Jîn-tō Chú-gī
1924.04 469 koàn p.7
(Tân Thiam-ōng)
Jîn-tō chú-gī chiū sī Phok-ài, Chū-iû, Pêng-téng. Chit saⁿ ê toā būn-toê sī tuì Ki-tok-kàu siⁿ-chhut. Ki-tok kàng-sè thoè lâng siū sí sio̍k-choē, thiàⁿ tuì-te̍k, thoè hāi i ê lâng kî-tó kiû Thiⁿ-pē sià in ê choē; kà-sī lâng, tuì-te̍k tio̍h thiàⁿ i, loé-mē lín-ê tio̍h chiok-hok i, khún-tio̍k lín-ê thoè i kî-tó, án-ni oē tit lín Thiⁿ- pē ê pò-siúⁿ. Che sī Phok-ài.
Chū-iû. Sī bô siū ap-chè, pé-pa̍k, kiaⁿ-hiâⁿ, hoān-sū ū chū-chú ê koân-hān. Chú ū kóng, "Chin-lí tháu-pàng lín, bián siū Mô͘-kuí pé-pa̍k, bô choè chē-koà ê lô͘-châi." Pó-lô kóng, "Tio̍h ēng chū-iû thàn Sèng Sîn, m̄-thang thàn su-io̍k, che sī chin-chiàⁿ ê tháu-pàng."
Pêng-téng. Ki-tok chì-chun kàng-kē choè lâng, ka-kī khoán-thāi choè lô͘-po̍k, kā ha̍k-seng soé kha, sī lâu I ê bô͘-hoān hō͘ lâng o̍h khiam-sùn. I kóng: "Goá bô khoán-thāi lín choè lô͘-po̍k, in-uī lô͘- po̍k m̄-chai chú-lâng ê só͘ kiâⁿ; sī ēng lín choè pêng-iú, choè Thiⁿ-pē ê kiáⁿ." Che sī sìn-tô͘ tē-it hó ê toē-uī, iáu bô thang pí lah. Ū tō-lí ê kok chiū ēng chí saⁿ hāng choè iàu-kín. Bí-kok kiàn- li̍p sī Jîn-tō chú-gī, bô ài chhim-chiàm pa̍t-lâng ê toē, ài pó-hō͘ lâng . Chá in ê kok-lāi ū lô͘-lē; āu-lâi Lîm Khéng Chóng-thóng hiat-chiàn lâi tháu-pàng in. Chêng-nî Hoâ-hú hoē-gī, ū lâng soan-giân Bí sī ài chiàm Tiong-hoa ê toē. āu- lâi Khap-tēng (Harding) Chóng-thóng tuì gī-hoē soat-bêng, nā ū chiàm toē, chiū bô Jîn-tō chú-gī. āu-lâi bô lâng koh lām-sám soan-giân.
Eng, Bí, kàu īⁿ-pang thoân chin-tō, chiū-sī uī-tio̍h thiàⁿ Chú, thiàⁿ lâng ê bo̍k-tek; hoán-tńg ū lâng siⁿ-khí huí- pòng ê oē, kóng in ài boé jîn-sim, chiàm thó͘-toē; kiat-kio̍k chiū bô-iáⁿ. Tiong- kok, Tâi-oân ê kū-koàn bô thian-tō, só͘- í Jîn-tō chú-gī ū sit-lo̍h, tuì-tiōng Lī-kí chú-gī, Kim-chîⁿ chú-gī ê su-sióng chin chāi chhim. Tē-it bô jîn-tō sī chhoā soè-î ê , boé lâng choè lô͘-châi, cha-bó͘- kán, hō͘ in chiong-sin boē chiâⁿ lâng, Che sī ū hāi jîn-tō, iā bia̍t-bô thian-tō.
Chèng-hú niá Tâi í-lâi, ū ēng chin-choē hong-hoat ài chia̍t-chí chiah ê pháiⁿ hong-sio̍k; m̄-kú iā sī boē lī, lâng chin gâu nǹg hoat-lu̍t-phāng.
