Thāi Sin-si Hong-sio̍k
(Tân Thiam-ōng kì).
1916. 12, no. 381, pp. 6-7
Chêng ū siá kuí-jī ìn tī Kàu-hoē-pò sī kán-kán nā-tiāⁿ, (Khoàⁿ 10 ge̍h 5 bīn). Ū lâng ài chai khah siông-sè, só͘-í koh pī-pān lâi chham-khó. Goá sī tuì soè-hàn sī-toā lâng tit-tio̍h tō-lí, bô siáⁿ chai-iáⁿ, sī chhéng-kàu kuí-nā ê lāu-lâng khah chai. Ta̍k só͘-chāi ê bô saⁿ-tâng. Taⁿ só͘ siá-ê nā ū chhò, á-sī bô kàu-gia̍h, chhiáⁿ saⁿ chí-sī iā siá lâi pó͘-chiok. Sui-sī kū-ê lán bô ēng iā sī ū lī-ek. Chi̍t hāng thang chai bô sìn tō-lí ê kan-khó͘; koh chi̍t hāng thang chai in ê sit-bê, soà ēng in sit-bê ê só͘-chāi pò in chai, hō͘ in chai m̄ tio̍h kan-khó͘, lâi hoán-hoé koé-pìⁿ.
Lâng bē sí ū seng pī-pān hoan-hù I ê kiáⁿ-sun tio̍h kā I khui hûn-lō͘, á-sī khui hé-kng, chiū-sī chhiau-tō͘ choè kong-tek. án-ni khoàⁿ i, sio̍k-jîn khuì-tn̄g ta̍k hāng khiàm, koh īⁿ-toan, khiàn-sńg, kiaⁿ-hiâⁿ kóng boē liáu. Sí-lo̍h kín ēng chi̍t tè chio̍h-thâu hō͘ I choè chím-thâu, ì-sù kóng oē pó-pì kiáⁿ-sun thâu-khak tēng, iā kā I kóng, "Chêng sī phoà-pīⁿ, taⁿ lóng ióng-kiāⁿ khì kìⁿ kong, kìⁿ má kìⁿ chhin-lâng." Chiū pī-pān chi̍t oáⁿ kha-bé-pn̄g, chiam-chiam, chi̍t lia̍p nn̄g chai tī tiong-ng, chhah chi̍t siang tī, sio-hiuⁿ kā I ho͘-chhiáⁿ tio̍h lâi kàm-la̍p. Chia̍h pá-pá ū la̍t thang kiâⁿ-lō͘, keng-kè Bông-hûn-soaⁿ kā I kóng, "Bông-hûn soaⁿ-lō͘ chin pháiⁿ kiâⁿ, lí tio̍h sió-sim." iā sio kha-bé-choá sī beh hō͘ I choè lō͘-huì, koh tiám chi̍t ki teng-hé tī sin-piⁿ, beh hō͘ I chhiō-kng. Hit sî muí-ji̍t hàu saⁿ tǹg, ēng nn̄g ê chîⁿ kat saⁿ-liân choè poe-chîⁿ, nā ho͘-chhiáⁿ ū poa̍h-poe, nā chi̍t ê chhiò, chi̍t ê khap sī ún-poe ū hoaⁿ-hí.
Tio̍h khit chuí kā sí lâng soé seng-khu. Hit sî chèng hàu-lâm, hàu-lú chhēng moâ toē (Ū lâng sī tà sí-lâng péng-sî chhēng ê saⁿ) ai-khàu kàu chuí-piⁿ kuī-lo̍h ho͘-chhiáⁿ sio hiuⁿ sio gûn-choá beh kā chuí-kong, chuí-pô boé chuí, ēng nn̄g ê chîⁿ kat âng-soàⁿ hiat-lo̍h chuí, chiū ēng sin ê khaⁿ hiòng chuí-bé iúⁿ-chuí. In kóng chuí sio̍k chuí-koaⁿ, chuí-sîn chiáng-koán bô boé bô thang ēng. āu-lâi ai-khàu tò-tńg, chiū ēng chi̍t tè sin pò͘ ùn-chuí, tuì chêng soé saⁿ ē, āu soé sì ē, ì-sù sī kóng chêng saⁿ, āu sì, hó pháiⁿ kui lí ka-kī, chiū-sī chêng ê hó pháiⁿ sí lâng chīn kui-khì. iā kā I thì-thâu, chhēng oê, chhēng be̍h hó-sè, tì bō tiuⁿ-chhēng, ū lâng chhēng gō͘ têng, chhit têng, cha̍p-it têng, ēng sí-lâng beh chhēng ê goā saⁿ kuí-nā niá seng hō͘ oa̍h lâng thò, I ê kiáⁿ-sun kéng chi̍t lâng the̍h chi̍t phoè moâ kǹg pah-jī chîⁿ, siang-chhiú khui-moâ , saⁿ ta̍k niá choè-chi̍t-ē. Hit ê lâng thâu tì loe̍h, kha ta̍h í-téng, thò-hó chiū chia̍h tiⁿ ê mī-soàⁿ, sī kóng oē tn̂g hè-siū. āu-lâi loe̍h-á hē tī chhù-téng, í chhia-tó, the̍h sí lâng ê saⁿ ēng bô thuî-chhìn lâi chhìn, ì-sù sī kóng, "Chhìn chin khí sī lín kiáⁿ-sun ēng chîⁿ boé chin kàu-gia̍h." ēng bí-táu lâi sîn hit pah-jī chîⁿ kóng hó oē, "Bí-táu tân kiáⁿ-sun thang boé chhân." Hiah ê chîⁿ kat chhiú-bé chîⁿ, ì-sù sī kóng sī-toā lâng lâu ê chhiú-bé. Kā sí lâng chhēng saⁿ tio̍h chhiàng, tah-lo̍h chi̍t niá sī bó͘ lâng hō͘ lí, nā bô, lâng oē chhiúⁿ-khì.
