刺蝟ê圖1898.05 158卷 p.37刺蝟也有人號做豪豬，伊ê身軀黃色，一二尺長，皮有毛刺利親像槍刀，thang保護伊ê身軀來抵擋對敵。人抑是狗ài beh掠--伊，伊就用毛刺直直chha̍k來抵敵，所以beh掠伊無快。這號刺蝟愛食田雞以及蛇，伊一下咬著蛇就身軀kiù倚，來免hō͘蛇反轉咬伊，到蛇ê力盡，然後就食落去。冬天ê時bih空無出來，伊將毛刺chhiám 樹葉來蓋身軀，人遇--著只有看見樹葉攏無看見伊ê身軀。
Chhì-uī ê tô͘1898.05 158 koàn p.37Chhì-uī iā ū lâng hō-chò hô-ti, i-ê seng-khu n̂g-sek, chi̍t nn̄g chhioh tn̂g, phoê ū mn̂g-chhì lāi chhin-chhiūⁿ chhiuⁿ-to, thang pó-hō͘ i-ê seng-khu lâi tí-tng tuì-te̍k. Lâng á-sī káu ài beh lia̍h--i, i chiū ēng mn̂g-chhì ti̍t-ti̍t chha̍k lâi tí-te̍k, só͘-í beh lia̍h i bô khoài. Chit-hō chhì-uī ài chia̍h chhân-ke í-ki̍p choâ, i chi̍t-ē kā-tio̍h choâ chiū seng-khu kiù-oá, lâi bián hō͘ choâ hoán-tńg kā i, kàu choâ ê la̍t chīn, jiân-āu chiū chia̍h lo̍h-khì. Tang-thiⁿ ê sî bih-khang bô chhut-lâi, i chiong mn̂g- chhì chhiám chhiū-hio̍h lâi khàm seng-khu, lâng gū--tio̍h chí-ū khoàⁿ-kìⁿ chhiū- hio̍h lóng bô khoàⁿ-kìⁿ i-ê seng-khu.
