天牢板
1918.07 400卷 p.6
(偕睿廉記。)
熱天已經近lah。空氣日日那燒lō。Koh無久就大熱。熱若到大家就艱苦。雖然穿熱衫出力ia̍t扇，抑是吃冰水也是boē秋瀙。日頭一下炎厝內liam-piⁿ熱phóng-phóng。厝頂曝一下燒，燒氣tuì頂面hah--落來，無久汗就chhap-chhap滴，扇koh較ia̍t都boē秋瀙。
厝內曝到熱滾滾，囝仔大細大家也是艱苦。Hip熱了病也liam-piⁿ到。有ê生痱子，有ê生粒仔，有ê發起熱症，熱到，症頭也到。
今m̄知有甚物好法度thang hō͘厝內較涼。較秋瀙無？有，有一個好法度。厝內著釘天羅板。厝若無天羅板，厝頂曝燒，燒氣liam-piⁿ hah--落來。厝內若有天羅板燒氣就hah boē落來。燒氣家己會tuì煙樓出去。án-ni 厝內較無燒氣。厝若創天羅板至少會加秋瀙5度。án-ni m̄是小可。Koh一項。天羅板m̄-nā會hō͘厝內較涼，有天羅板厝內也會較清氣，較boē eng-ia。Koh再加好看真濟。
咱台灣ê厝第一欠是2項。1：天羅板；2：大ê窗仔。因為厝無天羅板，窗仔無到額大，所以熱天ê時厝會hiah-ni̍h翕。窗仔若創較大，厝內較有空氣，自然就較秋瀙。Koh再會較光。
因為有chiah ê利益ê所在，今望大家若做會到，今年熱天kā伊試看。厝內緊釘天羅板。用板釘日本款m̄免偌濟錢。也窗仔拆較大leh。熱天若到就m̄免koh翕熱來抵著病。設使各拜堂ê宿舍若創，也會真大利益tī傳道士ê身體。 |
