首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 台北基督教會的歷史
台北基督教會的歷史
卷期：第376卷 本次： 日期：1916/7 刊名：台灣教會報 頁數：6-9
篇名：台北基督教會的歷史 [ Tâi-pak Ki-tok Kàu-hoē ê Le̍k-sú ]
作者：
  顯示 : 漢羅 全羅 並列  

台北基督教會的歷史。

(吳威廉寫)。

1916.7，no.376，pp.6-9

  主了後1871年6月14日加拿大長老教會的總會順主耶穌的命令，有擬定著派教師偕睿理去外邦傳耶穌的道理佇毋捌聽道理的人的中間。有定規派伊去中國；不過毋敢講佗一省。

彼年10月19日偕牧師有離開祖家，毋知欲去中國的甚物所在；獨獨有求聖神著替伊設法，日日共伊chhoā路。

同年12月尾伊有到台南的打狗欲揣李牧師。佇台南英吉利長老教會的宣教師有較早來設教，就是主了後1865年馬醫生有到台南報揚基督的道理。閣無偌久李牧師有來鬥幫贊。偕牧師到台南彼年Tek醫生，甘牧師猶原已經佇咧。遮的宣教師真歡喜接納偕牧師。

  1872年3月7日偕牧師佇安平有閣搭船欲來台北。李牧師，Tek醫生有佮伊做堆欲送伊到淡水。

  1872年3月9日in有入淡水港。因為彼日是拜六，in有歇睏到拜一，就三个人有做陣行路欲去巡鯉魚潭，大社佮埔社的教會。巡教會了後in佇大社相辭；李牧師參Tek醫生有轉去台南；偕牧師有轉來淡水。後來偕牧師有學台灣人的腔口，也照伊的氣力順機會用基督的道理教示人。

  1873年2月9日偕牧師佇淡水頭一擺行洗禮。彼日五个少年人有領洗禮，就是嚴清華，22歲，王中水，24歲，林孽，26歲，林杯，42歲，佮吳寬裕31歲。中間四个人已經別世，一个猶活佇咧，就是吳寬裕。四十外年的久伊有熱心傳基督的道理；1915年有告老，猶過有常常順機會去傳基督的道理。

對設教了後成十年的久佇台北教會的中間無機會通起厝做神學的學堂。毋過年年神學的學生有那加添。In有常常佮in的先生偕牧師做陣出外，四界傳報福音真理，紲佇路中，佇路邊，檢采佇拜堂裡，抑是佇客館裡有揣機會研究聖經的道理佮別款的學問。較常in日時讀冊暝時傳道理。

  1882年偕牧師有建築淡水神學堂。建築的金是偕牧師本所在的朋友歡喜題來獻。In彼縣的名叫Oxford，所以所建築的學堂的名號叫Oxford College來記念。

  1883年有建築女學堂。對彼霎算起台北信主的少年人較有得著機會通讀冊。1880年有一个加拿大敬虔的婦人人有獻金愛佇淡水起一間醫館來記念伊的丈夫的名。所以彼年佇淡水有起基督教會的醫館，名叫MacKay Hospital。彼間醫館猶未起，卻已經有設法醫病，毋過無遐利便。對起頭五行的醫生真甘願幫贊。閣再1875年華醫生有到淡水欲醫病，傳基督的道理。可惜因為伊的某死的緣故，就1877年伊有轉去祖家無閣來。

  1884年佮1885年法蘭西有來拍台灣。彼兩年的中間台北的教會有拄著窘逐猶過堅固。彼時偕牧師破病不止傷重。到淡薄較好的時，伊有順醫生的命令搭船去香港，意思是欲隨時閣轉來。總是伊搭的船猶未到香港，法蘭西的戰船有禁港，致到半年久偕牧師袂閣轉來。彼霎台灣的教會無牧師通治理。按呢生偕牧師轉來才想要緊著設本地牧師鬥料理教會。對傳道師的中間眾人有揀嚴清華，陳榮輝來做牧師。1885年5月17日偕牧師有共 in按手設立兩个人做牧師，1898年8月8日陳榮輝別世。1909年6月2日嚴清華別世。1904年10月4日吳牧師，嚴牧師，參台北基督教會的代議長老佇淡水神學校聚集同心敬畏上帝，紲設立台北長老教會的中會。對彼日算起，台灣的基督教會用定著的法度有鬥料理in的教會的代誌。

