chi̍t sian Koan-im tī-hia, bīn-chêng lióng-pêng ū Sù-tāi Kim-kong, in ê bīn chheⁿ, o͘, âng, lâm, tiong-ng pâi Sam-chōng, Sa-cheng, Ti-ko, Pat-kài, Kâu.
Chè-ji̍t hun 3 chām: (1) Kū-le̍k 7 goe̍h 1, 2, 3 ji̍t; (2) 21, 22, 23 ji̍t; (3) Goe̍h-boé chi̍t ji̍t.
To̍k-to̍k 21 kàu 23, chit 3 ji̍t chin lāu-jia̍t, jîn san jîn hái, ke-lō͘ kheh bē khui, chha-put-to 10 bān lâng lâi, téng kàu Lîm-kí-po͘, ē kàu Tiàm-á-kháu, chit 3 ji̍t kan hoé-chhia te̍k-pia̍t lak-kè, lâi-óng ke kuí-nā choā.
Ko͘-pêⁿ tah chin khoah, chè-mi̍h sī pn̄g, seng-lé, koé-chí, choá-liāu, hiuⁿ-chek.
Kàu tē 3 àm chiong Tāi-sū pa̍k tī tek-ko téng oá poàⁿ-mê chiū pàng hoé sio-khì.
Hàiⁿ-ah! khó-lîn lán ê tâng-pau ê bê-sìn. Gō͘ goe̍h boē ū Tāi-sū, 6 goe̍h boé Tāi-sū tuì lâng chō chhut. I bô kut ēng bi̍h, i bô phoê ēng choá, i bô tó͘-koāⁿ lâng sàng i; lâng koh tuì i lâi kiû pêng-an hok-khì; i bô oa̍h lâng tuì i kiû i pēⁿ; kám m̄-sī àm koh gōng mah? Phí-jîn khoàⁿ liáu bē-bián iu-chhiû, ka-tī pò͘-tō la̍t iú-hān, chiū siông-siūⁿ beh ū pò͘-tō-hoē kiám m̄ chin hó? Tú-hó Ka-gī seng tiāⁿ-tio̍h, sūn-soà kó͘-bú pè-hoē-iú chàn-sêng. Chiū chhiáⁿ Lo̍k-moâ-sán Thoân-tō N̂g Bō͘-sēng, Ka-gī Thoân-tō Ong Poê-eng, Sin-káng Thoân-tō Siau Tek-bêng, Gû-taⁿ-oan Thoân-tō Tân Se̍k-phèng, soà chioh Thô͘-khò͘ ê im-ga̍k-tuī kap 6 ê lâng; Tô͘-hiaⁿ choân-lí. Tiúⁿ-ló Tēⁿ Choân-sek kap Sin-kang hiaⁿ-tī iā lâi tàu-chān, iā chhiáⁿ pún Kong-ha̍k-hāu ê kàu-jū Tiuⁿ Téng-khi Sian-seⁿ ián-soat. (I sī ji̍p Ji̍t-pún Ki-tok kàu).
Chiū tiāⁿ-tio̍h khui 3 ji̍t. Tuì 3 goe̍h 1 ji̍t khí (1:16) ē-po͘ 4 tiám-goā cheng kia̍h toā-kî (siá Ki-tok-kàu pò͘-tō-hoē) chò chêng, āu-bīn im-ga̍k-tuī, iû-chng se̍h-ke pò-lâng ê-hng lâi thiaⁿ tō-lí, tńg-lâi chia̍h-pn̄g, kî-tó-hoē 7 tiám-poàⁿ ián-káng kàu beh 11 tiám, lâi thiaⁿ-ê 200 goā lâng.
Tē 2 ji̍t hun 2 pan chhut chng pò͘-tō, tńg-lâi iû-goân im-ga̍k kóng-kò, kî-tó-hoē, 7 tiám-poàⁿ ián-tê, chit ê-hng koh khah chē, lāi-bīn bô chē ê uī, iā bô thang khiā-kha, ū-ê tī têng-á-kha, ū-ê tī chhim-chéⁿ, ū-ê tī keh-piah ke, in-uī tuì chā-á-ji̍t chhut khì pò͘-tō ê só͘-chāi lâi. Kai-chài Bān Ko͘-niû kap Kok-chím ū lâi, chiū chiong hū-jîn-lâng hun tī Bo̍k-su keng, thiaⁿ-ê lóng-chóng 300 goā.
Tē 3 ji̍t iû-goân hun chò 2 pan chhut-chng pò͘-tō, tńg-lâi chò im-ga̍k kóng-kò, kî-tó-hoē. Chit ê-hng iáu khah chē, chha-put-to 400 chó-iū.
Chit 3 mê-ji̍t thiaⁿ-kìⁿ-ê ū chheng-goā lâng. Kóng ê khak-chhiat, thiaⁿ-ê chū-bī. Ū-ê 3 mê-hng kam-goān thiaⁿ kàu-thàu, ū-ê tuì 3, 4 lí lō͘ lâi, ū-ê hiaⁿ-tī ēng gû-chhia chhia in tuì 8 lí lō͘ lâi thiaⁿ.
Kàu tē 4 ji̍t tāi-ke sì-soàⁿ, goá chiū chhut-khì sûn-ke thàm mn̄g in ū khì thiaⁿ bô, thiaⁿ-liáu àn-choáⁿ. Tāi-ke hoan-gêng kóng chin hó, nā ē thang koh siat iáu khah hó.
Tē 7 ji̍t, chiū-sī lé-pài-ji̍t, lâm, lú ū ke 7 lâng lâi thiaⁿ, m̄-sī chi̍t ê lâng lâi thiaⁿ, sī kuí-nā ke. Chi̍t-ê kóng, "Chêng goá thiaⁿ-kìⁿ chai sī hó, hit-sî teh thèng-hāu chhin-cho̍k khah chē lâng lâi thiaⁿ chiàⁿ beh lâi, khah bē hō͘ in ke kóng oē, Chím-má ê pò͘-tō-hoē chhin-chhiūⁿ pek goá m̄-bián thèng-hāu; in m̄, goá tī, taⁿ kā hiaⁿ-tī kóng m̄-káⁿ lah. Sèng-chheh kóng, "Beh hō͘ tuì-te̍k hâng-ho̍k tī I ê kha-ē," ū èng-giām.
