歐洲戰事。
1916.10，no.379，pp.10
對七月1號起到9月15號止英法佇西戰線有大贏德國。有搶260枝的大銃，600枝的機關銃，也掠著5,5000名兵。論俄佇東戰線對德奧所搶的銃佮所掠著的兵比佇西戰線閣較濟。這馬德國皇帝的孫(就是早前英國女王I-to-lī-a的乾仔孫)有戰死。兩年前I-to-lī-a也有一个乾仔孫猶原戰死。
現時希臘國不止混雜。In的王就是德國皇帝的妹婿，自然毋愛拍德國，總是希臘國的百姓較濟愛倚聯合國。對按呢真混雜。
近來德國的潛航艇猶原有拍沉英，法佮中立國的商船。有一日佇英，法的海峽有拍沉8隻，也siāng彼日佇地中海有拍沉4隻。
Au-chiu Chiàn-sū.
1916. 10, no. 379, pp. 10
Tuì chhit goe̍h 1 hō khí kàu 9 goe̍h 15 hō chí Eng Hoat tī sai chiàn-soàⁿ ū toā iâⁿ Tek-kok. Ū chhiúⁿ 260 ki ê toa[sic.] chhèng, 600 ki ê ki-koàn[sic.] chhèng, iā lia̍h-tio̍h 5,5000 miâ peng. Lūn Ngô͘ tī tang chiàn-soàⁿ tuì Tek-Ò só͘ chhiúⁿ ê chhèng kap só͘ lia̍h-tio̍h ê peng pí tī sai chiàn-soàⁿ koh khah chē. Chit moá Tek-kok Hông-tè ê sun (chiū-sī chá-chêng Eng-kok Lú-ông I-to-lī-a ê ka-ná-sun) ū chiàn-sí. Nn̄g nî chêng I-to-lī-a iā ū chi̍t ê ka-ná-sun iû-goân chiàn-sí.
Hiān-sî Hi-lia̍p-kok put-chí hūn-cha̍p. In ê ông chiū-sī Tek-kok Hông-tè ê moē-sài, chū-jiân m̄ ài phah Tek-kok, chóng-sī Hi-lia̍p-kok ê peh-sìⁿ khah chē ài oá Liân-ha̍p-kok. Tuì án-ni chin hūn-cha̍p.
Kīn-lâi Tek-kok ê chiam[sic.]-hong[sic.]-théng iû-goân ū phah-tîm Eng, Hoat kap Tiong-li̍p kok ê siong-chûn. Ū chi̍t ji̍t tī Eng, Hoat ê Hái-kiap ū phah-tîm 8 chiah, iā siāng hit ji̍t tī Tē-tiong hái ū phah-tîm 4 chiah.
