Hok-khì
(Hô Hi-jîn kì--ê).
(Chiap 9 goe̍h 1 bīn).
1915. 10, no. 367, pp. 1-2
àn-tsáiⁿ-iūⁿ chia̍h chiú ê lâng chin guî-hiám? In-uī chia̍h chiú oē tì-kàu hām-lo̍h tsoē ê chhim-khut, siàu-liân-ke tāi-ke saⁿ-chio kóng, "Tio̍h lâi khì hoa-ke liú-hāng thit-thô, chiah ū hok-khì." Kó͘-chá ê sêng-gú ū kóng, "Bān-ok îm uî siú;" chit tiâu sí-lō͘ m̄ thang kiâⁿ. Chiah ê chiú-lâu chhài-tiàm pháiⁿ-kiáⁿ-keng sī Mô-kuí só͘ siat. Mô͘-kuí sī chī-tsuī? Mô͘-kuí sī kuí-ông. Mô͘-kuí kap Siōng-tè tsoè tuì-te̍k. Kìⁿ-nā Siōng-tè ài lâng hó, Mô͘-kuí chiū kap I hoán-tuì. Siōng-tè ài lâng hó, nā-sī Mô͘-kuí ài hāi lâng. Mô͘-kuí ê kè-chhek put-téng-tē, Mô͘-kuí ēng goā-phê chin suí bê-ba̍k hāi lâng kàu sí-bô. Siàu-liân-lâng chhián-kiàn khoàⁿ tī goā-phê ê suí, m̄-tsai su-io̍k sī ēng khoài-lo̍k hó-khoàⁿ hō͘ lâng boē kì-tit āu-lâi ê tsai-hō, chhin-chhiūⁿ Tông Bêng-hông teh iû goa̍t-kiong, bô loā-kú phoà-pīⁿ îⁿ-tîⁿ kàu boē kóng-tit. Hiah-ê pháiⁿ-kiáⁿ-keng kiám m̄-sī chhin-chhiūⁿ niáu-chhú-tauh ài lia̍h niáu-chhú? Tek-khak tio̍h chhòng i hèng chia̍h ê mi̍h hē toà niáu-chhú-tauh ê lāi-bīn; he̍k sī thô͘-tāu-jîn hang kàu chin phang, á-sī kiâm-hî chhàu-chho. Niáu-chhú tsáu kūn-oá, tuì goā-bīn phīⁿ-tio̍h hó-bī lia̍h tsoè sī lāi-bīn ū hok-khì thang tit-tio̍h, thâu-khak chiū nǹg tuì mn̂g-ni̍h ji̍p-khì. Ò-hò lah! Tauh-tio̍h, hō͘ i tsám tio̍h thâu kàu sí-khiàu-khiàu. Taⁿ hok-khì tī tó-lo̍h? Siàu-liân-lâng khì hoa-ke liú-hāng ài tit-tio̍h hok-khì, hoán-tńg tú-tio̍h chhi-chhám , bô koh-iūⁿ chhin-chhiūⁿ niáu-chhú ê tòng-gōng. Bat tú-tio̍h khit-chia̍h lô-hàn-kha, khoàⁿ i ê thong-sin ū phoà-pīⁿ siⁿ-chhng, mn̄g i ê lâi-le̍k chiū tsai i goân-pún sī hó-gia̍h lâng. In-uī ài hòng-tōng chiū tú-tio̍h chhin-chhiūⁿ án-ni ê chhám-tsōng. Hā Ú só͘ kóng kiám m̄-sī chin si̍t bô chhò? I kóng, "Hó ê lâng kàu-bé hó bé-kiat, pháiⁿ lâng kàu-bé pháiⁿ bé-kéng." Thong Ông iā kóng, "Hó ê lâng tit-tio̍h hok-khì, hòng-tōng ê lâng tú-tio̍h tsai-hō."
