Lô-má 8 chiuⁿ 14 chat
1916. 2, no. 371, pp. 1-2
"Hoān-nā hō͘ Siōng-tè ê Sîn chhoā--ê sī chò Siōng-tè ê kiáⁿ." (Lô. 8:14).
"Chò Siōng-tè ê kiáⁿ" chit kù sím-mi̍h ì-sù? Sio̍k-gú kóng, Thiⁿ siⁿ tē iúⁿ. Siōng-tè chhòng-chō thiⁿ, tē, hái, bān-hāng-mi̍h; iā chhòng-chō lâng. I iā pì-iū bān-hāng ê oa̍h-mi̍h, hō͘ in chia̍h kàu-gia̍h. "Lí tián-khui Lí ê chhiú, kìⁿ-ū oa̍h ê mi̍h Lí hō͘ in chia̍h kàu pá." "Thiⁿ-pē ēng ji̍t chiò hó kap m̄ hó ê lâng, ēng hō͘ ak gī kap put-gī ê lâng ê chhân-hn̂g." án-ni chai Siōng-tè chhòng-chō bān-lâng, iā ū khoàⁿ-kò͘ in, thang kóng Siōng-tè sī chèng lâng ê Pē, iā chèng lâng sī Siōng-tè ê kiáⁿ-jî. Che sǹg sī khah khoah ê ì-sù.
M̄-kú lâng kap Siōng-tè chám-jiân ū khah chhin-bi̍t ê kan-sia̍p. Lâng ū chi̍t tiâu bē sí ê lêng-hûn, sin-khu sui-jiân sí, lêng-hûn tī-teh. In-uī án-ni lâng kap kî-û ê oa̍h-mi̍h chin-chiàⁿ ū toā koh-iūⁿ. Phì-lūn ti, káu, niau sí chiū soah: lâng sí chiū iáu tī-teh. Hán-tit tú-tio̍h chi̍t cho̍k ê lâng m̄ sìn lâng ê lêng-hûn éng tī-teh. Tâi-oân lâng pài bo̍k-chú, pài sîn-bêng, che sī hián-bêng in sìn chit tiâu ê tō-lí. In pài sîn-bêng khiok ū chhò tī-teh, iáu-kú sī hián-bêng in sìn seng-khu sui-bóng sí, lêng-hûn iáu oa̍h. Tuì án-ni thang chhui-chhut lâng kap kî-û ê oa̍h-mi̍h ū toā cheng-chha.
Thang kóng Siōng-tè só͘ chhòng-chō ê bān-mi̍h sī chhin-chhiūⁿ chò I ê lô͘-po̍k. Ji̍t tuì tang pêng chhut, tuì sai pêng lo̍h, ta̍k ji̍t tio̍h kiâⁿ i ê lō͘-chām, lóng bô oa̍t koè-lâi oa̍t koè-khì chhin-chhiūⁿ chhân-hoāⁿ ê lō͘ hit khoán. Toā hái sui-jiân ū toā-toā la̍t iáu-kú i tio̍h thàn Siōng-tè só͘ siat ê kui-kí: ta̍k ji̍t ū chuí-khó chuí-tīⁿ. Sù-kuì liû-hêng bān-bu̍t hoà seng. Bān mi̍h tio̍h thàn Siōng-tè ê hong-hoat, chhin-chhiūⁿ hoé-chhia tio̍h thàn nn̄g tiâu thih-ki, bē-ē cháu koè-lâi cháu koè-khì. Hoān-nā siū chhòng-chō ê mi̍h, sǹg sī chò Siōng-tè ê chhe-ēng, lâng iā sī án-ni.
M̄-kú tuì lâng ê lêng-hûn chiū ē chiâⁿ chò kiáⁿ. Chò Siōng-tè ê kiáⁿ m̄ sī tuì hiat-khì. Lâng ê siⁿ-tit kiáⁿ-sin, bē siⁿ-tit kiáⁿ-sim. Beh chò Siōng-tè ê kiáⁿ sī tuì têng-thâu-siⁿ, sī Siōng-tè chì toā ê Sîn kiò lán ê sîn chhut-sì lán chiū chò Siōng-tè ê kiáⁿ. Che si̍t-chāi sī ò-biāu ê tō-lí, chheng-chheng tuì oá-khò Kiù-chú Iâ-so͘ Ki-tok chiah ū án-ni.
Koh siūⁿ chi̍t hāng: "Hō͘ Siōng-tè ê Sîn chhoā" chit kù sī cháiⁿ-iūⁿ? Lán ê Chú hō͘ Sîn chhoā kàu khòng-iá tú-tio̍h Mô͘-kuí chhì. I kà-sī lâng kap kiâⁿ sîn-jiah lóng sī in-uī I hō͘ Sîn chhoā. I bat kóng, Goá m̄ sī chū-choan lâi kóng, sī chhe goá ê Pē chiong só͘ eng-kai kóng, só͘ eng-kai thoân-ê, hoan-hù goá kóng. I hō͘ Sîn chhoā in-uī chò Siōng-tè ê Kiáⁿ.
Pó-lô iā hō͘ Siōng-tè ê Sîn chhoā i. Chhin-chhiūⁿ Sù-tô͘ 16 chiuⁿ kóng, Sèng-sîn kìm-chí i tī A-se-a thoân tō-lí. I ài-beh khì Pì-chhui-nî, Iâ-so͘ ê Sîn m̄ chún i. āu-lâi Chú ê Sîn tiàu i khì Má-kî-tùn thoân hok-im. I hō͘ Sîn chhoā, che pîn-kù i chò Siōng-tè ê kiáⁿ.
Siōng-chú ê chèng peh-sìⁿ iā sī án-ni hō͘ Sîn chhoā. Lūn hō͘ Sîn chhoā lán m̄ bián lia̍h che chò sím-mi̍h koài-sū, m̄ bián phah-sǹg sī Siōng-tè ê Sîn chioh lâng ê he̍k-sin, chhut-hiān lâi chhoā. Kî-si̍t sī lâng ê sîn nā kap Siōng-tè ê Sîn saⁿ kiat-liân, liáu-āu lâng só͘ chò ê ta̍k hāng sū lóng sī uī-tio̍h Siōng-tè ê Sîn teh kám-tōng i ê sim.
án-ni lâng chò Siōng-tè ê kiáⁿ sī tuì têng-siⁿ, iū-koh nā hō͘ Siōng-tè ê Sîn ín-chhoā sī pîn-kù i chò Siōng-tè ê kiáⁿ. Taⁿ hō͘ Sîn ín-chhoā ê lâng phì-lūn tio̍h siⁿ[sic.] Sîn ê kiat-kó chiū-sī jîn-ài, hoaⁿ-hí, hô-pêng, thun-lún, chû-pi, siān-liông, tiong-sìn, un-jiû, chún-chat. Nā ū lâng ū chit hō ê hêng-tōng kú-chí thang kóng i sī Siōng-tè ê kiáⁿ in-uī i teh hō͘ Sèng-sîn ín-chhoā.
