歐洲戰爭。
(偕叡廉記)。
1916.9，no.378，pp.7
歐洲開戰到這霎已經兩年久。彼時德國佮奧國同盟，然後閣加添兩國倚in，就是土耳其佮Bu̍t-gâ-lī。這4國大出力來攻擊聯合軍。對按呢法國，白耳義，俄羅佮Sek-hui-a的土地予in佔不止濟。起頭德國佮奧國的兵馬，以及銃，炮子真充足，所以in常常贏。舊年俄羅大失敗，予德國佮奧國拍真忝。In會輸到按呢是因為銃子無夠額。彼時有人拍算聯合軍的確輸。總是佇今年的中間俄羅的炮子對美國，英國，日本買真濟。閣再英國以前兵少，是幾十萬nā-tiāⁿ，今已經操練到五百萬便便。對按呢聯合軍的氣力真大加添。本咱若讀新聞較常攏是聽德國咧拍法國，英國，抑是俄羅。今反轉這幾月日是聯合軍咧拍德國，奧國抑是土耳其。佇東爿俄羅大得勝，奧國佮德國的兵予伊掠50外萬。土地閣予伊佔。這幫奧國的氣力親像咧欲盡啦！In毋但佇東爿予俄羅拍遐傷重，就佇西爿in也予以大利拍真忝。伊第一勇的砲台紲予以大利佔去。
英國佮法國也大贏，直直咧進。聯合軍這霎對四圍咧拍，攏無停。英，法，俄羅，以大利這幫拍了真有勢面。對這時以後照看聯合軍會漸漸贏。因為開戰的時聯合軍兵馬，銃佮炮子較少，今較濟，水戰氣力亦較大，國也較富。到尾未免得較贏。 |
