澎湖的消息。
1916. 9，no. 378，pp. 9-10
西曆6月29日大學放假的時，阮有兩人相伴過去澎湖。論彼爿教會的消息，卻是平常。論佈道的消息，卻有所在真好有所在是平常。阮這幫有去東吉，佇遐的機會照看實在袂bái。阮佇遐頭尾10日久，逐暝昏有好機會通佈道。平均扯逐暝昏有70外來致意聽，不止靜。日時有幾若个婦人人致意學字母。實在彼搭的人較有宗教，心愛講究到明白。佇遐甘願去邪歸正的人差不多有20外人。In雖然無拜堂，猶過逐禮拜攏有聚集佇林Chong-kun的厝。阮佇遐的時禮拜日倚100人聚集，大家攏致意聽真靜，實在真通歡喜。
也其餘的所在親像西嶼，頂山，抑是媽宮，這幾若所在是因為較濟人出外來台灣趁食，所以較無啥人踮厝。對這个因端機會就較平常。今年佇這爿非常的熱；聽見講今年拄拄半年久攏無雨水：對這个因端才遐熱。彼搭所種的五穀，就是蘆黍，蕃藷，塗豆攏予日曝死，無收半粒。遐的人對按呢就生活上不止困難，會趁錢的人所以過來台灣趁食。實在真可憐，大向望列位看報諸君，祈禱的中間也相數念佇遐徛起的百姓是心所願。
詹振興。 |
