Sió-toān
Tiō Chiok-siông.
1918.06 399 koàn p.3-4
(Phêⁿ Sū-chông kì-ê)
Tiō Chiok-siông Sian-siⁿ sī Tâi-lâm chhī ê lâng. I chhut-sì tī Chú-āu 1847 nî. Chū sè-hàn ū tha̍k chheh, i ê sī-toā lâng sī chò seng-lí. Sian-siⁿ hiaⁿ-tī nn̄g lâng, tī 20 hoè ê sî lāu-bú koè-sin. Tuì hit-tia̍p liáu-āu sim khah ài hòng-sù, sì-kè iû-siúⁿ. Tī 22 hoè ê sî chiah tit-tio̍h tō-lí, sī tuì i ê chhù-piⁿ ū chi̍t ê pài Siōng-tè ê lâng, miâ kiò Kim sèng hiaⁿ chio i khì lé-pài. Hit-tia̍p pài-tn̂g tī Têng-á-kha ke, tú-tú tī in ê tiàm-āu. Hit-sî Sian-siⁿ hoaⁿ-hí kap i siông-siông khì lé-pài, Chú ū khui i ê sim, tō-lí chiām-chiām bêng-pe̍k; chóng-sī i ê hiaⁿ bô ài i khì, siông-siông ki-chhì phí-po̍k i, iā oàn-hīn Kim-seng-hiaⁿ, kóng nā bô i chio i chiū bô khì ji̍p kàu. Sian-siⁿ lóng bô lia̍h-chò iàu-kín, kam-goān thun-lún siū-jio̍k. Kàu 25 hoè chiū niá sé-lí ji̍p kàu, 26 hoè lāu-pē sí. Hit-tia̍p í-keng ū chò chi̍t ê chhin-chiâⁿ, chiū soà kā sūn-hà chhoā lâi sàng-chòng. Hiān-chāi Sian-siⁿ-niû iáu tī-teh.
Sian-siⁿ 27 hoè tī Hú-siâⁿ ū tng chip-sū, 28 hoè ū siū Kong-hoē phài kap Pà-hiaⁿ chhut-mn̂g sì-kè bē Sèng-chheh, āu-lâi in-uī kàu-hoē khiàm-kang, chiū phài i toà Ka-gī chò Thoân-tō Sian-siⁿ, chiū saⁿ-soà toà A-kâu, Kî-āu, Hōng-soaⁿ, Kong-á-nâ, Sió Liû-kiû, Tek-á-kha, Tang-káng, Phêⁿ-ô͘, Tiàm-á-kháu, Giâm-chêng, Koan-á-niá, Thô͘-khò͘. iā bat tàu kà Toā-o̍h. Ji̍t-pún léng Tâi hit-sî i tī Koan-á-niá.
Hit-chūn Moâ-tāu ê sè-sio̍k lâng gō͘-kái kóng lán ji̍p-kàu ê lâng khì thong-hoan. Só͘-í hit só͘-chāi sìn Chú ê lâng hō͘ in thâi-sí 19 lâng. Sian-siⁿ chi̍t ê toā hāu-siⁿ 22 hoè iā sí tī hit tiong-kan. Sian-siⁿ kap Sian-siⁿ-niû tú-tio̍h chit hō toā hoân-ló ê sū, bē bián-tit ū chin toā khó͘-sim, chóng-sī lóng bô siūⁿ beh pò-oan. I kam-goān chiong chit chân tāi-chì kau-hù Siōng-chú chú-ì. I iû-goân tiám tī kàu-hoē chò Chú ê kang. Kàu 50 hoè chiah tuì Thoân-tō-kio̍k pín thêng. Sui-jiân hioh-kang, iáu-kú ū ki-hoē iû-goân pò͘-tō, kap lâng tâm-lūn tō-lí. Ū-sî Lé-pài-ji̍t iā hoaⁿ-hí chú-lí lé-pài. Kàu kin-nî í-keng 71 hoè, lâng sui-jiân lāu, iáu-kú ē sì-kè kiâⁿ, iā iáu ē tam-po̍h tàu siat-hoat ke-lāi sió-khoá sū.