Chèng-hú chiat-chè soè-î, lâng chiū- chō tông-ku-jîn, siⁿ-kiáⁿ ēng jiōng-tō͘ ji̍p-hō͘. iā ū hit hō kam-goān choè hā- chiān ê chhiap. Chiat-chè boé cha-bó͘- kán, chiū ēng ióng-lú ê bêng-gī, si̍t- chāi iû-goân sī teh choè cha-bó͘-kán. Chiat-chè ióng-lú-ê, sī uī-tio̍h chhiong- ki ê lâng, pun chin-choē lâi thàn-chia̍h, m̄-kú iáu ū chi̍t sut-á lō͘ thàng ji̍p. Ū chún lâng, pun chi̍t nn̄g-ê lâi thoân hō͘- sû, chóng-sī lâng sūn chit ê ki-hoē, iū chin-choē teh choè bô jîn-tō ê sū. Nā bô kiáⁿ, si̍t-chāi pun lâi ióng-sêng choè hō͘-sū, che sī chin ha̍p jîn-tō, in-uī lán sī ka-cho̍k chú-gī, tāi-ke ài ū soà-chiap hō͘-sè-tāi ê su-sióng. M̄-kú ū lâng hāu- siⁿ cha-bó͘-kiáⁿ chin toā tīn, iáu boé sàn- hiong-lâng ê cha-bó͘-kiáⁿ lâi choè chhe- ēng, che bêng-bêng ū cha-bó͘-kán ê chèng-kù.
Chá ū cha-bó͘-kiáⁿ chhut-kè, ū kah lāu-pô, cha-bó͘-kán; taⁿ chiū pun ióng- lú suî khì choè chhe-ēng. Che kám m̄- sī bô jîn-tō Chú-gī mah ? án-ni lâi khoàⁿ lâng ê liông-sim sī sún-jîn lī-kí khah choē, gâu thé-thiap kan-khó͘ lâng-ê sī chió. Choè chit hō sī bô kong-tek-sim, pé-pa̍k lâng, chhut-chāi in khó͘-to̍k boē tô-siám-tit. Nā ū khiàm-ēng lâi ēng chhiàⁿ, si̍t-chāi sī khah hó miâ-siaⁿ, chiah oē siⁿ-khí chū-iû pêng-téng ê thiàⁿ-sim.
Lūn chit chân ióng-lú choè cha-bó͘- kán ēng, lán tâng sìn Chú ê hiāⁿ-tī chí-bē put-chí tio̍h sió-sim tî-hông. Nā bô, ná chún ti̍t-ti̍t teh liû-hêng ê khoàⁿ, in-uī hoē-goā ê lâng teh phoe-phêng lán, só͘-í tio̍h sió-sim. Lán sìn Chú lâm-hū ló-iù, hù-kuì pîn-chiān sī Pèng-téng chú-gī, m̄-thang án-ni bô jîn-tō, oē hō͘ hoē-goā ê lâng chhē khang-phāng; iā kiaⁿ-liáu Sian-ti chiù-chó͘ ê oē ū èng- giām. I-sài-a, Iâ-li-bí, put-sî chek-pī Iû-thài ê peh-sìⁿ bô thiàⁿ sòng-hiong- lâng , só͘-í in ū choē lah ! Ná-tan tuì Tāi-pi̍t kóng, "Ū hó-gia̍p lâng, gû-iûⁿ chin-choē; lâng-kheh lâi m̄-kam thâi; sòng-hiong lâng chí-ū chi̍t chiah iûⁿ-á- bú, chiū kā i khan-lâi thâi, i ê choē tio̍h cháiⁿ-iūⁿ pān ? " Tāi-pi̍t ìn kóng, "Tio̍h thâi, thang tû pháiⁿ hong-sio̍k tī peh-sìⁿ ê tiong-kan," Siaⁿ-ti kóng, "Choè chit hō sū chiū-sī lí." Hit-sî Tāi-pi̍t chiah jīn-choē, chai sī ū toā sit- lo̍h i ê liông-sim, siū chiù-chó͘. Chiàu thian-lí lâi lūn, tio̍h ū Jîn-tō chú-gī chiah ha̍p-lí. Nā khoàⁿ Se-kok ū Jîn-tō chú-gī lóng khah hoat-ta̍t.
án-ni put-lūn kok-ka, chong-kàu, siā-hoē, ka-têng, kò-jîn, tio̍h ū Jîn-tō chú-gī, hō͘ chiah ê put-hoat ê hong-sio̍k oē tû-khì, chiah ū si̍t-hêng Ki-tok só͘ kiàn Phok-ài, Chū-iû, Pêng-téng ê bo̍k- tek. Nā uî-hoān sī ko͘-hū Chú ê toā-un chin chhim.
