Chia̍h-hun Koa

1917.02  tē 383 koàn  p.9

1. Khó͘-khǹg tông-pau chèng tāi-ke,

Bo̍h-tit chia̍h hun hāi sin-thé;

ǹg-bāng seng-khu ióng kiāⁿ-kiaⁿ,

Chū-jiân chē-chē chia̍h tn̂g-miā.

2. Hun ū to̍k-sò͘ kuí-nā chéng:

Tē-it chiū-sī Nî-kó͘-teng.

Nî-kó͘-teng to̍k chin lī-hāi,

Saⁿ-tih lo̍h âu sí chiū lâi.

3. Bo̍h-tit khoàⁿ-khin to̍k sió-khoá,

Kóng-bat chia̍h hun bô àn-choáⁿ;

iáu-kú ná chia̍h tang koè tang,

Hoat to̍k khí pēⁿ káⁿ bô bāng.

4. Khǹg lín chheng-liân ê sî-tāi,

Bo̍h-tit chia̍h hun ka-kī hāi;

Lâng tuì sè-hàn nā chia̍h hun,

Hun to̍k ji̍p náu chhám kui-kûn.

5. Thâu-náu só͘ siūⁿ bô cheng-eng,

Sin-thé bô la̍t chin bô lêng;

Tha̍k-chheh ham-bān su pa̍t lâng;

Choh-sit pîn-toāⁿ siu bô kang.

6. M̄-ài chò-kang bô poàⁿ-pō͘,

Seng-lí bē chò bô thâu-lō͘;

Kàu-hoē kok-ka tuì-tiōng lín,

Nā chò án-ni chin khó-lîn.

7. Khǹg lín tāi-ke bo̍h chia̍h hun,

Hū-jîn lú-chú lóng ū hūn;

Lín sī kok-ka ê lāu-bó,

Nā ū che iūⁿ thang hoân-ló.

8. Hū-lú hó-táⁿ káⁿ chia̍h hun,

Seng-khu ià-siān sim ut-būn;

Koh-ū phoà-pīⁿ kap pè-pēng,

Ē hāi chò bó ê tek-hēng.

9. M̄-nā chò kang bô lêng-lī,

iū-koh oh siⁿ kiáⁿ-jî;

Pháiⁿ-chhiū chū-jiân pháiⁿ koé-chí,

Che sī thian-ián ê lí-khì.

10.Hun chin lī-hāi koh chin to̍k,

Ē hāi lán ke kap lán kok;

M̄-nā ū to̍k ē hāi lâng,

Koh hō͘ lán chîⁿ-tē khang-khang.

11.Ta̍k nî hun-chîⁿ sǹg bē liáu,

iáu-kú the chia̍h siūⁿ bē hiáu;

Nā chiong che chîⁿ chò hó-sū,

Kok-ka hó-gia̍h, Kàu-hoē pù.

12.Goān lín lâm-lú chèng hiaⁿ-ti,

Hoaⁿ-hí chim-chiok siū kà-sī.

Koat-toàn lī-khui che hun-to̍k,

Chiū ē tit-tio̍h chin khoài-lo̍k.

(Tēⁿ Khe-phoàn e̍k.)