Lāi-toē Lú Ha̍k-hāu.
1916. 3, no. 372, pp. 5-6
Lāi-toē ê Lú ha̍k-hāu ū hun tsoè kuí-nā khoán.
1. Thâu chi̍t khoán sī Iù-tī-oân. Iù-tī-oân chiū-sī hō͘ soè-hàn gín-ná tha̍k, sī tuì sì hoè khí kàu kàu-gia̍h toā-hàn thang ji̍p sió-ha̍k-hāu. Tī Iù-tī-oân gín-ná o̍h gîm-si, thit-thô, chhiú-gē, hit hō. Ū kok-ka só͘ siat-li̍p--ê 500 goā keng ê iù-tī-oân, ia̍h ū kàu-hoē só͘ siat-li̍p--ê 128 keng. Tī chit hō ê o̍h-tn̂g ta-po͘ kap tsa-bó͘ gín-ná saⁿ-kap tha̍k.
Lūn chit khoán ê ha̍k-hāu bat ū chi̍t ê Bo̍k-su-niû siá kóng chin tsoē m̄-sìn tō-lí ê lâng hō͘ in ê gín-ná lâi iù-tī-oân o̍h; āu-lâi hiah ê pē-bú khah bô oàn-hūn Ki-tok-kàu, khah kam-goān lâi pài-tn̂g thiaⁿ tō-lí. án-ni thang tsai ia̍h sī lī-ek in ê sī-toā lâng.
2. Tē jī khoán. Khah koâiⁿ ê ha̍k-hāu chiū-sī sió-ha̍k-hāu. Tī hit khoán ta-po͘ kap tsa-bó͘ iû-goân saⁿ-kap tha̍k. Hō͘ gín-ná khì iù-tī-oân tha̍k, sī chhut-tsāi lâng, nā-sī sió ha̍k-hāu m̄-sī án-ni; lóng-tsóng ê gín-ná eng-kai tio̍h khì tha̍k. Hiān-sî kok-lāi chi̍t pah hūn ê tsa-bó͘ gín-ná káu-tsa̍p-chhit hūn ū khì sió-ha̍k-hāu tha̍k. Tī sió-ha̍k-hāu sī la̍k hè í-siōng ê gín-ná lâi tha̍k. In o̍h in pún-kok ê jī kap hàn-jī, bûn-hoat, pit-soàn, uī-tô͘, gîm-si, thé-chhau.
Tuì sió-ha̍k-hāu tsut-gia̍p liáu nā ài koh tha̍k khah chhim, tio̍h ji̍p ko-téng ha̍k-hāu. Chit hō ia̍h hun tsoè nn̄g saⁿ khoán. Tī pêng-siông--ê, ha̍k-seng tio̍h tha̍k sì nî kú, chiū tsut-gia̍p. Gō͘ nî kú-ê ia̍h ū, la̍k nî kú-ê ia̍h ū. Tuì sió-ha̍k-hāu tsut-gia̍p ê ha̍k-seng chi̍t poàⁿ khah ke ū ji̍p ko-téng lú-o̍h ia̍h tha̍k kàu tsut-gia̍p.
Ko-téng lú-o̍h ê tiong-kan chin tsoē chiū-sī kàu-hoē siat-li̍p--ê. Tāi-khài lâi sǹg sì-hūn ê saⁿ-hūn chiū-sī kok-ka siat-ê, sì hūn ê chi̍t hūn chiū-sī kàu-hoē siat-ê. Kàu-hoē só͘ siat-ê kap kok-ka só͘ siat-ê ê thêng-tō͘ chha-put-to, put-kò kàu-hoē só͘ siat-ê ū kà Sèng-keng ê tō-lí. Ko-téng ê ha̍k-hāu khah tsoē ū tiāⁿ-tio̍h ha̍k-seng tio̍h tha̍k sì nî, āu-lâi chhut-tsāi ha̍k-seng ke nn̄g saⁿ nî lēng-goā tha̍k. Nā ke tha̍k, khah tsoē sī Eng-kok chheh.
3. Tē saⁿ khoán. Pí ko-téng lú-ha̍k-hāu koh khah koân ū kuí-nā khoán ê lú-o̍h. Chit-tia̍p tī lāi-toē chin tsoē tsa-bó͘ lâng ài o̍h tsoè sian-siⁿ, só͘-í ū Su-hoān ha̍k-hāu. Su-hoān ha̍k-hāu hun tsoè nn̄g khoán. Pêng-siông--ê tio̍h tha̍k saⁿ nî nā-tiāⁿ. oá tī Su-hoān ha̍k-hāu ū sió-ha̍k-hāu hō͘ Su-hoān ha̍k-hāu ê ha̍k-seng ū ki-hoē thang thoàn-liān kà chheh o̍h tsoè sian-siⁿ. Tī Ji̍t-pún khah toā ê siâⁿ ta̍k siâⁿ ū chit hō su-hoān ha̍k-hāu. Kàu-hoē ia̍h ū khui chit khoán ê o̍h-tn̂g, tsóng-sī chin chió. Sī in-uī chèng-hú m̄-jīn in tsut-gia̍p ê ha̍k-seng tsoè sian-siⁿ, ia̍h m̄-tsún in kà kong-ha̍k-hāu.
