奇怪ê新聞
1920.09 426卷 p.7-8
(林清潔記。)
Tī 舊年我看見一篇ê 新聞teh 講tī 支那某所在有一個新換來ê 警察長，伊換來無幾日就有出兩款ê 命令hō͘人不止gông-ngia̍h;一款就是命令查某囡仔著縛腳。諸君聽了不止奇怪，因為現時逐位攏是teh 勉勵婦人人著liû腳，怎樣hit個警察長反對--咧？真好笑，其實伊m̄ 是命令一般ê 婦人人著縛腳，所命令ê 就是hiah-ê 做娼妓--ê 攏著縛腳，ehN-koài，án-ni有甚物解說？有--啦，有3項真通。頭一項是beh hō͘人家ê 婦人佮娼妓有分別， koh 一項是beh hō͘做娼妓ê 人家己見笑，因為有縛腳ê 記認，是親像掛牌一樣。
對án-ni向望做娼妓ê 人會較少，路尾這項 koh 較通，就是beh hō͘ hiah-ê m̄ 願liû 腳ê 人hō͘伊bē koh 延chhiân 得，因為伊若iáu-kú teh 縛腳就不論甚物人會使得就近伊親像娼妓。照án-ni來kā 伊看，he實在是天然足會積極ê 好方法--啦。
第2項ê 命令就是吩咐人著剃目眉，ai-ò!ai-ò!án-ni beh thái 會行--tit；頭鬃剃了to teh bē 慣勢--啦，今連目眉也叫人著剃？朋友啊，請你免煩惱，其實伊m̄ 是吩咐一般ê 人民著剃，就是kan-ta命令做和尚ê 人著剃目眉nā-tiān;ho͘N3 ，he有甚物意思啊？
請你指教--咧。豈敢，我卻也無甚物真知，總是大概猶原有3項ê 意思。
1.是beh hō͘和尚佮平常有記認thang 分別，較早中國人攏有頭鬃，若無頭鬃ê 就是和尚，今逐人攏已經平平攏無頭鬃；所以才命令和尚著剃目眉，án-ni才有分別。
2.是beh hō͘ hiah-ê 做和尚ê 人thang 家己詳細想看，若是立志終身beh 做和尚，就著剃眉，若無就各人著倒去in 厝做事業，án-ni也是向望做和尚ê 人會較少。
3.是beh hō͘和尚較 m̄ 敢偷做歹事，因為伊若hō͘人掠著就是憑據通知伊是和尚，後來照伊教法kā 伊辦罪。照án-ni看都也是一項不止有趣味ê 法令。
今請列位ê 紳士淑女看lín beh 揀佗一項ê 職業去做就是--啦。 |
