除譴損。
1916.9，no.378，pp.4
佇太平洋就是日本到美國差不多半路有幾若个海島，叫做Pò͘-oa (Hawaii)。攏共有15个海嶼，從中有人徛起--的8个。近來台灣作穡人所插的改良蔗較濟攏對遐來。佇1898年美國佔遐的海嶼了後做美國的屬地，總是早年in有家己的王咧該管。
佇遐的海嶼的中間有天下萬國第一大猶咧出火的火山。彼个火山叫做Ki-láu-iâ。百姓有大譴損，拍算in所服侍彼个出名的女神Pi-lī，tiàm佇火山的空內。彼个火山，Ki-láu-iâ，佮女神，Pi-lī，算是眾百姓受把縛大譴損e根源。
佇19世紀的頂半葉有一个女王，名叫Ka-pió-la-ni̍h，咧該管遐的海嶼。伊原本予譴損大把縛，食酒以及趁逐項的歹風俗。差不多佇1820年宣教師去遐傳基督的福音。女王聽了道理，也了後常常大出力欲予伊的百姓脫離譴損佮歹風俗。
伊決斷欲攻擊in的女神Pi-lī的權柄，就佇1825年有步行25舖的路途去到彼个出名的火山。平常時人若peh上彼山頂實在通大驚惶，因為出火，火薰佮琉磺，所以有將豆仔做祭物獻予女神，才向望免受害。毋過Ka-pió-la-ni̍h決斷毋獻禮物，總是伊攏無代誌。對按呢生彼个好膽熱心信主的女王大大幫贊伊的百姓，脫離魔鬼的手頭。所以in常常咧數念伊。到1841年伊過身得著盡忠旅途的大賞。 |