Lú su-hoān ha̍k-hāu ia̍h ū koh chi̍t khoán, chiū-sī ko-téng su-hoān ha̍k-hāu. Lūn chit khoán ū nn̄g keng nā-tiāⁿ. Chi̍t keng tī Tang-kiaⁿ, chi̍t keng tī Ná[sic.]-liông (Nara). Ná[sic.]-liông chiū-sī kū ê kiaⁿ-siâⁿ. Chit nn̄g keng sī kok-ka siat-ê. Ha̍k-seng tio̍h tha̍k sì-nî chiū oē tsut-gia̍p. Tī Tang-kiaⁿ ê ko-téng su-hoān ha̍k-hāu hiān-sî ū oá 400 lâng teh tha̍k, tiong-kan ū lâng tha̍k koaⁿ-huì.
4. Tuì ko-téng ha̍k-hāu tsut-gia̍p ê ha̍k-seng nā bô ài tsoè sian-siⁿ, tsóng-sī ài tha̍k khah chhim-ê, in tio̍h ji̍p Lú Tāi-ha̍k. Tī kok-lāi kan-ta ū chi̍t keng nā-tiāⁿ, tī 1901 nî siat tī Tang-kiaⁿ. Ū 1000 goā ê ha̍k-seng. Chit keng ê hāu-tiúⁿ sī sìn tō-lí ê lâng, iáu-kú ū chin tsoē m̄-sìn tō-lí ê hó-gia̍h lâng chhut chîⁿ lâi pang-tsān ha̍k-huì.
5. iáu ū koh chi̍t khoán, chiū-sī Lú I-ha̍k-hāu. ài ji̍p ê lâng tio̍h tāi-seng tuì ko-téng ha̍k-hāu tsut-gia̍p. Hiān-sî ū 200 goā teh tha̍k, ia̍h chit-tia̍p tī lāi-toē ū chin tsoē tsut-gia̍p ê lú i-seng.
Pí Ko-téng khah koân ê ha̍k-hāu, he̍k-sī Su-hoān ha̍k-hāu, Lú Tāi-ha̍k, í-ki̍p Lú I-ha̍k-hāu bô poàⁿ keng sī kàu-hoē siat-ê. Só͘-í chit nn̄g saⁿ nî ê tiong-kan kok-uī ê kàu-hoē teh gī-lūn beh siat chi̍t keng liân-ha̍p ê Ki-tok-kàu ê Lú Tāi-ha̍k. Nā siat chiâⁿ, chiū tuì ko-téng ha̍k-hāu tsut-gia̍p ê ha̍k-seng oē khì hit keng tha̍k. Kàu-hoē ê Lú-o̍h tuì án-ni oē khah oân-tsoân.
Téng-bīn só͘ siá-ê thang hō͘ tāi-ke tsai lāi-toē ê tsa-bó͘ gín-ná put-chí ū ki-hoē thang tit-tio̍h ha̍k-būn. Ū chi̍t hāng iàu-kín lán tī Tâi-oân tio̍h o̍h, chiū-sī tio̍h hō͘ tsa-bó͘ gín-ná kap ta-po͘ pîⁿ-pîⁿ tit-tio̍h ki-hoē thang khì kong-ha̍k-hāu tha̍k-chheh. Chit-tia̍p tī Tâi-oân khah tsoē só͘-tsāi ū siat kong ha̍k-hāu, tsóng-sī chin tsoē pē-bú bô tì-ì hō͘ tsa-bó͘ khì tha̍k. án-ni si̍t-tsāi chin ū chhò-gō͘. Kàu-hoē lāi ê lâng tio̍h tsoè bô͘-iūⁿ lâi iàu-kín hō͘ tsa-bó͘ gín-ná tit-tio̍h ha̍k-būn.
Tī Tâi-oân chèng-hú só͘ siat ê ha̍k-hāu hō͘ Tâi-oân ê tsa-bó͘ gín-ná tha̍k, kan-ta ū kong-ha̍k-hāu kap Hù-sio̍k ha̍k-hāu. Kong-ha̍k-hāu ū chin tsoē keng. Hù-sio̍k ha̍k-hāu ū chin tsoē keng. Hù-sio̍k ha̍k-hāu chi̍t keng nā-tiāⁿ, chiū-sī tī Báng-kah hit keng. Hiān-sî tī hia ū oá 100 ê ha̍k-seng teh tha̍k, tsut-gia̍p liáu khah tsoē tī Kong-ha̍k-hāu tsoè lú sian-siⁿ. M̄-kú tī Tâi-oân ū chin tsoē ê tsa-bó͘ gín-ná boē tit khì Hù-sio̍k ha̍k-hāu. Koh ū-ê ài tha̍k khah chhim, nā-sī bô ài tsoè sian-siⁿ. Só͘-í ū kàu-hoē só͘ siat ê lú ha̍k-hāu. Hiān-sî tī Tâi-oân ū nn̄g keng, chiū-sī Tâi-lâm chi̍t keng, Tâm-tsuí chi̍t keng. Thêng-tō͘ pí Kong ha̍k-hāu khah koâiⁿ, tsóng-sī iáu-bē kàu lú ko-téng ha̍k-hāu hiah koâiⁿ. Goán hiān-sî teh kái-liông Tâm-tsuí lú ha̍k-hāu ê thêng-tō͘, ǹg-bāng oē hō͘ Tâi-oân ê tsa-bó͘ gín-ná ū ki-hoē thang tha̍k khah chhim ê chheh lâi ke tit-tio̍h ha̍k-būn.
Kim Jîn-lí.
