Tâi-lâm Pīⁿ-īⁿ
1918.01 394 koàn p.12
(Tè Jîn-siū kì.)
Chêng goe̍h ji̍t ū kóng lán Tâi-lâm ī-koán ê ha̍k-seng soah kang m̄ koh chò. Goán beh thàn chit ê ki-hoē siat sin ê hoat-tō͘. I-seng-koán sǹg m̄ sī I- ha̍k-hāu. Lâng nā beh chò i-seng tio̍h keng-koè Chèng-hú ê I-ha̍k-hāu. Chóng- sī lán ū hó ki-hoē thang kà khàn-hō͘- hū. iā chit hō ê kang khah ha̍p tī hū-jîn lâng, in ê khoán-sit sī khah chû- sim, khah chim-chiok khàn-hō͘ pīⁿ- lâng. āu-lâi goán beh chiong Tâi-lâm khàn-hō͘-hū, chò khàn-hō͘ hoān-chiá, lâm lú lóng ū, chhin-chhiūⁿ Ji̍t-pún á-sī Eng-kok sio-siāng ê hoat-tō͘. N`g-bāng chó͘-ke ê Soan-kàu-su ē phài chi̍t nn̄g ê khàn-hō͘-hū lâi tàu siat chi̍t keng khàn-hō͘ ha̍k-hāu.
Hit-tia̍p beh seng kà khàn-hō͘-ha̍k, chhin-chhiūⁿ kì só͘ pī-pān hit pún chheh "Lāi goā kho khàn-hō͘-ha̍k". Chit pún sī ēng pe̍h-oē-jī lâi ìn; lāi-bīn m̄-nā kóng- khí khàn-hō͘-ha̍k, kái-phò-ha̍k, seng-lí- ha̍k, phó͘-thong ê i-ha̍k iā ū kì-teh. Tha̍k chha-put-to saⁿ nî ē chut-gia̍p. āu-lâi ke chi̍t nî beh soà kà chō͘-sán-ha̍k. Phí- jîn teh pī-pān chi̍t pún chheh chō͘-sán- ha̍k. Beh ìn pe̍h-oē-jī. iā beh ēng chin chē tô͘ piáu-bêng só͘ beh kóng ê sū. ǹg-bāng āu-lâi lán ê chí-moē ē tit-tio̍h chin chē lī-ek; m̄-tān-nā lī-ek tī ka-tī, iā lī-ek tī chhù-piⁿ, lī-ek tī kàu-hoē.
Goán chit-tia̍p ài liâm-piⁿ koh chiap- la̍p la̍k ê lâng chò khàn-hō͘-hū. ài sím-mi̍h téng-hō ê lâng ? Tio̍h ū ha̍k-būn. Nā keng-koè kong ha̍k-hāu, lú ha̍k-hāu khah hó; pe̍h-oē-jī tio̍h ē hiáu tha̍k, koh ē hiáu siá. Tio̍h í-keng ji̍p kàu-hoē, á-sī put-chí tì-ì ài thiaⁿ tō-lí. Tio̍h un-jiû bô pîn-toāⁿ, gâu thiàⁿ-thàng phoà-pīⁿ lâng. Sin-thé tio̍h ióng-kiāⁿ. Nî-hoè tuì 18 chì 25 hoè.
Nā chò khàn-hō͘-hū tio̍h o̍h saⁿ nî, tha̍k chheh, khó chheh, nā khó tio̍h beh chiong chut-gia̍p chèng-su hō͘ in.
Chò khàn-hō͘-hū m̄ thang siūⁿ ài beh thàn chîⁿ,chóng-sī beh tī chia kóng tī i-koán lāi ê sî in ê sin-kim sī cháiⁿ-iūⁿ. Taⁿ-chiah ji̍p ê sî thâu chi̍t nî chi̍t goe̍h ji̍t nn̄g kho͘-poàⁿ, chia̍h i-koán; chit ê chîⁿ beh hē in ê chhiú, chò cha̍p-sū ê lō͘-ēng. Tē jī nî chi̍t goe̍h ji̍t saⁿ kho͘, tē saⁿ nî sì kho͘, tē sì nî gō͘ kho͘. Khàn- hō͘-hū nā tiàm i-koán khah kú, i ê sin-kim hit sî-chūn beh koh phah-sǹg. Teh ji̍p ê sî iû-goân beh hō͘ in saⁿ su i-koán lāi só͘ beh chhēng ê saⁿ-khò͘, koh gō͘ la̍k niá kûn-á. Nā ū sím-mi̍h tāi-chì bô bêng-pe̍h chhiáⁿ tāi-ke lâi chhoē I-seng-niû, á-sī I-seng, in hoaⁿ-hí kóng- bêng.
Chit-tia̍p khàn-hō͘-hū iáu-boē kàu- gia̍h thang khàn-hō͘ ta-po͘ lâng keng, chóng-sī āu-lâi nā siat hó-sè hiah ê keng iû-goân beh koh khui. Ū chi̍t khoán lâm hoān-chiá ê pīⁿ hō͘ khàn-hō͘-hū lâi thè in siat-hoat khah m̄ hó-sè; beh chhiáⁿ 2 ê khah tiong-liân ê ta-po͘ lâng lâi chò chit hō kang khah ha̍p-gî. Chit-tia̍p teh chiap-la̍p hū-jîn lâng kap gín-á, ta-po͘ gín-á chún tuì cha̍p hoè í-hā chiah thang ji̍p lâi i-tī.
Khàn-hō͘-hū só͘ beh o̍h ê sū : sī phó͘- thong khàn-hō͘-ha̍k, chè io̍h, thiah io̍h, liāu-lí chhiú-su̍t-sek, siau-to̍k-hoat, tām-po̍h sè-khún-ha̍k, chō͘-sán-ha̍k, chiah ê sū.
āu-goe̍h ji̍t ê Pò beh kóng-khí khàn-hō͘ ê chit sī cháiⁿ-iūⁿ, ū sím-mi̍h lī-ek tī- teh, m̄ sī hā-chiān ê kang, sī chun-kuì ê kang, put-chí ū lō͘-ēng, thang pò-iông lán ê Kiù-chú Ki-tok ê tō-lí.
