首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 約瑟歌
約瑟歌
卷期：第161卷 本次： 日期：1898/8 刊名：台南府城教會報 頁數：58
篇名：約瑟歌 [ Iok-sek koa ]
作者：
  顯示 : 漢羅 全羅 並列  

約瑟歌
1898.08 161卷 p.58-59
(鹿港，李本做--ê。)
1.早有1人名叫約瑟，Tiàm tī 迦南行孝大德，Toà父ê家年近17，兄弟照排算第11。
2.雅各到老才生約瑟，比疼眾子溺愛到極，就kā約瑟做出suí 衫，眾兄看了歹話相加。
3.頭擺夢中kap兄hâ 稻，眾兄所hâ圍拜左右，二擺koh夢日月kap星，父兄心內聽了逆耳。
4. 一日眾兄To-tan飼羊，約瑟奉命就去山場。眾兄遙看小弟beh 到，想出計策坐teh 聽候。
5.流便為著骨肉至親，ài救小弟去見父面，曠野中間tu有礁井，就將約瑟hiat tī hit 底。
6.米甸客商埃及貿易，謀害小弟猶大計策，較好賣銀hō͘ 去埃及，即時估價值銀20。
7. 流便到井看無約瑟，衣裳拆破表明si̍t-tek，即時開嘴，囡仔無tī ，大家參詳thâi羊代誌。
8.就用suí 衫ùn tī 血內，差人提去報hō͘ 父知。到位就用白賊奸詐，阮有所得你子ê衫。
9.雅各看了深信無疑，野獸咬食碎骨分屍，即時拆衫傷悲穿麻，眾子安慰m̄ 願放寬。
10.米甸客商去到埃及，法老侍衛上帝設立。客商就賣約瑟hō͘ 伊，佳哉得著上帝保庇。
11.侍衛加恩跟隨身邊，家內全權攏交代伊。侍衛所做合上帝志，田園厝宅得著福氣。
12.約瑟少年真有膽力，用好贏歹免致誘惑，全心靠主真有智識。不幸受屈關監譴責。
13.主人無別是非曲直，就關約瑟受氣真實，佳哉監中受主保庇，安然無事監犯掌理。
14.法老人酒政、膳長，偶然犯罪監中憂傷。兩人像暝夢見兆頭，意思不解無好容貌。
15.約瑟入監問是啥事，逐家所夢無人thang 猜。約瑟聽夢心內曉理，就應攏是上帝默示。
16.酒政、膳長自夢直訴，約瑟詳細解明正誤。C酒政所夢樹有3 枝，Puh 芽發íⁿ 開花結子。
17.法老酒杯tī 我手內，果子捏汁奉去服事。解明3 枝就是3 日，召你出監復到原職。
18.著記得我得志地步，法老面前替我分訴，救我脫離牢獄重擔，無冤受屈被人關監。
19.膳長聽見所占真gâu,我置3個白匡置頭，匡底法老所食ê肉，Tú遇飛鳥hō͘ 伊所咬。
20.約瑟就別，3 匡3 日，Hō͘ 你出監調查真實。3 日法老請人設筵，攏召出監真實果然。
21.酒政復職提杯進前，膳長調查tu著重刑。Hit日約瑟兆頭所占，到tī 這時攏總應驗。
22.埃及國號稱呼法老，暝間得夢滿sìm m̄ 好，天光就召博士gâu 人，各人占夢攏無相同。
23.酒政舉薦希伯來人，約瑟1人所占穩當。即時就召約瑟出監，代先備辦剃頭換衫。
24.就入王宮法老召見，隨時講明所夢奇異，Hit-tia̍p我看埃及河邊，有牛7隻tuì 河peh 起。
25.體肥koh suí khè 草tī 田，也有7隻khiap-sì兼瘦，瘦牛吞食7隻肥suí,路尾吞了猶原那鬼。
26.二pang koh夢phàⁿ kap tēng粟，7穗tâ 瘦tang風所迫，後--來tēng粟hō͘ 伊吞食，忽然知醒心肝gông-ngia̍h。
27.約瑟聽了明白透徹，盡占年冬好歹分別，7隻肥牛好冬7 年，Tēng粟7穗相同 kí-gī。
28.瘦牛7 隻tâ sè 7 穗，7 年飢荒大意相對，che 是天頂上帝默示，代先tuì你法老通知。
(後卷beh koh接。)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461