Tio̍h Chhē Chin ê Hoaⁿ-hí.

1915. 10, no. 367, pp. 5-7

  Lán lâng tī chit sè-kan lóng ū iàu-kín chi̍t-ê bo̍k-tek, chiū-sī nn̄g jī hoaⁿ-hí, in-uī lâng nā bô hoaⁿ-hí, tsoè lâng chiū chin bô kè-ta̍t, só͘-í hoaⁿ-hí sī ta̍k lâng só͘ ài. Bô lūn sī siōng-tiong-hā téng, lâm-hū ló-iú bô-m̄ ji̍t-ji̍t chhē hoaⁿ-hí, kiû hoaⁿ-hí. Tsóng-sī chhē--tio̍h m̄-tsai thang hoaⁿ-hí ê iā ū, chhē chi̍t-sì-lâng bô tit-tio̍h--ê iā ū; sui-bóng ū tit-tio̍h iā sī chiām-sî nā-tiāⁿ, in-uī kan-khó͘ suî-sî tè--lâi. Tuì chi̍t-sì-lâng lâi siūⁿ si̍t-tsāi sī kan-khó͘ iu-hoân khah tsoē, hoaⁿ-hí sī chin chió. Che sī sím-mi̍h iân-kò͘? Hàiⁿ ah! Bô pa̍t hāng lah, chiū-sī tuì tsoē-koà lâi só͘ tì--ê lah. Khó-sioh ta̍k-ê ū hoān-tsoē chiū ta̍k lâng ū kan-khó͘; sui-bóng ēng pah poaⁿ ê hoat-tō͘ ài pâi-tû kan-khó͘ lâi tit-tio̍h hoaⁿ-hí, nā-sī só͘ ēng ê hoat lóng m̄-tio̍h, hoán-tńg ná kan-khó͘; phì-jū lâng tú-tio̍h ba̍k-chiu-thiàⁿ ê pīⁿ chiū koáⁿ-kín poâⁿ-sî thiu-chhiam poa̍h-koà mn̄g-pu̍t, chiū kóng sī hoān-tio̍h, soah-tio̍h,chiū kín kiû ǹg-bāng oē khoàⁿ-kìⁿ thang hoaⁿ-hí, sū-put-ti ná kiû ná i, ná àng ná kan-khó͘, soà tì-kàu chhiⁿ-mî.

  Lán lâng tuì bu̍t-chit chhē hoaⁿ-hí iā chhin-chhiūⁿ án-ni. ài chhēng suí saⁿ, khiā suí chhù, chia̍h hó mi̍h, chhân-hn̂g mi̍h-kiāⁿ chin tsoē thang hoaⁿ-hí, tsóng-sī iā tio̍h seng kan-khó͘. iáu-kú tsoē-tsoē lâng chhē bô tio̍h, soà tio̍h chi̍t-sì-lâng kan-khó͘. Siat-sú nā ū chhē-tio̍h mā sī chiām-sî hoaⁿ-hí nā-tiāⁿ; kî-tiong iā sī kan-khó͘ khah tsoē. Tsun-kuì chhin-chhiūⁿ chiòng siòng tè ông, hó-gia̍h chhin-chhiūⁿ Bí-kok gûn-hâng tāi-ông Mô͘-kun, iā sī kan-khó͘ tsoē, hoaⁿ-hí chió. Sio̍k-gú kóng, "To hù to iu", jú hó-gia̍h iu-hoân jú tsoē. Só͘-í beh tuì bu̍t-chit lâi chhē hoaⁿ-hí chin boē-oē lah.

  Koh tsoē-tsoē lâng tuì tsoē-ok-siōng chhē hoaⁿ-hí, chiū-sī kan-tsà, pe̍h-chha̍t, lām-sám kè-bô͘, tsoè jiáu-loān, tham-sim, pài ngó͘-siōng, kiâⁿ kan-îm, chiú-tsuì, hòng-tōng téng luī; che sī tsoē-siōng ka-tsoē ji̍t-ji̍t ná kan-khó͘. Lō͘-ka 15:11-16, Lô-má 1:26-6:21, Í-hut-só͘ 5:5. Tuì án-ni khoàⁿ m̄-nā bô hoaⁿ-hí, hoán-tńg tú-tio̍h iu-hoân tì-kàu sí, siū kú-tn̂g hêng-hoa̍t ê kan-khó͘.

