首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 戇湯
戇湯
卷期：第389卷 本次： 日期：1917/8 刊名：台灣教會報 頁數：7
篇名：戇湯 [ Gōng Thng ]
作者：楊連福 Iûⁿ Liân-hok
  顯示 : 漢羅 全羅 並列  

戇湯
1917.08 389卷 p.7-11
(楊連福半譯)。
酒最害就是古早kap現今ê人所明知。現今ê人逐個會曉鴉片做害，會hō͘人傾家蕩產，會hō͘ 人ê人格趨下。看鴉片做囚仇物kap毒藥相同。殊不知酒ê做害kap鴉片不輸上下。現時人叫酒做戇湯，無 m̄ 是知人若食酒，雖然能達，iáu-kú hō͘ 酒性壓制ê時就變成愚蠢，無廉恥，粗俗，所以才號酒做憨酒。M̄-kú人teh叫伊做戇湯，反轉常常kap戇湯分bē離。若是án-ni 敢是酒teh憨，愚見扑算是人憨。因為酒若是戇湯，就食ê人的確是憨人。
今為著酒ê事，照鄙人所知kap對別位所得著ê大略寄幾句tī 下底，向望看著ê君子無棄嫌來相kap斟酌鬥想，就對án-ni 敢-chhái有thang大家相勉勵，也會榮光主，就真正是所向望kap榮幸。
人類食酒ê原因。
人àn-cháiⁿ 愛食酒？這項問題實在oh解明。自來論食酒ê冊真正濟，總--是tī 這個簡簡要緊ê問題，反轉boē bat講--著。到tī 近來論好酒ê因由，iáu-kú有無明白ê解明，實在夠額thang奇怪。查考lim酒ê酒癖，是做通世界人類所相同有。世間逐款ê民族獨獨北亞美利加州愛斯基摩ê人種，對in ê地無五穀、果子，thang做kek酒ê原料，所以bē曉食酒。這個以外就是親像古早出外飼精牲ê人，到今仔日企起城市ê人無m̄ 逐人掠酒做生命。所以酒ê發明kap應用，致到酒tī 滿世界，實在 m̄ 是人去傳播，是對世界逐部分，各人發生。án-ni酒kap人有緣份，伊ê 親到親像這款，總--是咱好酒ê原因反轉 m̄ 知。敢無thang掠做奇怪mah？
照彼得烈克用科學ê方法論好酒ê原因，伊講人除酒以外，伊所意愛--ê iáu有真濟。親像俗語講：「食色性也」，所以人因為食ê因端引起濟濟著磨ê問題。親像懸低問題，食物出產kap分配ê問題。也bat因為好色引起種種問題，m̄-kú這兩項若beh解明伊ê 原理是攏無oh得。獨獨好酒性勢力ê大，流行ê闊，實在 m̄ 是小可。愛求伊àn-cháiⁿ 愛食酒ê原因就真正oh得--著。
食酒ê種類是照所在ê習慣所好。有人好幾若款ê酒，伊所愛--ê味素芳，臭，雖然無相同，總--是所食ê酒精是像一樣。( 酒精ê害看頂月ê報)。平常人常常講酒精有奮興作用ê能力，所以人愛食。總--是照現時ê學者所稽考，酒精實在是做鎮靜劑，m̄ 是做奮興劑。就設使有時thang做奮興ê路用也是kan-ta thang影響tī 逐種ê情形；究竟bē會指做好酒ê原理。
Koh有人講酒精會thang增進人ê體力kap好膽力。雖然伊ê 路用bē會做真久ê路用；m̄-kú tī tiap仔久ê中間，實在有非常ê功效，講che thang做好酒ê原因。總--是這款若照生理學家ê研究，就伊所講--ê即時hō͘ 人扑破。因為酒精不但bē會增進人ê體力kap好膽力nā-tiāⁿ，反轉夠額hō͘ 人知識ê力減少，知bat ê才調烏暗、記憶心衰弱、理性消蝕，伊ê 害講bē了。古早有一個大出名ê醫生，名Hái-bó-ho̍k-chu，bat講：「我平生所研究ê學術，攏有贏過別人所知bat-- ê以外，總--是我若見lim一滴仔酒，就一種聰明知bat ê力隨時無了了。」
