Chin ê Phû-tô-chhiū
1915. 8, no. 365, pp. 6-8
Tī Iok-hān 15 chiuⁿ lán ê Tsú ū kóng I pún-sin sī chin ê phû-tô-chhiū, lán sè-kan-lâng sī chhiū-ki, iā chhiū-ki nā-sī lī-khui chhiū chiū lóng boē tsoè siáⁿ-hè. Sī lán tāi-ke só͘ tsai chhiū-ba̍k sī ū chhiū-chiap tī chhiū-sin chhiū-ki chhiū-hio̍h saⁿ koàn-thong chiah oē bō͘-sēng toā tsâng kiat ké-chí.
Tuì án-ni thang tsai kuí-nā hāng lán sè-kan lâng kap Tsú ê koan(hoan)-hē.
1. Tio̍h kap Tsú saⁿ-liân. Iok-hān 15 chiuⁿ 4, 5, 6 tsat ū bêng-bêng kà-sī nā bô kap Tsú saⁿ-liân chū hō͘ lâng hiat-sak ēng hé sio, nā-sī kap Tsú kau-poê saⁿ-liân chiū oē kiat chin tsoē ké-chí. Lūn chit khoán chiàu lâng só͘ siūⁿ ū chin tsoē khoán, tsóng-sī ū nn̄g saⁿ hāng put-sî hō͘ lâng chhim-chhim kì-tit, chiū-sī kî-tó Siōng-tè, kap Tsú kau-poê, tha̍k Sèng-keng, khì pài-tn̂g lé-pài. Tī Kiaⁿ-to͘ ū chi̍t-ê kàu-hoē sìn-chiá chin chió, hit-ê kàu-hoē ê chi̍t-poàⁿ ê sìn-chiá chin jia̍t-sim, ta̍k tsa-khí 5 tiám-goā-cheng khí chha-put-to 30 hun kú tsū-chi̍p tī pài-tn̂g saⁿ-kap gîm-si, tha̍k Sèng-keng, kî-tó kap Tsú kau-poê. Kàu taⁿ í-keng ū án-ni saⁿ-soà saⁿ ge̍h-goā ji̍t lah, iā tī hit tiong-kan Siōng-tè ū ke siúⁿ-sù pí ta̍k tsá-khí tsū-chi̍p-ê ê têng-poē tī in-ê kàu-hoē. iā ū chin tsoē kàu-hoē jia̍t-sim ê sìn-chiá ka-kī siat Kiōng-lē-hoē saⁿ bián-lē, kî-tó tha̍k Sèng-keng, tsoè lé-pài lóng bô thoân-tō-lí ê khoà-lū.
2. Sìn-chiá tio̍h saⁿ-liân. Iok-hān 15:12, 17 tsat, Tsú ū kóng, lín tio̍h saⁿ-liân, saⁿ-thiàⁿ: Che sī chí sim-sîn ê saⁿ-liân chi̍t hāng. Ū tsoē-tsoē kàu-hoē siat chheng-liân-hoē, chi̍t-ge̍h-ji̍t tsū-chi̍p chi̍t-pái á-sī nn̄g pái chiong só͘ siū kám-kek ê saⁿ-kóng. iā ū thoân tō-lí ê chi̍t nî tiāⁿ-tio̍h saⁿ sì kî khì sûn sìn-chiá ê ke soà tī hia kà-sī Sèng-keng hō͘ kūn-hū ê chhù-piⁿ iû-goân siāng-sî tit-tio̍h hok-im. iā ū ka-têng ê tsū-chi̍p, sī sìn-chiá lóng tsū-chi̍p tī chi̍t-ê sìn-chiá ê ke saⁿ chhin-jia̍t, iā sūn ki-hoē tit-tio̍h tō-lí ê kà-sī. iā ta̍k uī ê kàu-hoē ū hū-jîn-hoē, hō͘ hū-jîn-lâng thang saⁿ-liân tit-tio̍h sim-sîn ê chìn-pō͘. iā ū kuí-nā uī ê kàu-hoē chiong kè-sin bē-lâi ê chi̍t lé-pài ê tiong-kan só͘ ū sio̍k tī kàu-hoē ê sū ìn tī tsoá, ta̍k lé-pài-ji̍t pun hō͘ sìn-chiá. Ū-ê sī kan-ta ìn lé-pài-ji̍t ê toê kap thoân tō-lí ê miâ kap pài-tn̂g kūn-hū ê só͘-tsāi kap tsoē lâng chiūⁿ-lo̍h ê lō͘ pun hō͘ lâng.
