冊房的告白。
1916. 4，no. 373，pp. 12
今有閣辦養心神詩，白話字細本-的，2000本來；若有人愛，著寄批來冊房買。總是這陣有人欠冊房的數；請恁若有欠5箍以上的數著代先寄銀來還，阮才欲將新的詩冊寄去予恁。因為阮也有欠廈門的冊房三四百箍，無錢通予伊，實在真毋好。設使列位若將所欠的寄來予阮，卻有夠額通還in。另外也有欠上海的聖冊會，合額著緊緊寄去予in。這毋是勸人著好心來題，不過是勸人著盡本份來還債。
閣一項。有兩款的報，就是商務局所出的東方雜誌，佮進步雜誌，出報的人有通知阮講欲買攏著前金。總是欲予阮逐擺替恁寄，實在真費氣；請恁欲買的人本身設法，對郵便寄銀去買。其餘的報，親像聖會報，抑是大同報，阮歡喜猶原替恁辦；因為出報的人甘願先寄，聽候阮將眾人的銀集做伙才寄去。
新翻譯的聖冊遐的版攏鑄好啦；向望後月會通得著。頭擺欲印5000本做廈門佮台灣的路用。
近來為著歐洲的交戰，紙料的價攏起加倍；驚了逐樣的報佮冊也著起價。 |