親像án-ni論到酒--字這項物雖然thang做人在生交陪朋友，報答序大ê路用，m̄-kú伊ê 陷害，真正算bē盡。因為對古早以來，對lim酒ê緣故，來致到破家盪產，陷落律法ê羅網，家事落薄ê陷害--ê,伊ê 數額m̄ 知有偌--ni̍h濟--lah！án-ni酒精ê毒實在比毒蛇，毒蠍koh較毒；iáu-kú人愛食伊較贏過家己ê性命。Che 真正hō͘ 人無路thang猜出原因--lah！
有人講酒這項物夠額hō͘ lim ê人生起一時ê快樂，發起安逸ê滿足，所以人常常借這個酒來做消散憂愁ê好朋友：人愛食酒ê原因，就是án-ni。
這款ê話，若忽然間聽--著，那準略仔倚tī 理氣；總--是若koh詳細kā伊想一下就有一種ê解說，m̄ 若hō͘ 人無滿意，反轉生起濟濟款僥疑oh解明ê問題。總--是照伊所講--ê,設使食酒是實在為著beh做解憂悶鬱卒ê路用，就咱thang講，食酒ê人攏是為著伊有艱苦憂悶無路thang 假，才chhoē這個ê酒來食，向望tī 酒中chhoē看有快活，平安ê朋友。Che算是掠食酒做求快樂ê原因。親像這款ê說也是 m̄ 著，因為對古早到現今，人tiàm世間快樂ê路有濟濟款。親像歐、美州ê人、in ê快樂對有歷史以來所boē bat有因為教育ê程度發達，男女無侵犯。翁某平懸，家內父子兄弟ê中間無聽著歹聲音，逐日交際ê言語，親像幾十年久koh相見面ê好朋友。百姓逐日所做ê工，較濟是公共事業ê工廠，時間tiāⁿ-tio̍h;待遇真好。百姓有受教育；逐日世間ê事，無論遠近逐人thang對新聞雜誌來知。
見若古早ê人，in iáu-boē bat想著快樂ê事，無 m̄ hō͘ in現時ê 人得著。In ê快樂到án-ni，查考現時in有teh想食酒抑無？朋友teh想講敢無，因為in有hiah好ê機會thang快樂。總--是koh查考實在有teh食酒。In為照現時美國一種ê酒精，逐年造出20萬萬銀。án-ni若是食酒是做快樂ê原因，in mih-sái著koh食酒--leh！
Koh進一步來講。設使食酒實在是做欠快樂ê因端，就àn-cháiⁿ 女子比男子有食酒--ê較少，因為女子伊ê 艱苦較常比男子較濟。有人講女子比男子較快活，beh thài有比男子較艱苦。殊不知女子有受男子制壓，無自由ê安樂，有時受男子ê制壓窘迫，激氣致到心神無一時ê青春，伊ê 鬱卒無安樂實在濟。àn-cháiⁿ in反轉較無食酒，也男子反轉食酒--ê較濟？
Koh咱人teh講起快樂這兩字ê基礎，實在是在tī咱ê身軀勇健，心神強壯做要緊。酒精是第一害身軀kap咱ê 心神ê物反轉去食hit號，講是beh求快樂。這款ê人tutu是親像食毒藥，beh求平安，真正是憨。
Koh有人講，酒精有麻醉性；人若食會hō͘ 神經麻醉，生育那親像對án-ni得著反動作用；所以若lim酒thang除憂悶減艱苦。人類teh愛食酒大概就是為著這款。其實這款ê說也是無合tī 情理；tutu是kaplim酒求平安ê相像。敢無想好額人kap富裕ê國家比散hiong人kap衰微ê國，伊ê 食酒甚mih人較重？
好額人快活較濟，酒食較濟。富裕ê國，伊ê 百姓較快活，伊ê 百姓反轉食酒較濟。若照án-ni ê款來相比實在是tutu相對反。
