首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 神(上帝)佮囝
神(上帝)佮囝
卷期：第378卷 本次： 日期：1916/9 刊名：台灣教會報 頁數：5-7
篇名：神(上帝)佮囝 [ Sîn (Siōng-tè) kap kiáⁿ ]
作者：陳清忠 Tân Chheng-tiong
  顯示 : 漢羅 全羅 並列  

神(上帝)佮囝。

(陳清忠記的。)

1916.9，no.378，pp.5-7

聖句。「恁遮的信基督耶穌，攏總做上帝的囝 (加拉太3：26)。

有時有一款的意思佇咧，就是世間人攏總是上帝的囝，無論有信基督抑是無信基督，平平是受上帝創造，受上帝的養育，不管有孝抑是不孝攏是囝。雖然是按呢，總是保羅佇這个所在共加拉太的人講-的，毋是干焦這款一般的意思是一款特別的意思佇咧，就是講，「恁遮的信基督耶穌，攏總做上帝的囝」，就是對信靠來做上帝的囝。佇約翰一書3章10節，約翰有講，「無行好，無相疼的人，毋是對上帝出」。按呢共伊想--起-來，就是佇世間有的毋是上帝的囝的意思佇咧。保羅寄批予羅馬的教會也有講，「凡若予上帝的神引chhoā的，是做上帝的囝。今了後，恁毋是親像奴僕得著驚惶的心；所得著--的是行的心，求叫講，阿爸爸啊。就是上帝的聖神踮咱的心干證咱做上帝的囝」(羅馬8：14-16)。所以凡若信基督的人有這款特別的權，會得通叫佇天裡的上帝做爸。這款的信仰予咱大家通知佇這款特別的意思通稱做上帝的囝。所以佇行洗禮的時祈禱講，「慈悲無窮盡的上帝啊！求你予遮的人對佇聖神來得著重頭生，也感謝你歡喜監納遮的人做你的囝兒，也做你的教會的柱石」，也苦勸受洗的人講，「恁遮的對佇信基督耶穌會得通做上帝榮光的囝，所以著謹慎毋通悖謬恁所信的，著常常行親像榮光的囝的款。

咱大家受聖神的幫贊，已經做上帝的囝。若是按呢咱按怎樣會得通做上帝的囝，也按怎樣會得通久證據咱實在是上帝的囝，也上帝對咱遮的囝有甚物款的要求；親像這款的要求；親像這款的問題咱應該著來相佮想相佮研究。

  1. 萬事的代先咱著有彼款確實未變動的自覺心，就是咱真實是上帝的囝，這款的信仰若無深，的確無路用。對爸母來出世，對爸母來愛育的囝，的確無僥疑本身毋知真實是爸母的囝抑毋是，這是自明的理，毋免要求甚物證據。咱大家的確著有這款的信仰來服侍上帝，這款的信仰是單純，是堅實的信仰。

  2. 咱既然信佇天裡的上帝是咱的爸，的確無彼款理氣閣信有別的親切的叔抑是親堂兄弟，總是的確無想講有別的第二的老爸，爸是干焦一个，也信伊是第一親切--的。咱大家對天裡的爸猶原的確著有相同的信仰。「一人袂會服侍兩个主人」，這句有包含一人袂會信有兩个爸的意思佇咧。

  3. 咱毋但干焦有彼款的信仰講上帝是咱的爸，也著倚靠伊。咱若有欠用甚物物對伊求，拄著驚惶的事走去求爸的安慰。若拄著僫的問題未得通了解，走去求爸來得著彼个解答；這是做囝的人倚靠爸的款式。咱對上帝的確著有彼款相同的心得。上帝是咱避難的所在是咱的慰安者，咧欲鑒觀接納咱的所求，咧欲賞賜咱彼个難問的解答；無論甚物時倚靠伊，伊無欲趕逐咱。

  4. 閣一項就是咱既然信上帝做爸，也倚靠伊；咱做囝的人應該著盡咱的孝。世上雖罔講「家貧，出孝子」，這不過是干焦人的事nā-tiāⁿ。佇上帝的厝無波難，無變調，就是盡孝佇完全無欠缺的爸。咱應該著盡的孝道的要點就是佇歸榮光佇上帝。東洋的教示有講，「現爸母的名是孝的路尾」。咱顯出上帝的榮光是孝的起頭佮路尾。世間無比這款的孝道較好。基督猶原捌共伊的學生。「著照恁的光佇眾人的面前，就眾人看見恁的好行為來歸榮光服侍上帝。」

  今咱大家已經明白上帝是咱的爸，咱是上帝的囝，向望咱無貧惰來盡咱的孝，這是咱信主的人的本份。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461