Kè-chhoā ê Sū.

1916. 8, no. 377, pp. 5

  Tâi-oân Pak-pō͘ Tiong-hoē ū koat-tēng kàu-hoē m̄ thang kap kàu-hoē goā ê lâng saⁿ kè-chhoā. M̄-kú kàu-hoē ta̍k só͘-tsāi bô loā-tsoē, boē-tit tú-hó, beh kè ê lâng m̄ tsai beh chhoā-ê tī tó-uī? Tuì án-ni chèng Thoân-tō-su ū put-chí teh khoà-jū[sic.] tio̍h tsáiⁿ-iūⁿ lâi siat-hoat, chiah oē oân-boán thang hō͘ kàu-hoē tuì kàu-hoē saⁿ phoè-hun. Só͘-í Tâi-pak Thoân-tō-hoē ū pín Tiong-hoē tsún Tâi-pak Thoân-tō-hoē kéng chi̍t lâng lâi tam-tng hit tsân sū.

  Taⁿ ū tit-tio̍h Tiong-hoē ê ún-tsún soà Tâi-pak ê Thoân-tō-hoē ū kéng goá lâi tsoè thong-ti-chiá. ǹg-bāng chèng Thoân-kàu-su í-ki̍p chèng hiaⁿ-chí nā ū beh chhoā, beh kè-ê, chiū kín pò goá tsai, goá chiū oē thoè lín thong-ti siong-tong ê lâng. Sūn-pit chhéng-an.

  Tân Chhun-seng,

  Thô-hn̂g Lé-pài-tn̂g.