Koh ū chin-tsoē lâng kóng, "ài tit-tio̍h hok-khì tio̍h pài sîn-bêng." Thong thiⁿ-kha-ē ài pài sîn. Sè-kan bē bat ū chi̍t kok ê jîn-sîn bô pài sîn. Chin m̄-bat chêng-lí ê chhiⁿ-hoan iû-goân ū sîn thang pài. In phah-sǹg pài sîn sī hok-khì ê kun-pún. Tek-khak tio̍h pài sîn, chiah oē tit-tio̍h hok-khì. M̄-kú pài sîn tio̍h ài jīn-chin, kap pêng-iú kau-poê tio̍h ài tsai i sī chin á-sī ké. Khóng-tsú bat kóng, "Lī-ek lán pún-sin ê lâng ū saⁿ khoán ê pêng-iú, sún-hāi lán ê pún-sin iā ū saⁿ khoán ê pêng-iú." Nā m̄-sī chin ê pêng-iú, m̄-nā bô lī-ek, kiám-chhái soà hō͘ i koái-phiàn iā káⁿ. Pài sîn-bêng ê lâng khah tsoē kiám m̄-sī gōng-gōng-sìn, gōng-gōng pài mah? Só͘ pài ê sîn-bêng sī chin á-sī ké chit tsân lóng bô khe-khó. Pí-phēng Tâi-oân lâng pài Má-tsó͘ ê lâi-le̍k? Lóng m̄-tsai Má-tsó͘ put-kò sī Hok-kiàn-séng Heng-hoà-hú ê tsa-bó͘ gín-ná, Tông-tiâu chhut-sì. In-uī hó miâ-siaⁿ chiong i ê sìⁿ-miā kiù lâng, chiū hiah-ê chhi-gâi ê peh-sìⁿ oe-oe tīn-tīn kàu i-ê biō ho̍k-sāi i ê siōng; boē hiáu-tit siūⁿ Má-tsó͘ iû-goân sī lâng, ū siⁿ ū sí kap lán chiah-ê bô koh-iūⁿ, iā bô kàu-gia̍h hō͘ lán thang ho̍k-sāi. Só͘ pài put-kò sī i-ê chhâ-siōng nā-tiāⁿ. Sím-mi̍h tō-sū ū pún-sū thang ín i ê sîn-hûn tò-tńg lâi tiàm tī lán só͘ tiau-khek ê chhâ-siōng? ài kèng-tiōng kó͘-tsá ê hó lâng, hông-tè, sian-siⁿ á-sī tsó͘-chong, kiám m̄-tio̍h o̍h i ê hó soà-chiap i ê kha-pō͘, án-ni lâi pài? Lāu-pē nā tsoè chha̍t lia̍h koe, kiáⁿ tsū-jiân m̄-thang o̍h i. M̄-kú lāu-pē nā hó, kiáⁿ tio̍h o̍h i ê hó. án-ni sī chin ê hàu-kèng. oē pó-pì lán, oē sù hok hō͘ lán, chiū-sī éng-oán bô khí-thâu bô soah-bé chin-sîn Siōng-tè.
Tiong-kok lâng ê hó miâ-siaⁿ liû-thoân kàu goā kok, chèng-lâng o-ló i-ê tsâi-tiāu. Keng-tsoh chin khûn, tsoè kang-hu chin chêng-kong, tsoè seng-lí sǹg sī it-téng gâu, chí-ū chi̍t hāng hō͘ goā-kok lâng khah ài chhiò, chiū-sī teh pài sîn-bêng. Ta̍k-ê kóng Tiong-kok lâng kàu hiah-ni̍h gâu, tsoè seng-lí, tsoè kang-hu, tsoh-chhân ná chhin-chhiūⁿ chiâⁿ tsoè lâm-chú-hàn. Nā-sī pài sîn-bêng chhin-chhiūⁿ teh chhòng gín-ná-tāi.
(āu-koàn beh koh chiap).
