Koa An-lo̍k ê Sió-toān
1918.04 397 koàn p.5-6
(Tân Chheng-gī kì.)
Koa Bo̍k-su sī Toā-tiū-tiâⁿ Ē-gû-bō-chhia koe ê lâng. I iáu-bē chhut-sì ê sî i ê pē-bú í-keng sī pài Siōng-tè, sio̍k Toā-tiū-tiâⁿ ê kàu-hoē. I soè-hàn ê sî ū tha̍k kàu-hoē ê Gī-sio̍k. Kàu 1894 nî ū ji̍p Tām-suí Sîn-ha̍k-hāu. 1899 nî ū chut-gia̍p, chiū siū phài choè thoân-tō-su khì tiàm kuí-nā uī ê kàu-hoē, chiū sī Pat-lí-hun, ÎN-khut-á, Koe-lâng, Kî-lí-gān, Lâm-khàm, Toā-kho-hām; Pang-kiô, Saⁿ-kak-po͘. 1914 nî ū khó choè Kàu-su, tâng-nî 4 ge̍h 14 ji̍t ū siat-li̍p choè Saⁿ-kak-po͘ Tông-hoē ê Bo̍k-su. Put-hēng ū jiám-tio̍h kuí-nā khoán ê phoà-pīⁿ, chia̍h io̍h bô èng-hāu, chiū lâi ji̍p tī Má-kai i-īⁿ tī-liâu ia̍h bô chhái-kang. Pún-nî 2 ge̍h 17 ji̍t ē-po͘ 2 tiám poàⁿ cheng kè-óng, hióng-siū 42 hè. āu-lâi ū chiong sí-thé kng tńg-khì in chhù, kàu 19 ji̍t ē-po͘ 2 tiám poàⁿ cheng ū lâi Toā-tiū-tiâⁿ lé-pài-tn̂g chòng-sek. Gô͘ Bo̍k-su choè chú-lí, Siau Bo̍k-su kî-tó, Tân Bo̍k-su tha̍k Sèng-keng, Keh Bo̍k-su kóng lâi-le̍k, Gô͘ Bo̍k-su soat-kàu kap chiok-tó, lâi sàng-chòng ê lâm-lú kiōng ū 200 goā lâng.
Sàng-chòng ê hâng ngó͘ put-chí chhù-sū. Ta̍k lâng chin iu-būn, in-uī Koa Bo̍k-su it-seng ê choè lâng, put-chí tek jîn hô, i kàu ta̍k só͘-chāi thoân tō-lí ū chīn pún-hūn, m̄-nā kàu-hoē lāi ê lâng khim-kèng i, chiū kàu-hoē goā ê lâng iā o-ló i, só͘-í it-tàn thiaⁿ-kìⁿ i kè-óng ta̍k lâng chin siong-sim. I choè Chú ê kang thâu-bé 20 nî, choè thoân-tō-su 15 nî, choè Bo̍k-su oá 4 nî. Taⁿ i ê kang í-keng bêng-pe̍k, tit-tio̍h Chú ê kéng-tiàu, tńg-khì chó͘-ke. Si-ni̍h ū kóng:
"Ū thó͘-toē i ê kng iâⁿ ji̍t-tàu.
Nā chhim-sìn chiū oē khoàⁿ kàu chin bêng.
Lán ê Pē tiàm tī-hia teh thèng-hāu.
Ū pī-pān ke̍k an-lo̍k ê pâng-keng."
Koa An-lo̍k Bo̍k-su í-keng khì kàu an-lo̍k ê pâng-keng. Lán ia̍h tio̍h ǹg-bāng āu-ji̍t ê an-lo̍k, oē saⁿ-kìⁿ tī êng-kng ê thian-kok, chiū-sī thang koh-chài kap Koa An-lo̍k Bo̍k-su saⁿ-kìⁿ, lâi tiàm tī an-lo̍k ê pâng-keng.
Hiān-sî Koa Bo̍k-su niû kap i ê kiáⁿ-jî iáu tiàm tī Saⁿ-kak-po͘ lé-pài-tn̂g, chhiáⁿ tāi-ke thoè i kî-tó, hō͘ i ê sim oē tit-tio̍h siū an-uì. I ê tiōng-hu An-lo̍k í-keng tit-tio̍h an-lo̍k ê pâng-keng, só͘-í m̄ biān kè-thâu iu-būn, tio̍h ǹg-bāng pa̍t ji̍t oē kàu an-lo̍k ê pâng-keng, lâi kap i ê tiōng-hu An-lo̍k saⁿ-kìⁿ, hióng-siū kú-tn̂g an-lo̍k ê hok-khì.
