Eng-kok Táng-sū

1915. 6, no. 363, pp. 10

  Chêng-goe̍h Eng-kok Tiúⁿ-ló-kàu Soan-tō-hoē ê Kì-sū lâi Tâi-oân sûn-sī. Chit ê lâng chin kú uī-tio̍h Soan-tō-hoē lô-sim lô-le̍k. Nî-nî kià gîn lâi pò͘-chō͘ chit pêng ê kàu-hoē sī i ê kong-lô chin chē. I in-uī Tiong-kok ê Ki-tok-kàu chin jia̍t-sim, ka-tī ê kiáⁿ iā ū lâi Kńg-tang-séng chò Ki-tok-kàu i-koán ê i-seng. Chiah ê kàu-su chhoā i sì-kè kiâⁿ. Tī Thài-pêng-kéng kap ta̍k-keng ê ha̍k-hāu iā ū ián-soat bián-lē chiah ê pêng-iú ha̍k-seng. Kàu tī thiaⁿ-kìⁿ kóng pún-tó ê kàu-tô͘ sū-siong chhut-la̍t tê-iân kiàn-tiok Tiong-ha̍k-hāu, i bē kìm-tit chin hoaⁿ-hí. Chhin-chhiūⁿ án-ni ǹg-bāng kàu-hoē ē-tit chū-chú chū-huì, cha̍p nî hō͘ Tâi-oân ê Sèng-kàu ē chū-iû si̍t-hêng.