Put-hēng tī chit ê sin-le̍k 5 goe̍h chhe 3 mî, tī Tâi-lâm Tang-mn̂g lé-pài-tn̂g, i ê tē 4 kiáⁿ Thian-chû só͘ toà ê siok-sià, hō͘ Chú tiàu i tò-khì ti lán Pē ê chhù. Kàu tē 10 hō ē-po͘ chhut-chòng. Pa Bo̍k-su chú-lí lé-pài, ū lio̍h-á kóng-khí i ê lí-le̍k lâi saⁿ khoàn-bián; iā ū kuí-nā uī sian-siⁿ khí-lâi, sū-khí i ê hêng-chek hō͘ lâng siàu-liām. Chiông-tiong N̂g Sū-bēng Sian-siⁿ iā khí-lâi kan-chèng kóng i ê lāu-pē, N̂g Chì-sêng(Bo̍k-su), thâu chi̍t pái thiaⁿ tō-lí siū kám-kek, sī in-uī thiaⁿ-kíⁿ Tiō Chiok-siông Sian-siⁿ só͘ kóng-ê. án-ni i ê kang-tiâⁿ put-chí ū kong-hāu.
Hit-ji̍t lâi sàng-chòng lóng-kiōng ū 300 liân lâng. Taⁿ goá siá chit kuí kù, sī siàu-liām sian-siⁿ ê hó bô͘-iūⁿ.
1.Sian-siⁿ tuì 22 hoè siū tō-lí kàu 71 hoè, kè-kiōng 50 nî kú, i lóng bô làng chām lâi pàng-sak tō-lí, bô lī-khui Chú, ti̍t-ti̍t toè Chú kàu tiàu i ê ji̍t. Kin-ná-ji̍t Sian-siⁿ bô khoàⁿ āu-bīn, ti̍t-ti̍t hiòng-chiân pháu-cháu, cháu kàu chhah-pio hit-ni̍h. Taⁿ tit-tio̍h Siōng-tè in-uī Ki-tok Iâ-so͘ téng-bīn tiàu ê siúⁿ-sù.
2. Sian-siⁿ m̄-nā pún-sin hoaⁿ-hí siū Chú ê tō-lí nā-tiāⁿ, iā gâu ín-chhoā i ê chhin-lâng, kap i ê choân-ke toā-sè, hāu-siⁿ, cha-bó͘-kiáⁿ, sim-pū, sun-á, kin-ná-ji̍t lóng sio̍k tī Sèng-hoē, chò kàu-hoē lāi ê lâng. Lán kin-ná-ji̍t lâng-lâng nā lóng ē chhin-chhiūⁿ i án-ni, chiū bián kiaⁿ kàu-hoē bô ki-té, iā bián kiaⁿ kàu-hoē bē heng-ōng?
(1) sian-siⁿ sui-jiân bô taⁿ thoân-tō ê chek-jīn, i iáu-kú m̄-káⁿ lia̍h thoân-tō-lí ê kang chò kap i bô kan-siap, só͘-í siông-siông iā ài pang-chān thoân-tō ê kang. Ū-sî iā bat saⁿ-kap chhut-mn̂g pò͘-tō, sui-jiân nî-lāu, iā iáu ū chīn-tiong ióng-kám ê sim. ǹg-bāng lán ta̍k-ke ē o̍h i chit-téng-hō ê só͘-kiâⁿ. iā goān Siōng-tè si-in tī i ka-cho̍k tiong ê lâng, hō͘ in koh ē toè in sī-toā-lâng ê kha-pō͘ lâi kiâⁿ, toè Chú tuì khí-thâu kàu lō͘-boé, che sī sim só͘ goān.
