葉俊ê小傳
1916.04 373卷 p.6
葉俊出世tī主後1867年，tī細漢ê時父母sàn-hiong人，有讀淡薄漢學nā-tiāⁿ，就hō͘人chhiàⁿ做辛勞。伊ê第四兄代先得著道理，伊就盡力阻擋，總是無久伊ê第四兄有去淡水入神學校，後來in 老母有破病去淡水chhoē醫生，葉俊就去照顧，對án-ni就得著道理。對十六歲起，就去跟隨麗牧師，十七歲年尾就入神學，二十一歲就出來水轉腳做傳道，hit時伊有盡力鼓舞教會合鼓舞起新拜堂，對án-ni教會就漸漸興起。對帝國領台ê時，伊有備辦搬去淡水拜堂，後來有beh kā 伊轉任，因為有幾nā項ê阻擋，就辭職歇工，猶原koh tiàm 水轉腳做生理合做醫生。
今歇工了後有通幫贊教會ê所在，伊真歡喜做，也出力題捐做教會ê模樣。不幸tī舊年尾有破病入馬偕醫院；代先得著醫生盡力醫治，病漸漸較好。因為生理kap 人長短ê事想著姑不chiong出院倒轉--來，病勢koh抵著愈傷重。到本年二月七號koh入院，總是可惜食藥無效，tī 二月十八號hō͘主揀召離開世間，過日續tī hia埋葬。有得著幾nā位西國合本地牧師、傳道師、神學校ê學生合大稻埕、艋舺、水轉腳ê教會來送葬，致意愛寫幾日kā 列位說謝。今教會有失落一位熱心ê會友；伊ê某子有失落一個thâu-chàng ，敢m̄傷悲mah?
（葉金木記。） |
