Tsoè-chha̍t Chiòng-oân-tsâi

1915. 8, no. 365, pp. 6

  Kūn-lâi ū chi̍t-chiáng ok-siàu ké-tsoè Má-kai i-īⁿ ê Sian-siⁿ ia̍h tsū-chheng sìn-tô͘, khì kok tē-hng tsng-siā soaⁿ-tiûⁿ khi-phiàn kàu-hoē-lāi kap kàu-hoē-goā ê lâng. In seng thàm-thiaⁿ hoē-iú ê miâ, ji̍p-chhù khiú-chhiú kiâⁿ-lé, saⁿ chioh-mn̄g liáu, lóng-sī kóng tō-lí oē. Chi̍t-ê tsū-chheng sī i-īⁿ ê Sian-siⁿ, nî-hè 30 chó-iū, chià-giân siū Sòng I-seng chhe-phài chhut-lâi sûn kok kàu-hoē, tsóng-sī kàu ta̍k uī lóng bô saⁿ-tâng. āu-lâi chiū soà kā lâng i-pīⁿ, lóng sī poàⁿ chín-chè, kàu io̍h phàu hó chiū ài chi̍t, nn̄g, saⁿ, á-sī gō͘-kho͘ gûn. Chîⁿ the̍h-liáu suî-sî lī-khui, put-ti khì-hiòng, sui tông-hoē teh tsú-ì lia̍h boē tio̍h. Pún-tn̂g chit pang lâi ū nn̄g ke ê hoē-iú hō͘ i phiàn-khì, āu ji̍t m̄ tsai beh loā-tsoē hoē-iú tú-tio̍h. Chiàu goá siūⁿ chit-hō lâng oē hāi-tio̍h kàu-hoē lâng kap i-īⁿ, só͘-í kín-siá kuí jī thong-ti kok-uī ê hoē-iú tio̍h soè-jī.

  Keh Tsuí-lêng.