3. Tsú-ji̍t-o̍h ê ha̍k-seng tio̍h saⁿ-liân. Má-thài 28 chiuⁿ 19 tsat, Tsú kā I-ê ha̍k-seng kóng, lín tio̍h khì phó͘ thiⁿ-ē thoân tō-lí hō͘ bān lâng thiaⁿ. Hit tiong-kan gín-ná iā tsāi-lāi; koh Má-thài 13 chiuⁿ 1-13 tsat Tsú ū o-ló gín-ná, Má-thài 19 chiuⁿ 13 tsat, Tsú ài gín-ná chhin-kūn I. Tsú-ji̍t-o̍h ê ha̍k-seng sī chiong-lâi kàu-hoē ê toē-ki-chio̍h, chin iàu-kín nā tuì soè-hàn chhin-chhiūⁿ pe̍h-tsoá ê sî ēng tō-lí kà-sī chiū oē tsoè chin hok-khì ê gín-ná kap āu-lâi kian-kò͘ ê sìn-chiá. Chit hāng Kàu-hoē ê tsai tō-lí kap tng-chit ê chin chhut-la̍t tam-tng kà-sī Tsú-ji̍t-o̍h, thàm ha̍k-seng ê pē-bú. iā ū pài-tn̂g lēng-goā khí Tsú-ji̍t-o̍h ê kàu-sek kap gín-ná ê khoàⁿ chheh ê só͘-chāi, ēng koan-hē tī Tsú-ji̍t-o̍h ê chheh kap lī-ek gín-ná ê chheh hō͘ gín-ná tha̍k. iā ū chin tsoē kàu-hoē kuí-nā uī kàu-hoē ê Tsú-ji̍t-o̍h saⁿ liân-ha̍p khui Kiōng-lē-hoē, hō͘ Tsú-ji̍t-o̍h ê ha̍k-seng ū ki-hoē thang ián-soat saⁿ lī-ek.
4. Tio̍h hō͘ bē-sìn-chiá kap Sìn-chiá saⁿ-liân. Í-hut-só͘ 3 chiuⁿ 1 tsat kàu 6 tsat, Pó-lô kóng i uī-tio̍h īⁿ-pang-lâng siū kan-khó͘, siū koaiⁿ-kaⁿ, chiū-sī beh hō͘ bē-sìn-chiá tuì hok-im kap Tsú saⁿ-liân kap kàu-hoē saⁿ-liân saⁿ-kap tit-tio̍h hok-khì. Lūn chit hāng tī chit nn̄g saⁿ nî ê tiong-kan tiâu-tî uī-tio̍h bē-sìn-chiá khui ián-soat-hoē pò͘-tō-hoē. Teh khui ê sî sī kuí-nā uī ê thoân tō-lí ê kap sìn-chiá lóng liân-ha̍p saⁿ pang-tsān; ji̍t-sî tī koe-chhī pò͘-tō, thêng khui ián-soat-hoē. Bē khui ê tāi-seng kuí-nā ji̍t chêng chiū kuí-nā uī ê kàu-hoē ê sìn-chiá saⁿ-kap tsū-chi̍p tsoè chi̍t uī kî-tó, kap khì goā-bīn gîm-si hō͘ lâng tsai chio lâng. Kàu ián-soat soah ê sî pun tsoá hō͘ chì-goān tō-lí ê siá só͘-tsāi miâ kap lâng miâ, āu-lâi thoân tō-lí ê siông-siông khì thàm hiah-ê lâng iā ta̍k lé-pài ēng 30 hun á-sī 1 tiám cheng kú khui kiû tō-chiá ēng Tsú ê tō-lí kà-sī in. Kàu beh siū soé-lé ê sî ū ê sìn-chiá tsoè pó-chèng-jîn chhoā in siū soé-lé, kàu āu-lâi put-sî chim-chiok chiàu-kò͘ hō͘ in tit-tio̍h sim-sîn ê chìn-pō͘.
Nā-sī án-ni sìn-chiá Tsú-ji̍t-o̍h ê ha̍k-seng bē-sìn ê lâng lóng saⁿ-liân tī Tsú, chhin-chhiūⁿ chhiū-sin chhiū-ki, chhiū-hio̍h ê saⁿ-liân . Hit tiong ēng Tsú ê jîn-ài tsoè chhiū-chiap saⁿ koàn-thong, ǹg-bāng chit chin ê phû-tô-chhiū oē bō͘-sēng toā-tsâng kiat hó ê ké-chí.
(Keh Má-se kì).
