Loē-tē Chōng-hóng
(N̂g Jîn-êng kì--ê.)
1916. 1, no. 370, pp. 11-12
Goá tī kū-nî káu goe̍h kan, kap Tâi-tiong Lô͘ An-kun chò-hoé khì Loē-tē, ū keng-koè chē-chē chhut-miâ ê só͘-chāi, kî-tiong ba̍k-chiu só͘ ū khoàⁿ-kìⁿ, sim-lāi bē bián-tit ū kám-tōng. Só͘-í siá kuí-jī lâi ìn chiūⁿ Pò. ǹg-bāng khoàⁿ-liáu thang chò chham-khó ê lō͘-ēng, iā hō͘ lia̍t-uī tām-po̍h chai hit-pêng ê chōng-hóng.
Loē-tē kīn-lâi ê chìn-pō͘, sǹg-sī chin hoat-ta̍t; pí-phēng Chi-ná sī thian-chha tī ian. In-uī cha̍p nî chêng goá ū khì Tiong-kok, kàu chûn--nî koh khì, khoàⁿ ta̍k só͘-chāi lóng chha-put-to, sīm-chì ū po͘-thâu hoán-tńg pìⁿ ná soe-bî. Lūn kàu Loē-tē khiok m̄-sī án-ni, ta̍k-hāng ke chin heng-ōng. Goá cha̍p jī nî chêng khì, kàu chit-pang lóng bē jīn-tit, in-uī chhī-khu kái-chèng, toā-chhù koân-lâu, ke khí chin chē, seng-lí iā ke chin lāu-jia̍t, sī tuì kau-thong ê lī-piān. Hoé-chhia, tiān-chhia, chū-tōng-chhia, lóng ke chin-chē, tiān-pò, tiān-oē moá sì-kè to ū, sió-khoá ê po͘-thâu, iā pìⁿ chin lāu-jia̍t. Kàu-io̍k ê sū iā chin chéng-tùn, bô lūn lâm-lú, sè-sè hàn chiū ji̍p iù-tī-oân, ta̍k lâng lóng ū thang tha̍k-chheh. In siáⁿ-sū ē án-ni? Chiū-sī koaⁿ-hú ū teh chéng-tùn, peh-sìⁿ iā teh chéng-tùn.
Tāi-tián ê sî, goá tī Kiaⁿ-to͘, iā khì khoàⁿ chin-chē chhut-miâ ê só͘-chāi, khah-chē sī kó͘-biō, ū ê chin kú, iā chin toā, sǹg kuí cha̍p tn̄g ê khoah, hit tiong-kan ū toā sin pu̍t, ū ê sī ēng tâng á-sī kim, gîn lâi chù-ê; chi̍t ê pu̍t-kham ta̍t kuí-nā chheng gîn. Hia ê lâng cha̍p hūn iok-lio̍k ū chhit hūn tuì-tiōng pu̍t-kàu. In ē chiah-ni̍h heng-ōng, in-uī hia sī kó͘-chá kiàn-to͘ ê só͘-chāi, jîn-sò͘ chin chē, chāi-chá thó͘-tē khah sio̍k, chē-chē lâng chiong in ê tē, kià-hù chò biō-ni̍h ê lō͘-ēng; āu-lâi tē-kè chiáng-khí chin koân, tuì án-ni lâi tit-tio̍h chin hó-gia̍h, soà siat-li̍p pu̍t-kàu ê ha̍k-hāu. Iû-goân ū Toā-o̍h, Tiong-o̍h, Sió-o̍h ê hun-piat; iā ū Lî-ko͘ ê ha̍k-hāu, sǹg-sī chin heng-ōng, sè-le̍k iā chin toā.
Chóng-sī Ki-tok-kàu iā chin oa̍h-tāng ê khoán-sit, Tāi-tián phok-lám-hoē tiûⁿ ê só͘-chāi, iā ū siat pò͘-kàu-só͘, ta̍k ji̍t chin chē lâng teh ián-soat hō͘ lâng thiaⁿ, i ê keng-huì iā ū tê saⁿ-sì chheng gîn thang khai-ēng. Tông-chì-siā ê ūn-tōng-hoē tiûⁿ, iā ū ián-soat-hoē; khai-hoē-sek ê sî ū chhiáⁿ Tāi-oe siú-siòng kap Eng-kok tāi-sài ián-soat, sǹg sī chin chhut-la̍t teh kó͘-bú.
Lūn-kàu chit pang tāi-tián ê lāu-jia̍t, sǹg-sī tang-poàⁿ-kiû ê kok boē bat ū--ê; chham-pài ê lâng ū jī-cha̍p goā bān, iā ū beh oá nn̄g-chheng ê goā kok lâng lâi chham-koan. Thian-hông Pè-hā chē hōng-lián, bān-bān teh kiâⁿ, sī beh hō͘ bān peh-sìⁿ chiam-gióng i ê chun-iông. Kiaⁿ-to͘ ê peh-sìⁿ hoaⁿ-hí kàu ná chhin-chhiūⁿ hoat kông; che sǹg chū-kó͘ bī-iú ê lāu-jia̍t.
iáu-kú chi̍t chân, goá khoàⁿ sī boē tú-hó, chiū-sī pún-tó khì Tang-kiaⁿ liû-ha̍k ê ha̍k-seng, chho͘ khì ê sî, jîn-tē lióng-so͘, iū-koh sī chho͘ chhut tông[sic.]-bûn ê siàu-liân gín-ná, chē-chē sī put-am sè-bū. Tang-kiaⁿ sǹg-sī tē-it ū ha̍k-būn, iā tē-it bûn-bêng ê só͘-chāi. Nā-sī hong-sio̍k sī bē tit thang chiâu-chn̂g hó, tio̍h ài ū chi̍t-ê láu-liān choan-bū lâi thè in tàu êng-uî, iā thang kam-tok in, poê-iúⁿ in ê tek-hēng, hō͘ ha̍k-seng ê pē-bó ē kau-tāi-tit, chiū-sī muí-goe̍h chi̍t-ê ha̍k-seng ke chhut saⁿ nn̄g ê gîn chîⁿ lâi chò chhiáⁿ chit hō Bo̍k-su ê lō͘-ēng; goá siūⁿ só͘ tit-tio̍h sī pí sit-lo̍h ê khah chē. Nā siat-sú kàu tī hia chiah sit-lo̍h in ê tek-hēng, chiū bô chhái tuì sè-hàn teh chai-poê.
Taⁿ lia̍t-uī ū chú-tē tī hia teh tha̍k-chheh ê, chhì-siūⁿ khoàⁿ-māi teh; siat-sú ē tit-thang chhiáⁿ chi̍t ê thò-tòng ê Bo̍k-su, chhiâng-chāi toà hia, thè in liāu-lí chiah ê tāi-chì, iā hō͘ in khah bē lī-khui tō-lí, kiám m̄-sī ke chin hó, ke chin lī-ek mah?
