Ngô͘-lô-su.
1916. 5, no. 374, pp. 5-6
Ngô͘-lô-su sǹg sī sè-kài chin toā ê kok. Tē-kiû ê toē tāi-khài la̍k hūn ê chi̍t hūn sī tī Ngô͘-lô-su ê kài-hān-lāi. Ngô͘-lô-su ê peh-sìⁿ tāi-khài ū oá nn̄g bān bān. Ta̍k nî i ê peh-sìⁿ ū ke-thiⁿ gō͘ la̍k pah bān.
Ngô͘-lô-su khah tsá khah bô bûn-bêng, peh-sìⁿ khah bô khai-hoà, kok-ka chiām-chiām ná heng-khí. Nn̄g pah nî chêng ū chi̍t ê chin chhut-miâ ê hông-tè chē-uī. I ê miâ hō-tsoè Pí-tek. I gâu tī-lí kok-ka, siat chin tsoē khoán ê hoat-tō͘ hō͘ Ngô͘-lô-su oē khah heng-khí. I ū phah-iâⁿ kok-ka ê tuì-te̍k, ia̍h ū kái-chèng kū ê hong-sio̍k, siat chin tsoē khoán sin ê hoat-tō͘. Hiān-sî Ngô͘-lô-su sui-bóng peh-sìⁿ bô tú-tú chhin-chhiūⁿ Eng-kok, Hoat-lân-se, Tek-kok hiah bûn-bêng, m̄-kú kūn-lâi put-chí ū chìn-pō͘.
Tsa̍p goā nî chêng Ngô͘-lô-su ū kap Ji̍t-pún sio-thâi. Ngô͘-lô-su ê la̍t khah toā, m̄-kú tio̍h tsài i ê peng kuí-nā chheng phò͘ lō͘ ê hn̄g. Tuì án-ni i ê peng iáu-bē chiâu lâi, Ji̍t-pún ū chhut-chiàn thâi-iâⁿ. Ngô͘-lô-su chiū kam-goān kóng hô.
Tuì hit-tia̍p kàu taⁿ Ngô͘-lô-su put-chí ū chhut-la̍t chéng-tùn i ê lio̍k-kun. Ta̍k hāng siat put-chí chhù-sū. Hiān-sî sè-kài ê kok ê tiong-kan Ngô͘-lô-su ê peng sǹg tē-it tsoē.
Chit pái Au-lô-pa chiu ê toā sio-thâi tāi-khài lâi kóng sī in-uī Ngô͘-lô-su kap Tek-kok nn̄g kok ê su-iâⁿ. Ngô͘-lô-su tē-it iàu-kín chiū-sī pa̍t ji̍t i só͘ koán ê toē oē kàu tī Tē-tiong-hái, in-uī hiān-sî i lâm-pêng ê kài-hān sī kàu O͘-hái nā-tiāⁿ. I ê tsûn nā beh kàu Tē-tiong-hái tio̍h tuì Thó͘-ní-kî só͘ koán ê tsuí-lō͘. Só͘-í Ngô͘-lô-su só͘ iàu-kín chiū-sī pa̍t ji̍t Thó͘-ní-kî ê kiaⁿ-siâⁿ Kun-sū-tàn-teng (Constantinople), oē sio̍k tī Ngô͘-lô-su koán, ǹg-bāng tuì án-ni i ê seng-lí oē khah lāu-jia̍t, i ê tsûn chhut-kháu khah suî-piān.
M̄-kú Tek-kok ia̍h sī ū teh him-bō͘ pa̍t ji̍t oē koán Thó͘-ní-kî ê toē. Só͘-í che jī-cha̍p nî kú i ū ēng chin tsoē khoán ê kè-bô͘ tī Thó͘-ní-kî, he̍k-sī chîⁿ chioh in, he̍k-sī pò͘-lō͘ in ê koaⁿ, lóng sī ǹg-bāng pa̍t ji̍t khah ū ki-hoē thang koán Thó͘-ní-kî ê toē. Chit pái sio-thâi khí-thâu sī in-uī Ò-kok pō-gio̍k Sek-hui-a ài koán in ê kok. Tek-kok ū tsàn-sêng in-uī Tek-kok kap Ò-kok tông-bêng, koh in-uī Sek-kok nā tāi-seng hâng-ho̍k, āu-lâi Tek-kok pa̍t ji̍t teh-beh koán kàu Thó͘-ní-kî ê toē chiū oē khah khoài.
Hit-tia̍p Ngô͘-lô-su chin m̄ kam-goān, kiò Ò-kok m̄ thang kāng Sek-hui-a. Ò-kok m̄ thiaⁿ koh ū tōng-oân kun-peng. Ngô͘-lô-su chiū iû-goân tōng-oân kun-peng. Tek-kok chiū ū pī-pān beh kap Ngô͘-lô-su sio-thâi. Eng-kok hit-tia̍p kiò in tāi-ke tio̍h kóng-hô, tsún tiong-li̍p ê kok tsoè kong-chhin kā in phoàⁿ-toàn. Ngô͘-lô-su Sek-hui-a hoaⁿ-hí, Tek-kok m̄ khéng soà liâm-piⁿ soan-chiàn. án-ni thang tsai Tek-kok khah ū tsoē-koà in-uī khí-thâu pa̍t kok kam-goān chham-siông chiong chit ê saⁿ-chiⁿ ê tāi-chì hō͘ tiong-li̍p ê kok phoàⁿ-toàn. Nā-sī Tek-kok lóng m̄ khéng, khah ài ēng kiông-chè ê hoat-tō͘ ǹg-bāng tuì án-ni oē khah iâⁿ.
Khí-thâu sio-thâi ê sî Ngô͘-lô ū khah iâⁿ. āu-lâi tī kū-nî in-uī khiàm toā phàu chhèng-io̍h kap chhèng-chí chiū ū chi̍t pái toā su. Kūn-lâi in ê phàu kap chhèng-io̍h chhèng-chí ū khah ke-thiⁿ, só͘-í ûn-ûn-á ū khah iâⁿ ê sè-bīn.
