Sí lâng bô chhin.
1916. 10, no. 379, pp. 5-6
Sio̍k-chêng ê lâng teh hiâm ji̍p-kàu ê lâng put-hàu, sí bô hàu tsó͘-tsong. Taⁿ ēng in teh khoán-thāi sí-lâng ê hoat, pâi kuí hāng tī ē-toé.
1. Nā sí-lo̍h ta̍k hāng khiàm, tio̍h ēng chîⁿ boé tsuí soé seng-khu, ēng gûn-tsoá boé-lō͘ chiah oē tit kè, ēng hé-pé chhiō-lō͘ chiah kiâⁿ ū lō͘, suî-sî tio̍h tsú chi̍t oáⁿ kha-bé-pn̄g, chi̍t lia̍p nn̄g, beh hō͘ i chia̍h, chiah ū la̍t thang kè Bông-hûn-soaⁿ, koh pī-pān chi̍t niá kè-soaⁿ-khò͘, toé khò͘ chîⁿ, beh khì hêng chêng siⁿ-sí só͘ khiàm-ê. án-ni lâi siūⁿ si̍t-tsāi sī khiàm-kheh.
2. Saⁿ-sî. Pī-pān tsa̍p-jī oáⁿ kā i saⁿ-sî, āu-lâi suî-sî lo̍h koan-chhâ. Hit-sî ēng chi̍t phoè moâ uî tī koan-chhâ kiⁿ, só͘ ū ê chhin lâng lâi khan hit phoè moâ, chiū hō͘ tō-sū lâi ēng to koat-tn̄g, ēng chi̍t liām hûn-chháu lâi tsām-thâu, ì-sù sī tsám-chháu tn̄g-kun, koah-khau tn̄g lī-lī, bô oan-kuí lâi kau tîⁿ. Koh ēng chi̍t lia̍p se̍k ê nn̄g, chi̍t tè chio̍h-thâu, chi̍t koá tāu-pô͘ tī sí lâng ê chhiú, hoan-hù i kóng, tio̍h thèng-hāu nn̄g chhut kiáⁿ, chio̍h-thâu noā, tāu-pô͘ chhut-gê, chiah thang lâi kìⁿ bó͘-kiáⁿ, chhin-lâng. Koh hoan-hù sí tio̍h kui-sim khì, m̄ thang lâi, kiaⁿ toā kiaⁿ soè. án-ni sī kú-tn̂g bô bāng saⁿ-kìⁿ, m̄-kú ké hó-sim kàu bōng beh tâi ê sî, chiū kā i kiò khí-lâi, saⁿ-ji̍t kā i ín-hûn tò-lâi, si̍t sī ū mâu-tún.
3. Khoán-thāi sí lâng. Sí tī bîn-chhn̂g hàu saⁿ-tǹg, tī mn̂g-kháu kàu koan-chhâ-thâu ti-thâu ngó͘-seng, lé-mi̍h chin-tsoē. Tâi liáu ín-hûn tò-lâi an-lêng chiū hàu nn̄g-tǹg, sī tsá àm nā-tiāⁿ, ū-ê hó miā ū hàu ge̍h-goā-ji̍t, ū-ê tsa̍p-goā ji̍t, āu-lâi chiū tû-pn̄g chhia-lêng. Hit-sî pī-pān nn̄g pé chhâ, nn̄g tē-á bê, tām-po̍h iâm, nn̄g sian toh-thâu-kán hō͘ i tsoè chhe-ēng kā i kóng, "Taⁿ ta̍k hāng kā lí chhoân-piān, tio̍h khì ka-kī chia̍h", chiū chhiáⁿ tō-sū ēng pháiⁿ siaⁿ-sàu lâi koáⁿ, the̍h-khì goā-bīn hìⁿ-sak. āu-lâi chiū tiau sîn-pâi chhāi tī thiaⁿ-thâu lâi hàu, hit-sî sī hàu chhoe-it tsa̍p-gō͘ nā-tiāⁿ. Kàu thǹg-hà liáu-āu tsoè sin-kī chin chhe-chhau, í-āu chiū chi̍t nî tsoè kī chi̍t pái nā-tiāⁿ. Koh tsoè lāu-pē ê kī khah tì-ì, a-kong khah chhìn-chhái, ná téng-tāi ná soe, kàu kuí-nā tāi chiū boē-kì-tit, sui ū tsó͘-biō iā-sī it-jī-tsa̍p tāi nā-tiāⁿ. án-ni lâi siūⁿ sī ke̍k bô chhin. Koh kā i chhiáⁿ ji̍p-lâi, pháiⁿ siaⁿ-sàu kā i sàng chhut-khì, chhin-chhiūⁿ ēng tsó͘-kong tsoè sim-sek sū, án-ni iú hàu m̄ tsai tī tah-lo̍h.
4. Tap pē-bú un. Pē-bú nā ū lâu ke-gia̍p chiū kā i chhiàⁿ hê-siūⁿ, chhiāu[sic.]-tō͘, sio khò͘-chîⁿ, kô͘-lêng-chhù, hûn-sin lô͘-tsâi tsa-bó͘-kán, hō͘ i kàu-gia̍h ēng. Ta̍k hāng pī-pān hó, chiū ū hê-siūⁿ lâi chhiau-tō͘ liām-keng, khui hûn-lō͘, phah tē-ge̍k mn̂g, thiau-keng, phah tē bóng, hàu-lâm, tāi-ke chiah lâi toā chhiò, iā siá chhù-khoè hō͘ tsó͘-kong, só͘-siá ê kài-chí lóng saⁿ-tâng. āu-lâi tsoè chheng-chhó chiū kng-chhù khì sio, beh sio ê sî chiū the̍h âng-pau chhiàⁿ kô͘-tsoá sai-hū só toā mn̂g kiaⁿ in tsó͘-kong tsáu-chhut-lâi; hit sî chiū sio kàu pìⁿ hé-hu. án-ni lâi siūⁿ pàng-hé thâi-lâng m̄-tsai sím-mi̍h tsoē?
Chiàu kong-lē lâi siūⁿ, tuì siⁿ-chêng m̄-bat chin-tsú, sí chiū chhē bô uī. Koh í-keng kiaⁿ kàu án-ni saⁿ-sî lī-lī m̄-káⁿ saⁿ-kìⁿ, teh hàu ū sím-mi̍h lī-ek? Sui-jiân teh hàu ná-tsún lâng teh koé a-phiàn-hun, ná liám ná kiám, āu-lâi chiū lut-khì. Koh só͘ siá ê chhù-jī nā ū-iáⁿ put-sî tī im-kan tio̍h saⁿ-kò, in-uī saⁿ-chiⁿ koán gia̍p-sán.
Goá ū kán-kán siá kuí jī lâi chham-khó siūⁿ-bāi, sī tio̍h pài Siōng-tè lâi hàu oa̍h, á-sī tio̍h thàn sè-sio̍k lâi hàu sí? Ta̍h-lo̍h chi̍t hāng khah iú-hàu mah?
