Ta-pa-nî ê Siau-sit.
1916. 2, no. 371, pp. 10-11
Tī 9 goe̍h ê Pò ū kóng Ta-pa-nî ê siau-sit; hit-sî hoē-iú lóng pêng-an, sī kan-ta chhù-the̍h hoè-mi̍h siū hoé sio nā-tiāⁿ. Bô phah-sǹg Kàu-hoē-pò chhut liáu ê sî, chiah tú-tio̍h liân-luī ê choē. Hoē-iú siū lia̍h chóng-kiōng 22 lâng, ū 3 ê hoè[sic.]-bián, 7 ê sí-hêng, 12 ê bû-kî-tô͘. Bû-kî-tô͘ tiong-kan ū chi̍t ê chip-sū, sìⁿ Phoaⁿ miâ Teng-ōng; sī jia̍t-sim tī kàu-hoē. Ū 2 ê ji̍p-kàu chiá, kî-û--ê sī sìn-tō chiá. Taⁿ Ta-pa-nî ê kàu-hoē toā-poàⁿ sit-lo̍h khuì-la̍t. Hiān-sî hiah ê pī-lān hoē-iú ê ke, tī chit kīn-ji̍t chèng-hú ū chún in tńg-khì suî lâng ê só͘-chāi, tah chháu-liâu chhiáⁿ chiām toà, iáu-boē ū tio̍k-lo̍k ê só͘-chāi. Taⁿ lūn hit lāi-tiong ê chhi-chhám sī kóng bē chīn.
iū-koh kî-û ê hoē-iú soà bô ki-hoē thang chū-chi̍p lé-pài; lán ê lé-pài-tn̂g ū hō͘ chèng-hú ê kéng-chhat-koaⁿ chioh toà goe̍h-goā ji̍t kú, iū-koh hō͘ chòng-teng chioh toà iā sī goe̍h-goā ji̍t. Taⁿ kàu chit sî tāi-chì ū pān khah chheng-chhó, goán chiah ū ki-hoē koh chū-chi̍p, lóng sī tī goá toà ê siok-sià lé-pài.
Taⁿ ài kóng-khí Ta-pa-nî Kàu-hoē ê goân-iû, hō͘ tāi-ke chai. Tī 20 goā nî chêng, Poa̍h-bé kuì tông-hoē ū lâi siat-li̍p chi̍t uī ê chi-hoē, tī Ta-pa-nî ke ji̍p tang ū 8 lí-lō͘ ê hn̄g; tī hia iā ū phài tióng-chip lâi chò chú-lí chhoā hoē-iú lé-pài. Kàu āu-lâi ū 20 goā hō͘ ê hoē-iú pài Siōng-tè, Kàu-sū-hoē iā hoaⁿ-hí phài Lí I-chiong Sian-siⁿ khì hia kà sió-o̍h. Hit-sî hoē-iú chin jia̍t-sim, iā ū chìn-pō͘ tī kàu-hoē. Hit-sî Thâu-siā tông-hoē ū toā heng-khí, chèng tióng-chip ài beh khui-khoah in ê kàu-hoē, chiū khì tuì Poa̍h-bé kuì tông-hoē chhéng, chhiáⁿ in chiong chit ê chi-hoē niū in chai-poê. Hit-sî Poa̍h-bé ê kuì tông-hoē ū èng-ún, chiū chiong chit ê chi-hoē niū hō͘ Thâu-siā chiáng-ak. Chiū tī 10 goā nî chêng hit sî, chiū-sī Ko Tok-hêng Sian-siⁿ toà tī Thâu-siā ê tông-hoē, chiū tāi-ke chin hoaⁿ-hí, lâi chai-poê chit keng ê chi-hoē ū kuí-nā nî kú.
āu-lâi tāi-ke teh hùn-chì ài hō͘ kàu-hoē khah khui-khoah, chiū tuì Kàu-sū-hoē chhéng ài beh chiong chit ê chi-hoē īⁿ-tōng chhut-lâi Ta-pa-nî ke. Chit ê ke-chhī chin lāu-jia̍t. Ū chi-thiaⁿ, iā ū chi̍t ê chè thn̂g ê hoē-siā, sǹg-sī khah lāu-jia̍t ê só͘-chāi.