  1912年10月24日台南教會的中會佮台北教會的中會佇彰化禮拜堂聚集，聯合設立台灣基督長老教會的大會，向望通台灣的教會合做一體，才會設法來利益佇通台灣的教會。

台北教會的中會已經設定著，就隨時募集設立台灣傳道師的中間幾若人做牧師。

  1906年4月3日，佇艋舺禮拜堂中會聚集，設立陳清義做艋舺教會的牧師。

  1906年4月17日，佇新店禮拜堂中會聚集，設立蕭安居做新店教會的牧師。伊有蹛遐到1914年3月就搬來淡水做中學校漢文的先生。

  1907年4月5日，佇淡水禮拜堂中會聚集，設立郭希信做宜蘭廳內的教會的宣教師。現此時伊是大稻埕教會的牧師。

  1907年4月16日，佇大稻埕禮拜堂中會聚集，設立李Jîm-suí做大稻埕教會的牧師。1914年3月9日伊有別世。

  1907年4月30日，佇新竹禮拜堂中會聚集，設立郭春木做新竹教會的牧師。1908年正月23日伊有別世。

  1914年4月5日，佇三角埔禮拜堂中會聚集，設柯安樂做三角埔教會的牧師。

  1914年4月21日，佇新店禮拜堂中會聚集，立郭水龍做新店教會的牧師。

  1914年4月28日，佇水返腳禮拜堂中會聚集，設立葉金木做水返腳教會的牧師。

  1914年5月5日，佇三角湧禮拜堂中會聚集，設立陳清和做三角湧教會的牧師。

現此時牧師以外有31卒業的傳道師咧報揚耶穌的道理。另外有未卒業的傳道師10人咧蹛佇拜堂報揚道理。

  1914年4月，淡水中學校有開校。現時的學場佇淡水舊的神學校。毋過若欲進步，年年加添學生就著較大間。大家的心攏是咧向望將來會得著金通建築新的學校場。

  1915年女士會有建築新的女學校。到1916年四月尾起好。按呢生今年5月1日學生閣再來入新的學校讀冊。同年6月1日學校落成。彼日民政長官閣下，參不止濟的大官有來赴開校。台南的宣教師甘為霖佇台南46年的久報揚基督的道理，亦是有來赴落成式。

佇台北對起頭西國的宣教師較少，偕牧師佇台北30年的久。彼30年的中間西國宣教師同時佇咧第一濟就是兩个nā-tiāⁿ。

西國宣教師，姑娘的名排列佇下底：-

牧師偕睿理到台北的日就是1872年3月9日。伊別世的日是1901年6月2日。

  醫師華雅各到的日是佇1875年；倒去的時是佇1877年；倒去的緣故是因為伊的某別世，亦伊的囡仔已經幾若--个，著chhoā in轉去祖家。

牧師Jūn Khiân-ek到台灣的日是佇1878年；倒去的時是佇1882年；倒去的緣故是因為破病不止傷重。

牧師Lê約翰到的日佇1883年。別世的日佇1891年。

牧師吳威廉到的日是1892年10月22日。

牧師華Toā-ló到的日是佇1902年11月5日；倒去的日是佇1904年8月12日；倒去的緣故是因為伊的某破病。

  醫師宋雅各到的日是1905年11月5日。

牧師約Bí-tàn到的日是1905年11月7日。

牧師劉忠堅到的日是1907年12月2日。

先生偕睿廉到的日是1911年12月2日。

  醫師Gê亞倫到的日是1913年正月14日。

先生羅khiân-ek到的日是1913年10月31日。

姑娘金仁理到的日是1905年11月5日。

姑娘高Hâ-ná到的日是1905年11月5日。

姑娘Lê Má-bí到的時是1910年。

姑娘An Lí-lī到的時1911，2月。

姑娘Lia̍t I-lí到的時1912年。

姑娘Tē Lí-lī-an到的日是1915年。

按呢生現此時西國的宣教師參in的某攏共14个人；姑娘現時6个人。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461