頂面所講chiah-ê ，攏無一項thang講是人愛食酒ê原因。經過彼得烈克研究了後，才漸漸得著人類好酒ê因由。照伊ê 意思簡略來講：「世界ê進步，專專是倚靠人會曉限制伊ê 心神，壓制心神hō͘ 伊會照tiāⁿ-tio̍h ê方面來行。因為人較各樣tī 禽獸，文明ê人較各樣tī 野蠻ê人是àn-cháiⁿ 增差？大概是因為伊ê 心靈ê作用，會曉壓制肉體ê作用ê緣故nā-tiāⁿ。親像文明那進步，就伊ê精神思想那深；m̄-kú思想ê精神bē會不時用；所以就計謀設歇睏ê法度。
Tī 歇睏ê中間有分兩部分。親像安眠是做精神完全ê休息，醒醒無做工是叫做小部分ê歇睏。若beh較知小部分ê歇睏，就是平常teh講消遣散步。Che是àn-cháiⁿ 講？就是人tī 消遣散步ê 時，會hō͘ 高尚思想ê作用暫時歇睏，也續hō͘ 較下等心智ê思想作用暫時盡伊ê 著磨。所以人若當伊ê 精神厭siān ê 時，就常常想愛kap朋友遊戲、行遊、作樂運動，扑球chiah-ê,就是刁工 hō͘ 精神歇睏ê明證；也是tī 歇睏中續修養心神ê起見。
咱人企起文明ê時代；kap古早野蠻ê人相離真遠，生活ê法度kap古早人也大大無相同。所以腦力ê運用也有大各樣。M̄-kú有時咱若因為厭siān腦力困苦，就較常愛學野蠻人ê款式，來hō͘ 咱ê心神歡喜。譬論親像現代做教員ê法律師、學者、抑是教士，這頂號ê人，每tu著精神困乏ê 時陣，就刁工歡喜去林野山間ê所在，扑獵，有ê 去河海泅水洗浴等等，掠chiah-ê 做歡喜。總--是這款專專是野蠻人ê款式，iáu-kú現代文明ê人用來做快樂。敢m̄ 是因為高尚ê心神，困乏到極，就用野蠻人ê代誌來做消遣休養精神ê好計智。
總--是人tī 這款運動消遣ê好法度以外，iáu有一種效驗ê藥品，人若食酒會發出效力kap消遣運動無增差，這款ê物就是酒精。因為酒精這項物會hō͘ 人ê神經麻醉，致到高等ê精神停止伊ê 作用；也hō͘ 下等ê精神挺出活動。所以人食酒實在是掠che做消遣休息神經ê好藥方。世界對野蠻到文明ê人掠酒做性命，大面是這個緣故--lah！所以人若有小可事纏身，憂愁擘腹，就愛食酒。án-ni thang知人àn-cháiⁿ 愛食酒。甚mih原因？Thang講tu著憂悶ê 時酒做好朋友，補精神ê 時，酒做好藥；chiah-ê 就是食酒ê祕訣原因--lah !
照án-ni想--起--來，酒ê路用真正是大，功效會thangkap運動消遣，走馬體操hiah-ê 做平。M̄-kú koh想食酒kap運動消遣兩項ê利益，到尾結果佗落這項較有益？
人tī 運動消遣ê方法伊ê 利益就是會hō͘ 體力那發達，思想無塞礙，無累著名譽kap資格，反轉hō͘人恭敬，這款ê利益是世界所明認。食酒無利益，反轉會連累人一生ê判斷力、辯論力、抽象、觀念、預想、公正心、期望心、廉恥、恭敬kap其他種種ê志氣，一盡消失。又koh會hō͘人下等ê神經活動；因為án-ni就發出濟濟 m̄著lām-samê話，好笑，粗俗，無見笑ê心，kap小人ê所做chiah ê 款式，踏入非法ê所行。照án-ni看醉漢好酒ê人，常常迷失高尚ê思想，漸漸變野蠻，續行in teh行ê路徑，陷害講到tī 時才會得了--leh！
照án-ni來扑算，雖然兩項攏是為著精神神經ê好法，總講 m̄ 值著趁運動ê法度，有益無損，利益現看--著，陷害穩當無？若是án-ni酒敢真正thang食？願愛求利益ê人，著chhoē實在有利益ê路，m̄-thang想beh補咱身體，調養神經續去食毒藥，敢 m̄ 是應驗戇湯ê所講mah。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461