Sió-toān
Gô͘ Khoan-jū
1921.01 430 koàn p.7
(Siau An-ki kì)
Gô͘ khoan-jū Thoân-tō, tī kin-nî sin-le̍k 11 ge̍h 14 hō ū kè-sin, 15 hō ū chhut-chòng. Ū se-kok bo̍k-su, ko͘-niû, sian-siⁿ, kap pún-toē bo̍k-su, thoân-tō-su, í-ki̍p hoē-iú kuí-nā pah lâng kā i sàng-chòng. Hióng-siū 78 hè.
Pak-pō͘ siat kàu ê sî, ū gō͘ ê lâng tē-it tāi-seng lâi niá soé-lé, i sī hit tiong-kan ê chi̍t-ê. Kî-û hit 4 lâng lóng í-keng saⁿ-soà kè-sin liáu. Chí-ū Gô͘ Thoân-tō chia̍h kàu kin-nî. Thang kóng i put-chí ū hok-khì. Tī kàu-hoē tiong iā thang kóng i sī tē-it chá ji̍p kàu ê lâng. I bē thiaⁿ tō-lí í-chêng, sī teh choè iû-chhat ê keng-kí, chin chhut-miâ, ū put-chí choē lâng chhiáⁿ i sì-koè khì choè kang. I iā ū lâi Hō͘-bé iû-chhat. Só͘-í tī Chú-āu 1872 nî 10 ge̍h ū thiaⁿ-tio̍h Chú ê tō-lí. I suî-sî hoán-hoé lâi sìn Chú, keng-kè chi̍t nî sī 1873 nî 3 goe̍h 9 hō, chiū niá-siū soé-lé.
Tuì án-ni choè Kai Bo̍k-su ê ha̍k-seng, āu-lâi choè Thoân-tō. Ū tiàm choē-choē uī ê pài-tn̂g thoân tō-lí, chin chhut-la̍t, put-chí gâu chio-ho͘ lâng lâi thiaⁿ. I só͘ tiàm ê pài-tn̂g chiū-sī: Pat-lí-hun, Toā-lōng-pōng, Saⁿ-têng-po͘, Koe-lâng, Sin-tek, Gî-lân-koe, sàu-khut, Sin-siā, Lūn-tá-téng, Toā-tiū-tiâⁿ, Sin-chng, Thô͘-hn̂g, Gō͘-kó͘-khiⁿ, Loán-loán, Sū-lîm, Tām-suí, Hê-siūⁿ-chiu, Gû-po͘-chng, chiah ê só͘-chāi. Taⁿ i í-keng kè sí-hô, tek-khak ji̍p Thiⁿ-siâⁿ ê mn̂g, teh hióng-siū tn̂g oa̍h ê hok-khì. Si̍t-chāi iu-būn thang pìⁿ choè hoaⁿ-hí.
