Hū-o̍h ê Kò-pe̍h
(Hāu-tiúⁿ Bān Chin-chu kì.)
1915. 8, no. 365, pp. 11-12
Hū-o̍h í-keng siat chin chē nî, chóng-sī hoē-iú chió chió lâng ē bêng-pe̍k khui Hū-o̍h ê ì-sù. Tuì tó-uī thang chai? Sī in-uī siông-siông chih-tio̍h phoe kóng, Bó͘ chí-moē ài khì tha̍k-chheh; m̄-kú kàu tè chiū chai hit-ê chí-moē lám sin-miā. Tī chhù-ni̍h boē lâi ê sî khah toā bīn ê ì-sù m̄ sī beh lâi tha̍k-chheh, sī-beh sūn hó ki-hoē thang chiū-kīn I-seng soà bóng tha̍k tām-po̍h chheh, iā hó! Nā chûn chit hō ì kiaⁿ-liáu tha̍k liáu bô kong-hāu. Chhiáⁿ khoàⁿ Pò ê hoē-iú nā thiaⁿ-tio̍h ū chit hō ì-sù ê chí-moē, tio̍h sè-siông kā i kóng, Seng-khu bô ióng bē kham-tit tha̍k-chheh, m̄ thang hō͘ Ko͘-niû khǹg khang-khang ê ǹg-bāng.
Koh ū chi̍t khoán, sī kap ke-lāi bē hô, á-sī tiōng-hu chhoā sè-î ài siám-pī ke-lāi ê kiáu-jiáu. Chhin-chhiūⁿ chit khoán ê lâng iā sī oh-tit choan-sim tha̍k-chheh. Tha̍k-liáu nā put-hô ê sim iáu tī-teh thái-thó ū choan-sim chò Chú ê kang? Ū chiah ê mâu-pēng chiū oh-tit kìⁿ-chhut kong-hāu.
Khí-thâu Eng-kok ê kong-hāu ū chhe Bo̍k-su I-seng lâi thoân kàu; chóng-sī Tâi-oân ê hong-sio̍k chá-sî hū-jîn-lâng hán-tit chhut-mn̂g, beh sêng-siū tō-lí khah uî-lân. Bo̍k-su chiū kiû Kong-hoē phài Ko͘-niû koè lâi thang thoân hō͘ hū-jîn-lâng thiaⁿ khah lī-piān. Ko͘-niû kó-jiân lâi, ū lio̍h-á chiâⁿ chit ê ì-sù, m̄ kú Ko͘-niû sī kuí ê nā-tiāⁿ, khuì-la̍t, iû-goân sī khiàm-khoeh. Só͘-í siūⁿ-tio̍h siat-chiâⁿ Hū-o̍h thang chai-poê jia̍t-sim iú(iù)-chì ê chí-moē thang pang-chān chò chhin-chhiūⁿ Ko͘-niû ê kang; Goán chai pún-tē ê lâng khah chai pún-tē lâng ê hong-sio̍k sèng-chêng ì-khì lâi ín-chhoā boē thiaⁿ tō-lí ê lâng. Só͘-í kú-kú teh ǹg-bāng ài tit-tio̍h chit hō ê chí-moē. Chóng-sī kàu taⁿ só͘ tit-tio̍h sī bô kuí ê.
Hiān-sî Siōng-tè í-keng thè lán khui lō͘, kuí-nā uī ê Kàu-hoē ài chí-moē khì pang-chāng; ǹg-bāng lia̍t-uī ē tàu thé-thiap chit ê ì-sù. Tī hoē-tiong nā ū kìⁿ-chhut chit hō ê chí-moē, ha̍p nî-hoè tēng-seng thò-tòng, him-bō͘ ài kiù lâng chit ê lâng tio̍h kó͘-bú lâi chiâⁿ Hū-o̍h ê kong-hāu.
ǹg-bāng chiong-lâi lī-ek lâng m̄ sī sió-khoá. Lán nā pún-sin tit-tio̍h kiù tek-khak bē bián-tit thé-thiap Siōng-tè ê ì-sù, in-uī Siōng-tè ài chiong I ê in hō͘ chèng-lâng. Goán chai lia̍t-uī m̄ káⁿ lia̍h chò bô iàu-kín, só͘-í chhiáⁿ lia̍t-uī pek-chhiat kiû Siōng-tè thè lán chhoē chit hō ha̍p-gî chò kang ê chí-moē thang lâi pó͘-chō͘ thoân-kàu ê khiàm-khoeh.
