Siú-chîⁿ-lô͘
1920.06 423 koàn p.5-6
(Lîm Chheng-kiat e̍k).
Bat khoàⁿ sin-bûn teh kóng tī goā-kok ū chi̍t ê Siú-chîⁿ-lô͘ , i ū chek-chū put-chí choē chîⁿ khǹg tī chhù-lāi ,iā i sim-koaⁿ siông-siông teh chù-i hiah ê chîⁿ in-uī kiaⁿ liáu oē sit-lo̍h , Só͘-í siông siông chiong mn̂g koaiⁿ--teh , chiū the̍h chhut i só͘ chek-chū ê chîⁿ lâi sǹg chi̍t piàn khoàⁿ--leh , sǹg liáu chiū koh pau--khí-lâi khǹg . Chit ê Siú-chîⁿ-lô͘ í-keng chin lāu lah , bô bó͘ iā bô kiáⁿ , in-uī i kiaⁿ-liáu chhoā bó͘ siⁿ kiáⁿ oē khai liáu i ê chîⁿ , i chí-ū chhī chi̍t chiah eng-ko chiáu tī chhù-lāi kap i choè phoāⁿ nā-tiāⁿ . Siú-chîⁿ-lô͘ nā teh chia̍h pn̄g ê sî , hit chiah eng-ko iā kap i tiàm toh-téng chia̍h , i nā teh sǹg chîⁿ ê sî , hit chiah eng-ko iā tī i ê sin-piⁿ thiàu-lâi thiau-khi teh khoàⁿ ; só͘-i tû-khì hit chiah eng-ko í-goā bô pa̍t lâng chai i ê chîⁿ-gûn khng8 tī tó-uī .
Ū chi̍t pái i teh sǹg chîⁿ , sǹg liáu hut-jiân kiám put-chí choē , i ê sim chin kî-koài chin hoân-ló . Keh kuí-nā ji̍t koh sǹg khoàⁿ iū sī koh-khah kiám , só͘-í hit-tia̍p i ê sim chin hoân-ló kàu boē chia̍h boē khùn-tit , to̍k-to̍k m̄ chai i ê chîⁿ tuì tó-uī sit-lo̍h . Ū chi̍t chá-khí i chá-chá khí-lâi khui mn̂g hut-jiân khoàⁿ-kìⁿ mn̂g-kháu sng se̍h ê téng-bīn ū gín-ná ê kha-jiah , i chiū siūⁿ che sī cha-mî ū chi̍t ê gín-ná lâi thau-the̍h i ê chîⁿ . Só͘-í kín mé tuì hit ê kha-jiah ti̍t-ti̍t thêng ti̍t-ti̍t chhē , Khì chhē kàu chi̍t tui kū chhâ-liāu thia̍p chin toā-tui ê só͘-chāi . Tī hia ū chi̍t ê khang i chiū àⁿ--lo̍h-khì khoàⁿ lāi-toé kó-jiân ū chi̍t ê chiâⁿ cha̍p-hè ê cha-bó͘ gín-nā tī-hia koâⁿ kàu gîm-gîm chun ,i chiū kín kā khiú chhut-lâi iā pún-sin ng8--jip2-khì chhē khoàⁿ i só͘ sit-lo̍h ê chîⁿ ū tī-hia á-bô?Chóng-sī chhē lóng bô , āu-lâi chhut-lâi khoàⁿ-kìⁿ hit ê cha-bó͘ gín-á chin koâⁿ chin iau chin khó-lîn ê khoán , i chiū siⁿ-chhut lîn-bín ê sim kā i chhoā tò--khì in chhù pī-pān mi̍h hō͘ i chiah2 . Chia̍h pá chiū mn̄g I kóng, ;í ū pē-bú á-bô? Cha-bó͘ gín-ná ìn kóng , pē-bú hiaⁿ-tī lóng bô chí-ū goá ka-kī chi̍t ê nā-tiāⁿ , goá sī kàu-ke̍k kan-khó͘ bô i-oá ê gín-ná .Siú-chîⁿ-lô͘ chiū kóng ,Nā-sī án-ni lí kap goá tiàm chia hó mah？Cha-bó͘ gín-ná ìn kóng hó . Cha-bó͘ gín-nā put-chí koai só͘-i Siú-chîⁿ-lô͘ chin thiàⁿ i ,choè saⁿ hō͘ i chhēng , iā sàng i ji̍p ha̍k-hāu tha̍k-chheh . Chit ê cha-bó͘ gín-nā ê miâ kiò choè Bí-jîn .
I ū chi̍t ji̍t teh peh chhiū thit-thô ê sî chhē-tio̍h chi̍t ê chiáu-siū lāi-bīn ū chin choē kim poa̍t-á tī--teh i chiū khì pò Siú-chîⁿ-lô͘ chai . Siú-chîⁿ-lô͘ khì khoàⁿ chiū jīn-tit sī i chêng só͘ sit-lo̍h ê chîⁿ ,chiū sī teh sǹg ê sî hō͘ hit chiah eng-ko thau-kā khì , taⁿ koh tit-tio̍h chin hoaⁿ-hí ; Só͘ í koh khah thiàⁿ Bí-jîn , khoán-thāi i choè ka-kī ê cha-bó͘-kiáⁿ . Bí-jîn chin gâu tha̍k chheh iā ū hō͘ tâng-phoāⁿ chio khì tha̍k Chú-ji̍t-o̍h . Bí-jîn thiaⁿ tō-lí put-chí siū kám-kek , i chiū koat-ì sìn Iâ-so͘ . Siú-chîⁿ-lô͘ iā bô chó͘-tòng i . Bí-jîn 16 hè ê sî Siú-chîⁿ-lô͘ chiū sí--khì . I só͘ chek-chū ê chîⁿ-gûn lóng hō͘ Bí-jîn tit--khì . Bí-jîn ū siūⁿ i só͘ tit-tioh2 ê chîⁿ-gûn bêng-bêng sī Siōng-tè siúⁿ--ê , só͘-í chiū li̍p chì beh chiong i pun-sin kap só͘ tit-tio̍h-elâi choè kàu-hoē ê lī-ek . āu-lâi chiū chiong i ê chîⁿ kià-hù chin choē tī lé-pài-tn̂g ,i koán ,ha̍k-hāu , iā i pún-sin koh ji̍p Sîn-ha̍k-īⁿ tha̍k-chheh chut-gia̍p , choè ko͘-niû sì-koè pò-iông tō-lí put-chí ū lī-ek kàu-hoē . Sio̍k-gú kóng , Lâng teh choè thiⁿ teh chhiâu .Lán khí-thâu khoàⁿ-kìⁿ Siú-chîⁿ-lô͘ teh siú chîⁿ la̍k lâng ài hiâm i , chóng-sī kiat-bé lâi khoàⁿ iû-goân si Siōng-tè ê ì-sù .Chim-giân ū kóng , Lâng ê só͘ choè kàu-bé lóng kui Siōng-tè tī-lí.