Chhit nî ê Kì-liām.
1916. 11, no. 380, pp. 6-7
Kū-le̍k 8 ge̍h 15 àm Tāi-kah ê hoē-iú chū-chi̍p khui siat-kàu chhit chiu-liân kì-liām-hoē. Chit pái sī tē 6 hoê. Tī 6 nî chêng poeh ge̍h 15 àm N̂g Kun Bo̍k-châi kap Lîm Ki-chó Tiúⁿ-ló, Chiong A-muí thoân-tō goā saⁿ lâng chū-chi̍p tī soaⁿ-téng siúⁿ-ge̍h, siūⁿ-tio̍h Tāi-kah í-keng siat-kàu chi̍t nî, chiū tī hia choè kì-liām. Hit sî kàu taⁿ ta̍k nî ū chio-chi̍p cha̍p goā lâng tī chip-chēng ê só͘-chāi choè kì-liām-hoē. Kin-nî tāi-ke gī-lūn tio̍h tī pài-tn̂g chū-chi̍p hō͘ chèng lâng lâi hù. Hit àm poeh cha̍p goā lâng lâi chū-chi̍p kèng-pài Siōng-tè. Tāi-ke toā hoaⁿ-hí kám-siā Siōng-tè thiàⁿ Tāi-kah ê peh-sìⁿ. Chóng-sī siat-kàu bē kú, koh bô hui-siông ê sū thang kóng. Chit-tia̍p lio̍h-á kóng Siōng-tè ê thiàⁿ-thàng:－
Tāi-kah sī tī Tāi-an-khoe kap Tāi-kah-khoe ê tiong-kan, lī āu-lí-chng thih-lō͘ phò͘-chhit. Bē ū gō͘ hun chhia ê sî sǹg sī kau-thong tē it put-piān ê só͘-chāi. Koh tī Lâm-pak kàu-hoē kau-kài ê tiong-ng, 1909 nî chêng hán-tit thoân-kàu-su kàu chia kóng tō-lí. Sǹg-lâi sī lâng khoàⁿ bî-hiān ê só͘-chāi, kai-chài Siōng-tè khoàⁿ-tio̍h, 1903 nî hō͘ Lâm-pō͘ ê hoē-iú kàu chia, ín-chhoā En̂g-seng hiaⁿ bat Siōng-tè, bô kú ke 4 ê lâng. Chit kuí-nā lâng chin jia̍t-sim khì chi̍t nn̄g phò͘ lō͘ ê pài-tn̂g lé-pài, ài chhéng-kiû thoân-tō, boē tit-tio̍h, Lō͘-bé kàu Sam-chhe-hô lé-pài, chhiáⁿ Chiong A-muí thoân-tō lâi chia pò͘-tō. 1909 nî Pak-pō͘ Tiong-hoē phài Chiong A-muí thoân-tō kàu Tāi-kah. Chèng-lâng chīn la̍t kiû Siōng-tè tio̍h hō͘ ū sìn-tek châi-tiāu ê lâng lâi sìn Chú, thang tàu kó͘-bú siat pài-tn̂g. Liâm-piⁿ tit-tio̍h Tân Ki-siông, Lîm Ki-chó jī uī Sian-siⁿ goā kuí-nā lâng chin jia̍t-sim chhut-la̍t kó͘-bú sè pài-tn̂g, ín-chhoā tsoē-tsoē lâng. 1910 nî 4 ge̍h 3 hō thâu-pái kiâⁿ soé-lé hō͘ 14 lâng. 1912 nî 8 ge̍h 11 ji̍t siat nn̄g ê tiúⁿ-ló, 12 ji̍t siat saⁿ ê chip-sū. Tī sè ê chhù bē chi̍t nî chiū kó͘-bú boé toē khí pài-tn̂g. Tī 1912 nî 3 ge̍h 12 hō pài-tn̂g lo̍k-sêng; hit-sî sǹg sī pak-pō͘ tē-it toā keng ê. Tú-á teh hoaⁿ-hí pài-tn̂g tó chiâⁿ poàⁿ, hū-sio̍k ê chhù tó nn̄g pái, tāi-ke tuì án-ni sit-chì. Kai-tsài hó sim ê lâng lâi koh siu-lí. Kè kuí-nā nî sim chin an-uì, m̄-kú tī pài-tn̂g ê sî ū lâng ê seng-khu kan-khó͘, bô lâng thang pang-tsān, chiū chin him-bō͘ ài tit-tio̍h kàu-hoē ê i-seng, suî-sî chiū ū. 1914 nî 2 ge̍h Phîⁿ Chheng-khò Sian-siⁿ kàu Tāi-kah khai-gia̍p, tuì chèng-lâng chin chhin-chhiat, kiám siu hoē-iú sì-hūn-chi̍t ê io̍h-kim. Só͘-siu sì-hūn-saⁿ kap chín-toàn-liāu, óng-chín-liāu tsoân-pō͘ hiàn tsoè kàu-hoē ê lō͘-ēng, koh lēng-goā tiāⁿ-tio̍h tàu chhut Thoân-tō sin-kim kap tsa̍p-huì. Sǹg chèng-lâng só͘ kiû ū tit-tio̍h. Chí chhit nî lâm, lú 20 lâng khì kàu-hoē o̍h-tn̂g tha̍k-chheh. Kin-nî gō͘ lâng chhut-lâi tsoè Thoân-tō Sian-siⁿ. Tuì án-ni khoàⁿ-khí-lâi Siōng-tè thiàⁿ Tāi-kah lâng siông-siông siúⁿ-sù ki̍p-sî ê un-tián.
(Tiuⁿ Kim-pho kì.)