Chhēng hó chiū ēng cha̍p-jī oáⁿ, á-sī la̍k oáⁿ, kā I sî-siⁿ, koan-chhâ-koà páiⁿ-lìn-tńg pâi mi̍h lâi hàu, ēng tī-thâu pí hō͘ sí lâng chia̍h, tī-bé sī kiáⁿ-sun teh chia̍h-ê, kóng, "Tī-thâu chhī lí lāu, tī-bé chhī kiáⁿ-sun." Kā i kóng, "Chia̍h bah chhiò hah-hah, chia̍h ke puî se-se," ì-sù sī kiáⁿ-sun hó khoán-thāi i. Koh ū hun-piat tī-sî sí, nā thâu-chá sí, kóng lâu saⁿ tǹg hō͘ kiáⁿ-sun chia̍h, téng-po͘ sí, kóng lâu nn̄g tǹg, ē-po͘ sí, kóng lâu chi̍t tǹg. Nā àm-sî sí kóng saⁿ tǹg lóng chia̍h liáu-liáu, tio̍h kín kā I kiû chi̍t tǹg tò-tńg, thang hō͘ kiáⁿ-sun chia̍h, nā bô, oē bô thang chia̍h. Kàu hàu-pá chiū ēng thô-á-ki phah-káu, ēng pn̄g-oân hō͘ káu chia̍h, kóng nā kàu Bông-hûn hiám-khiⁿ ū káu beh lâi kā lí, tio̍h ēng thô-ki kā I phah, hiah ê pn̄g-oân hō͘ I chia̍h, chiū boē kā lí. Hoān-hù chheng-chhó, chiū siu-ji̍p koan-chhâ.
Koh chi̍t khoán ê lâng ēng pe̍h-pò͘ tuì thâu kha siang-thâu chat kàu tō͘-châi ū chi̍t luí liân-hoe, ná chhâ chi̍t-iūⁿ, kóng nā kàu Bông-hûn-khiⁿ, lâng beh lia̍h lí, kóng sī lìn chhâ-kho͘, chiū thang tô-siám-khì. Ū ēng hé-hu sù koan-toé, kóng nā chêng só͘ ū ê pháiⁿ lóng hé-hu sò-khì. Nā ū lú-chú muí lâng ēng chhit-chhioh pe̍h-pò͘ chū koan-toé, tuì kha-bé lì chi̍t tè kóng sī beh tò-khì pau chhân-khoè. iā ēng chi̍t niá ê koan-chhio̍h. Sí lâng lo̍h koan ēng chi̍t tè pe̍h-pò͘ uī lâng ê siōng khàm tī téng-bīn miâ kiò chia sin-koan kā I lì choè-pêng, kóng hó kui goán, pháiⁿ kui lí, lí hó thâu, kiáⁿ-sun hó bé. Téng-bīn khàm chi̍t niá chuí-phē[sic.], tiong-ng thiⁿ chi̍t tè âng-pò͘. Choè chi̍t ê chím-thâu, chi̍t thâu thīⁿ chi̍t chhioh pò͘ choè koe, miâ kiò koe-chím; chi̍t thâu thīⁿ káu-mn̂g, kóng "Kàu Im-kan thiaⁿ koe-thî káu puī ê siaⁿ, tio̍h kín cháu, nā bô, oē hō͘ lâng lia̍h-khì." Chi̍t niá kè-soaⁿ-khò͘, khò͘-kha ji̍p gûn-choá, chi̍t kha chiàⁿ-tńg, chi̍t kha péng tò-tńg, kóng sī chêng siⁿ-sì chioh lâi chhut-sì beh hêng I, kàu Bông-hûn-kiô hiat hō͘ i, thèng-hāu i péng bē hó-sè lí chiū cháu-khì lah.
