台灣基督教聯合軍。
1915.6，no.363，pp.11
教會是親像耶穌的軍隊，時常佮魔鬼戰爭。台灣的教會年年進步加添氣力。真久teh講，南北的教會聯合的總軍頭。神學校是親像機關車。教會功效大半是倚靠神學校的學生。In後來會做前來開闊台灣的教會。所以這-擺大會4月27日聚集佇台北艋舺禮拜堂，大家講毋通閣iân-chhiân這个好事。著壯膽來進前。無論南北大家攏有同心著設一間，毋通分做兩位。只有一項無同心，是彼个位置欲設佇甚物所在。有的講台北，有的講淡水，有的講台南，也有的講台中較好。親像按呢欲按怎樣？設使相爭講阮台北較好抑是阮台南較好就到永遠袂會成。的確著一爿來讓步才會好勢。所以大會分紙投票。揀台北--的 25票，揀台南--的 6票，揀台中--的 4票。若是會眾問遐的揀台南台中的會員看in歡喜趁較濟人的意見抑無。就眾會員peh起來徛表明答應的意思，紲吟詩呵咾上帝。
親像按呢向望台南的教會對遮做起頭會ná親密無偌久就無論南北全台的長老教聯合做一體。其餘大會所參詳的代誌較袂比得這條siāng要緊。卻有講起牧師著限任抑毋免這層。既然車盤幾若點鐘久，就託重各中會照in家己的意見佮狀況來維持。較慢到別日向望兩爿一率較好。 |
