Ka-ná-tāi Kàu-hoē.

1916. 10, no. 379, pp. 7

  Ka-ná-tāi tiúⁿ-ló kàu-hoē ū 8 ê sîn-ha̍k-hāu, sì chheng keng pài-tn̂g. To̍k-li̍p kàu-hoē ê pài-tn̂g ū nn̄g chheng sì pah keng. Ū oá nn̄g chheng ê Bo̍k-su, ia̍h ū chi̍t bān chi̍t chheng ê tiúⁿ-ló. Tiúⁿ-ló-kàu ê hoē-iú tsóng-sǹg ū tsa̍p peh bān ke, chheng-khì miâ ê hoē-iú saⁿ-tsa̍p-saⁿ bān saⁿ chheng. Tsú-ji̍t-o̍h ê ha̍k-seng tāi-khài ū saⁿ-tsa̍p bān. Ū chhit-tsa̍p-la̍k ê Tiong-hoē, poeh ê Tāi-hoē, chi̍t ê Tsóng-hoē. Kū-nî Pó͘-tsō͘-hoē, Tsû-siān-hoē kap Soan-tō-hoē ê iân-hāng tāi-khài ū 113 bān kho͘ gûn. Kin-nî Tsóng-hoē ū gī-tiāⁿ tio̍h kap Ka-ná-tāi ê Bî-î-bî-hoē (Methodist) kap Tso͘-ha̍p-hoē (Congregational) liân-ha̍p. Si̍t-hêng ê sî-tsūn sī Au-lô-pa chiu sio-thâi ê sū soah ê sî chiah sǹg khí. Bî-î-bî-hoē kap Tso͘-ha̍p-hoē í-keng ū gī-tiāⁿ ài liân-ha̍p. Saⁿ hoē liân-ha̍p liáu-āu, chiū miâ oē hō-tsoè "Ka-ná-tāi Liân-ha̍p ê Kàu-hoē". Bî-î-bî hoē ê jîn-sò͘ kap Tiúⁿ-ló-hoē ê jîn-sò͘ tāi-khài ū pîⁿ-tsoē, Tso͘-ha̍p kàu-hoē ū khah chió. Saⁿ ê kàu-hoē nā saⁿ liân-ha̍p chiū in ê tsóng-sò͘ oē tāi-khài nn̄g pah bān lâng.