共進會。
1916. 4，no. 373，pp. 5
台灣對屬日本帝國的版圖以來，有二二年久，猶未捌有這擺大鬧熱，予全台佮對岸佮內地的人來看。這幫總督府有擬定設台灣勸業共進會佇台北城內。有分做兩?會場。第一个會場就是新總督府的衙門，這間厝有五層懸，正面的塔有180尺懸，算是真大間。第二个會場就是佇苗圃的內面，現時咧備辦起濟濟款的厝，佮生理店。開會的日就是4月10日起。到時的確會真鬧熱，就是對有台灣以來，所未捌有的。聽見講有50萬人會來看。有這款的好機會未免得予咱的心大意愛報揚主的道理，予遮的人聽見。今北部的中會已經有議決著設佈道場佇共進會第二會場的正面。現時所在已經定著，厝亦貿人咧起，向望無久會好。傳道局的宣道部亦有議定著召20外位的傳教士來佈道，每日欲講3擺，就是頂晡下晡佮ê昏時。佈道的日子欲佮共進會平久。
閣再亦欲設一間婦人的休憩所，通予婦人人歇睏，佮講道理予in聽。
亦閣再醫生欲設一間醫生的救護所，通救緊急病的人佮順機會講道理予in聽。按呢有3款的事業相連，向望到時會得著真好的機會通干證主的名。閣再冊房亦欲派人佇遐賣冊佮分佈道論予人。請列位的兄弟姊妹迫切為著這層事祈禱，向望得著聖神的氣力親像五旬節的結果一樣。
(陳清義)。 |