  Nā-sī án-ni kiám bô lō͘ thang tit-tio̍h chin ê hoaⁿ-hí mah? Ū lah, sī lâng m̄-tsai thang chhē nā-tiāⁿ. Sui-bóng í-chêng ū tuì bu̍t-chit kap tsoē-ok hit uī chhē, nā-sī iáu-boē sí, koh oāⁿ hong-bīn lâi chhē, iû-goân oē tit-tio̍h. Phì-jū chhin-chhiūⁿ ba̍k-chiu-thiàⁿ--ê, nā iáu-bē chhiⁿ-mî, kín-chiū-kīn bûn-bêng ê gán-kho i-su, chiū oē thang tit-tio̍h hó lâi hoaⁿ-hí, tsóng-sī tio̍h tsoân-sìn i chiah oē. Taⁿ lán lâng beh tit-tio̍h chin ê hoaⁿ-hí, tio̍h chhē Tsú Iâ-so͘ Ki-tok, í-goā bô pa̍t tiâu lō͘, in-uī thiⁿ-ē jîn-kan bô koh ū pa̍t ê, thang hō͘ lâng tit-tio̍h kiù. Che sī tsáiⁿ-iūⁿ? In-uī lâng oē kan-khó͘ sī tuì tsoē-koà, lâng oē ū tsoē sī tuì poē-ge̍k Siōng-tè, hō͘ Siōng-tè bô hoaⁿ-hí. Tsóng-sī Siōng-tè sī tsû-pi jîn-ài ê Siōng-tè, put-jím lâng hoān-tsoē siū éng-oán ê kan-khó͘, ài lán bat I ê chin-lí lâi tit-tio̍h kiù, chiah ū chhe I to̍k siⁿ ê kiáⁿ siúⁿ-sù sè-kan hō͘ lâng sìn I, khò I, ho̍k-sāi I; tì-sek chiū tuì án-ni chiâⁿ, gī tuì án-ni chheng, sèng tuì án-ni tsoè, tsoē tuì án-ni sio̍k, kî-si̍t lóng sī tuì Siōng-tè. Só͘-í beh tit-tio̍h chin ê hoaⁿ-hí sī tuì sìn Ki-tok chiah oē, in-uī lán lâng hām-lo̍h tsoē-koà chhin-chhiūⁿ sí, ta̍k ji̍t hō͘ tsoē teh chin tiâu, chiah só͘ kóng só͘ siūⁿ só͘ kiâⁿ só͘ tsoè, lóng sī tsoē-ok ê sū, tì-kàu ji̍t-mî hoân-ló kan-khó͘ chhin-chhiūⁿ kaⁿ-hoān chi̍t poaⁿ. Kai-tsài Ki-tok kàng-sè pò lán tsai tsoē ê kan-khó͘, soà ēng i ê sí lâi sio̍k lán ê tsoē. (Iok-hān 3:18 koh 5:24, Ko-lô-se 1:22). Taⁿ lán kiám m̄-tio̍h ki̍p-sî lâi sìn I, thang tit-tio̍h chin ê hoaⁿ-hí mah? Tio̍h kín-kín chiū-kūn Tsú lâi siú I ê kài-bēng thang bián koh hoān-tsoē ê kan-khó͘. (Iok-hān 1 su 5 chiuⁿ). Lán nā siú Tsú ê kài-bēng Tsú chiū thiàⁿ lán, Pē iā thiàⁿ lán koh beh ēng ta̍k hāng chí-sī lán. (Iok-hān 14:21). Lán tio̍h ēng sim saⁿ kau-poê Pē kap Ki-tok chiū ū toā Hoaⁿ-hí. (Iok-hān 1 su 1 chiuⁿ 34). Chhin-chhiūⁿ phû-tô-ki liân tī phû-tô chhiū, lán liân tī Tsú lâi tit-tio̍h Tsú ê hoaⁿ-hí iā sī án-ni. (Iok-hān 15). Kì-jiân kap Tsú Ki-tok saⁿ-liân chiū Tsú só͘ kiâⁿ ê, lán beh khì kiâⁿ, thang tit-tio̍h kiat ké-chí. (Ka-lia̍p-thài 5:22). Che chiū-sī chhē-tio̍h kú-tn̂g chin ê hoaⁿ-hí. (Iok-hān 15:9, Hui-li̍p-pí 4:4). Chhiáⁿ tāi-ke soà khoàⁿ ióng-sim-sîn-si 18 siú kap 124 siú.

  (T. Chh. S).