品行ê遺傳
1919.08 413卷 p.12
Tī 主後1730年，有對荷蘭移居tī 紐約ê 大食酒佮poa̍h-kiáu--ê ，叫做Má-kek-su ê 子孫，到今仔日190年久，傳九代人。總是對伊ê 子孫所出ê 甚物款？就是做乞食佮浮浪者來死ê 300人，做thâi 人犯受死刑--ê 7人，做強盜、詐欺、偷提 來受刑罰--ê 63人，因為lim 酒來致到生子破相佮夭壽死ê 種類--ê 400人。入慈善病院--ê 310個人，做娼妓ê 50人，普通生活--ê 20人，總是hit 中間也有10人對去監獄穿紅衫仔所學習ê 工藝來得著糊口ê --啦！
Koh 有一個人，就是主後1703年對英國搬去toà tī紐約ê 約拿丹，家庭極善良，誠實ê 基督徒，信仰極深；無食酒，出力作穡； koh 有好教育ê 好名聲人。
對伊ê 子孫所出ê --甚物款？今仔日就是第8代人，對伊ê 子孫來做大學總長--ê 13人，大學教授--ê 103人，大學佮師範學校創立者10人，醫生60人，牧師100人，做兵ê 75人，文學者80人，副大統領一人，全權ê 大使一人，做上下議院議員--ê 20人，對耶魯大學卒業--ê 120人，創設新聞雜誌佮主筆--ê 有18人，子孫ê 興旺發達，真正thang講是光前裕後--啦！
照án-ni看，父公ê 好歹關係tī 子孫是真大！雖然bat好人chhàu抵khám出著歹子孫，iáu-kú照理氣，「好果子是好樹所結」，照事實也「好人是對家庭出」（出20：6）（H. S. K.） |
