約瑟歌
1898.09 162卷 p.72
(接前卷第59面。)
29.法老聽了心受感激，盡在o-ló gâu 兼智識；隨時賜權hō͘ 伊治理，就將宰相來敕封伊。
30.Hit 時續立歸群總督，設法照顧治理本國；好冬7 年用二抽1，歹冬到期就免喪失。
31.法老遍行埃及4方，7年好收積聚粟倉；轉眼算--來續接歹冬，四界欠食米糧空空。
32.雅各真知埃及有粟，就叫眾子求糴即刻；逐家到位跪拜約瑟，眾兄m̄-bat 約瑟明白。
33.約瑟追記早前所夢，目屎流落實在苦痛；故意試兄反悔前非，刁難西緬暫留勿歸。
34.著chhoā 小弟便雅憫來，憑據所講才有實在；大家參詳希伯來音，講起歸罪就是現今。
35.求糴了後回歸迦南，將che 事情kap父相談；若趁所命koh去就thang，雅各聽了心肝振動。
36.經過無久米糧食空，Kap子議論求糴kiám thang；猶大致意chhoā 便雅憫，發糴hit 人就會相信。
37.眾子求父雅憫保舉，就辦禮物向前直去；無久隨到埃及國都，兄弟相見久久欣慕。
38.約瑟看見小弟ê面，就命管家設筵請--in；約瑟用禮款待加倍，大家就驚相kap認罪。
39.約瑟安頓眾兄好勢，為著小弟情重流淚；Hit日兄弟共享筵席，實在福氣koh做伙食。
40.極早就命眾兄回家，偷囥銀杯便雅憫袋；離城無遠使者追jip，講in酒杯啥事收入。
41.誰人囥物罪應著歸，隨時趕緊粟袋tháu開；就chhoē 到便雅憫袋內，銀杯果囥，逐家悲哀。 |
