Tsâi-thoân Hoat-jîn.
1916. 10, no. 379, pp. 5
Tī 1913 nî 12 ge̍h 2 ji̍t pak-pō͘ ê Tiong-hoē ū tsū-chi̍p Lîm-sî-hoē lâi gí-tiāⁿ tio̍h siat tsâi-thoân hoat-jîn ê sū, tuì tsóng-tok ji̍p-pín, tsóng-sī tán chin kú lóng bē-tit thang hó-sè. Kàu kū-nî 10 ge̍h khí Thoân-tō-kio̍k ū chhiáⁿ Gâm-kî Sian-siⁿ tsoè Thoân-tō-kio̍k ê sio̍k-thok, lâi tàu pang-tsān só͘ ū kan-sia̍p tī chèng-hú hit hong-bīn ê sū. Tuì án-ni soà chiong chit ê tsâi-thoân hoat-jîn ê tāi-chì kau-tāi i lâi tàu siat-hoat. I put-chí chhut-la̍t lâi tàu pang-tsān. Kui-chek ū 20 tiâu, ia̍h ū kan-sia̍p tī lán kàu-hoē ê hiàn-hoat. Tāi-ke ū ēng put-chí tsoē-kang, taⁿ í-keng hó-sè lah. Ū tit-tio̍h Tsóng-tok ê ún-tsún, tī 7 ge̍h 5 ji̍t hú-khó í-keng chhut-lâi. Tâi-oân lâng tit-tio̍h tsâi-thoân hoat-jîn ê hú-khó, chit-ê sī thâu chi̍t-ê. Lán kàu-hoē ū chit ê tsâi-thoân hoat-jîn, chin thang hoaⁿ-hí, in-uī ū nn̄g hāng ê toā lō͘-ēng:
1. Hō͘ chèng-hú kap chèng lâng sêng-jīn lán ū thoân-thé ê tsū[sic.]-keh.
2. Pó-hō͘ kàu-hoē ê tsâi-sán. án-ni tek-khak chin toā iàu-kín.
Taⁿ lūn chit ê tsâi-thoân hoat-jîn ê bêng-chheng, kap Sū-bū-só͘, í-ki̍p Lí-sū ê sìⁿ-miâ, siá tī ē-toé:
1. Bêng-chheng, chiū-sī chheng tsoè "Tsâi-thoân hoat-jîn Pak-pō͘ Tâi-oân Ki-tok Tiúⁿ-ló Kàu-hoē".
2. Sū-bū-só͘, chiū-sī tī Tâi-pak Báng-kah Poeh-kah-tsng 47 hoan-hō͘ (Lé-pài-tn̂g).
3. Lí-sū ê sìⁿ-miâ, chiū-sī Tân Chheng-gī, Koa Î-su, Keh Hi-sìn, Siau An-ki.
Tuì hú-khó chhut liáu-āu chiū suî-sî khui Lí-sū-hoē, ū kóng[sic.]-kú Tân Chheng-gī tsoè Lí-sū-tiúⁿ lâi pān-lí tsâi-thoân hoat-jîn ê sū-bū. Tuì án-ni ti̍t-ti̍t chìn-hêng siat-hoat teng-kì pài-tn̂g toē, í-keng ū 9 uī chheng-chhó; ǹg-bāng koh kuí-nā ge̍h ji̍t oē tit thang lóng chheng-chhó. Chhiáⁿ Pak-pō͘ koán-lāi ê kàu-hoē, nā ū pài-tn̂g ê jī-tsoá, iáu-bē kià lâi, tio̍h koáⁿ-kín kià lâi, goá oē siá ta̍k hāng piān-piān kià hō͘ lín teng-kì.