Hit-sî Kàu-sū-hoē ū hoaⁿ-hí èng-ún. Kam Bo̍k-su chiū lâi siat-hoat bé 3 khám tiàm-tē tī chi-thiaⁿ ê mn̂g-kháu, iā sī kīn chhī-tiûⁿ ê só͘-chāi; beh pò͘-tō khiok ū khah hó ki-hoē, m̄-kú beh lé-pài ū khah kiáu-jiáu. Chóng-sī chit 3 khám tiàm lóng sī tek-liāu khí-chō; tuì bé kàu taⁿ oá ū 12 nî kú. iū-koh tī chêng-nî ê hong-thai saⁿ-soà kàu, chiū bē bián-tit siū phoà-sún, chiū tī 3 nî-chêng Kàu-sū-hoē, iā tio̍h soà liāu-lí chit ê Ta-pa-nî ê kàu-hoē.
Chêng-nî ê Kàu-hoē-pò ū kóng Ta-pa-nî ê kàu-hoē ū phoà-noā hong-hoè; goá phah-sǹg lán tāi-ke iáu ē kì-tit, chit pang m̄-bián koh kóng. Hit-sî goá chiū chhut-la̍t kó͘-bú hoē-iú, kóng-khí lán ê Ki-tok Sèng-kàu ê pài-tn̂g chiah phoà-noā si̍t-chāi chin kiàn-siàu. Goá chiū chiong Kū-iok Hap-ki[sic.] ê chheh 1:4-6 chat chiong chit ê tê-ba̍k khai-kái hō͘ chèng hoē-iú thiaⁿ. Hit-sî tāi-ke chiah hùn-chì chai Siōng-tè ê kàu-hoē m̄ thang hong-hoè; m̄-kú ka-tī bô khuì-la̍t thang hoan khah suí ê pài-tn̂g. Phí-jîn chiū khui lō͘ kap in chham-siâng, kóng chiàu lín ê le̍k-liōng tê khoàⁿ ū loā-chē gîn; kî-û chiah ê khiàm-khoeh--ê chiah lâi chhéng Kàu-sū-hoē chàn-sêng. Hit-sî hoē-iú ū oá 30 hō͘; chóng-sī lóng bô hù-ka ê lâng, lóng sī choh-sit ê sàn-hiong lâng; tāi-ke hùn-chì, tê kàu 300 kho͘. Hit-sî chiū tuì Kàu-sū-hoē chhéng chioh; Kàu-sū-hoē iā hoaⁿ-hí èng-ún chiū chiong 400 kho͘ lâi chioh goán; iā koh 150 kho͘ pó͘-chō͘ goán. āu-lâi goán ū koh tuì pún-tó ê kàu-hoē chhéng-kiû; iā ū lia̍t-uī hó-sim tâng-chêng thiàⁿ Chú ê hoē-iú lâi chàn-sêng kiōng ū 300 kho͘. Chiah ê chóng-sǹg chò-hoé kiōng ū 1150 kho͘. Hit-sî goán hó-táⁿ àn-sǹg, chiū oē-tô͘ hō͘ Kàu-sū-hoē soà hêng-kang khí-chō.
Taⁿ goán ū tit-tio̍h lia̍t-uī hó-sim tâng-chêng thiàⁿ Chú ê iú-chì-chiá thè goán chàn-sêng chit chân ê hó-sū, goán eng-kai tio̍h kā lín lia̍t-uī kiò to-siā. Chóng-sī goán bô chiong lín ta̍k lâng ê chun-sèng kuì-jū lâi pâi-lia̍t hō͘ tāi-ke chai, iā sī thàn Sèng-keng Má-thài 6:1-4. Sī lán ê Chú Iâ-so͘ só͘ kóng ê tō-lí chiàⁿ-chhiú só͘ chò bo̍h-tit hō͘ tò-chhiú chai, lín tī àm-chēⁿ ê chín-chè, Siōng-tè tī téng-bīn teh khoàⁿ chiū chin hoaⁿ-hí beh pò-tap lín. Sūn-chhéng kuì-an.