ēng gûn-choá chhit sí lâng ê chhuì, iā ēng kim gûn that chhuì, ì-sù kóng siⁿ-chêng ū kóng pháiⁿ-oē, pháiⁿ chhuì ê sū, taⁿ Giâm-kun nā chek-pī, lí thang the-sî kóng, "Goá sī kim-chhuì, bô lām-sám kóng, koh goá chhuì kâm-kim kap gûn boē-oē kóng pháiⁿ oē." Koh oa̍h lâng nā ū chhàu-kha, siⁿ-thiàⁿ, phoà-pīⁿ, ū m̄ hó ê só͘-chāi ê lâng, ēng gûn-choá chhit hit ê m̄ hó ê só͘-chāi, chiong chit ê gûn-choá hē tī koan-chhâ-lāi, ì-sù kóng, "Pháiⁿ-ê lóng kui lí sí lâng", kiû i pó-pì in oa̍h lâng hó. ēng nn̄g sian tāi-jîn hē tī sí lâng ê chhiú, kā I kóng, "Chi̍t-ê sī chheng-khì-ko, chi̍t-ê sī léng-lī-só, beh hō͘ lí choè chhe-ēng."
iā ēng chi̍t ki chhâ-soe at choè nn̄g koe̍h, chi̍t chat soè-ê hō͘ sí lâng, toā-ê hō͘ kiáⁿ-sun, ì-sù kóng, "Lí tit chió, kiáⁿ-sun tit choē, lí tit pháiⁿ, kiáⁿ-sun tit hó." ēng chio̍h-thâu, tāu-pô͘, se̍k-nn̄g tī koan-lāi, kā I kóng, "Tio̍h chio̍h-thâu noā, tāu-pô͘ chhut-gê, nn̄g chhut-kiáⁿ, chiah thang kap bó͘-kiáⁿ pē-bú, kiáⁿ-sun, chhin-lâng saⁿ-kìⁿ, sí tio̍h kui-sim khì, sī lí kam-goān, m̄ thang lâi chhù-chêng, chhù-āu, kiaⁿ-toā kiaⁿ-soè". Tō-sū kā I siu-o͘, ēng chi̍t phoè moâ uî tī koan-chhâ-piⁿ, só͘ ū ê chhin-lâng lâi khan hit phoè moâ, tō-sū kia̍h to lâi koah kóng, koah bó͘-kiáⁿ kuì-khau, pē-bú kuì-khau, hiaⁿ-tī kuì-khau, chhin-lâng kuì-khau. Koh ēng chi̍t pé hm̂-chháu lâi chām-thâu, ì-sù sī kóng, "Chám-chháu tn̄g-kun lī-lī, bô oan-kuí thang lâi saⁿ kau-tîⁿ."
Nā sí bó͘ tiōng-hu kia̍h hō͘-soàⁿ, pē pau-ho̍k kiâⁿ tuì koan-chhâ téng kè, ì-sù sī kóng hiau-hiông saⁿ-lī beh khì kè-hoan, chiah boē chhoā I khì sí. Ū lâng hoan-hù in bó͘ kóng, "Sím-mi̍h só lí seng kiâⁿ, sím-mi̍h ko iā kiâⁿ, kiâⁿ khì bó͘ só͘-chāi chiah koh thīn chhin-chiâⁿ. Chiū khàm koan-chhâ-koà, kng chhut toā-tiâⁿ. Nā sí lāu-kong, hit sî lāu-pô kia̍h koáiⁿ-á chē tī mn̂g-piⁿ kóng, "Lāu-kong kng khì tâi, lâu-pô chiú chîⁿ-châi." Nā sí gín-á, lāu-bó kia̍h koáiⁿ phah koan-chhâ-thâu, kóng i hiau-hiông, put-hàu, chin m̄ hoaⁿ-hí ê ì-sù. Koan-chhâ kng tńg-lâi chiū ēng chi̍t táu bí, chi̍t koāⁿ chîⁿ teh tī koan-téng, kàu beh khì siu sí-lâng, chiah the̍h khí-lâi. Koh ū lâng pò͘-thang, ēng koan-chhâ toé sí-lâng hē tī chhù-lāi chin kú, kàu hó ji̍t chiah chhut soaⁿ, hō koan-chhâ ê miâ Toā-chhù.
