論奧國
1916.8，no.377，pp.5
佇歐羅巴洲遮的有勢力的國奧國對真早算不止要緊的國。較早奧國比德國較有力。佇主後1866年德國有佮奧國相刣。德國代先備辦相刣逐項真工夫。相刣六禮拜的久就德國較贏，奧國著降服。對彼霎到今德國比奧國較有力。
奧國的百姓有幾若个種類。有的德國種，有的俄羅斯種，有的以大利種，有的Sek-hui-a種，亦有別的種類。對按呢奧國常常拄著擾亂的事，因為有遐濟的種類；有的常常相怨妒。德國種類怨妒俄羅種類--的，以大利種類怨妒德國種類--的等等，致到予官府真僫得辦國家的事。奧國現今的皇帝已經有坐位68年的久。伊坐位遐久，伊的百姓真尊敬伊，較甘願降服。驚了別日皇帝若死，別的皇帝接紲，就百姓較毋甘願降服，較會生起擾亂。
這擺佇歐羅巴州大相刣彼个原因是奧國佮Sek-hui-a毋好。有一个Sek-hui-a的人刣死奧國的皇太子。奧國因為這个代誌愛插Sek-hui-a國家的事，Sek-hui-a毋降服，講伊是獨立的國，別國未使得插伊的代誌。奧國就宣戰佮伊相刣。奧國彼霎講伊無愛佔Sek-hui-a的地。毋過奧國愛強強插Sek-hui-a國家的事，Sek-hui-a看做佔in的地的頭一步。所以Sek-hui-a求俄羅著來保護。俄羅就備辦動員的兵，紲請奧國著較寬的法度辦Sek-hui-a。彼霎德國有插，叫俄羅毋通備辦動員兵。俄羅毋趁伊的命令，德國就宣戰。閣無偌久法國佮英國有相參佮伊交戰。
奧國這擺相刣有拄著真濟的艱苦。佇東爿俄羅兩擺有深入伊的地，現時俄羅那進，奧國那退。佇西爿以大利有深入伊的地，現時亦是那咧進前。 |
