首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 賢哲康德
賢哲康德
卷期：第469卷 本次： 日期：1924/4 刊名：台南府城教會報 頁數：9
篇名：賢哲康德 [ Hiân-tiat Khong-tek ]
作者：
  顯示 : 漢羅 全羅 並列  

賢哲康德
1924.04 469卷 p.9-11
(一神學生)
主後1724年4月22日，空前ê大哲學家康德( Immanuel Kant ) 出世tī 德國東南部一個城叫做凱尼斯堡 (Konigsberg) 。「哲學者」就是「愛知識ê人」，就是愛用深遠ê腦力愛beh看透人生ê究竟，宇宙ê根源--ê。抑是換話來講，就是teh講究家己--ê叫做「哲學者」。
伊ê 老父是散hiong ê勞動者，m̄ 是食飽閒閒teh刻人骨，抽人血ê資本家。老母是敬虔ê女徒，常常用自然界以及聖經，來chhoā伊ê 子到造物主ê面前。16歲入本城ê大學。起頭有講究神學，後--來較致意tī 數學，物理，續進入哲學。一世人無娶某，用哲理做伊所疼ê婦人人。大學畢業，就做幾若位ê家庭教師。
31歲得著博士ê學位，續做大學ê講師，46歲就昇做正教授，也bat做總長；hō͘ 濟濟人欽仰，總--是對敵也濟。
列位著知主後1848年iáu-boē到，言論自由ê喉叫iáu-boē聽--見。咱所疼--ê哲學者，受國王用khiâm口令壓制，m̄ 准伊宣傳宗教上ê問題。Tī 大學--ni̍h m̄ 准人講究伊ê 宗教哲學。這款ê陷害，康德歡喜忍耐；對重人ê人格，降伏國王ê意思；無計較。過無偌久，新王坐位，就koh得著自由。總--是無偌久身體漸漸衰弱。Tī 1804年2月12日，伊就安然睏--去。「今好--lah」；這句是伊ê 尾句話。死了，人就入石碑tī 本城ê 禮拜堂來紀念這個博學，忠厚；虔誠，嚴謹ê偉人。列位兄姊，人ê歲壽 m̄ 是用年歲會thang做高尺--得；是用伊ê 事業ê大細來做準繩，你知--mah ? 這tia̍p咱有thang kā伊做200年ê生日，祝賀伊iáu-kú老康健，勢力遍滿tī 愛知識ê人ê中間。
若讀伊ê 傳記就知伊ê 性情真好，做人忠厚，信實，佮朋友好交陪。也真對重時間；睏、食、教學、散步，m̄ bat無照時間。E晡時食飽teh出來行遊，較準會社ê水螺；夠額hō͘ 人提時錶起來對。若有較緊較慢，是時錶無對，m̄ 是康德無照時。Che m̄ 是teh講笑，康德果然是這款ê 人物。10點定著睏，早起5點定著起床，做事誌不止次序，有統一。這款夠額hō͘ 咱台灣ê會友，tī 拜六暝10點iáu tī 先生ê宿舍，抑是禮拜早起十點iáu-boē到拜堂，hit號ê反省。康德也是勤儉ê人；伊無買濟濟冊來做妝飾；內面簡潔肅靜。有一頂帽仔用20冬，到伊過身，人相爭買--去做紀念。M̄ toè時勢ê流行，m̄ 甘願屈服奢華ê流水，果然是製造時勢ê大英雄。
有著真濟冊，其中三本堪得稱做哲學界ê經典。就是《純粹理性批判》(1781)；《實踐理性批判》( 1788)；《判斷力批判》(1790)。有翻譯荷文，第3本今才teh印。伊ê 冊中哲理深沈，設齊備ê法度教示人；明白真ê智識是甚物，伊ê 範圍到佗位？扑破僥疑佮獨斷ê思想，調和當時惟理論派佮經驗論派。伊講零零粹粹--ê bē thang叫做智識，著ài有結連，統一。又koh是著對父母生成，對出世就已經有--ê,叫做真ê智識。總--是koh進一步，智識ê材料是對經驗，就是對你ê感覺機關所入--ê,kā伊拾做伙來合你ê 悟性中所有hit 12個模，也好禮仔kā伊統一組織起--來，伊就乖乖tiàm咱內面做咱真ê智識。若屬這款ê智識真妥當，好用，逐所在都相像，無分古早，現今，東爿抑是西爿；做你安心，永無變換。
總--是這個康德真gâu變空；講仔講，到路尾續kā你畫一條痕。就是分一個現象界，koh分一個本体界。伊講：「若屬tī 現象界ê事，做你照頂面hit號法度落去講究，定著到尾會hō͘ 你bat--去，bē僥疑，也bē hō͘ 人講是獨斷--ê。
總--是若屬本体界ê事理攏 m̄ thang去磕--著。若愛講究是討頭殼疼nā-tiāⁿ，結局bē thang bat。人都無講究靈魂、自由、上帝，hit號ê權利。雖然人著有神論真大本teh證明有一個上帝，其實是teh證明伊家己。若 m̄ 是上帝本身，thài會thang知bat上帝？除非著tiàm tī 上帝，佮伊相親像，正會thang bat--伊。
康德tī 頭一本冊有講，用智識bē會thang bat本体界ê事。智識是現象界ê財產。Tī 第2本冊，就是「實踐理性批判」，伊就將靈魂，自由佮上帝kā伊假定落去。這3項對智識是chhoē 無，iáu-kú tī 信仰ê界限內 m̄ thang無。所以康德就去想一個至大ê上帝出--來，kā號一個名叫做「物聚身」。這個「物聚身」有大威嚴；統理宇宙萬象，人生萬事。伊所傳出ê命令是絕對無條件。報賞，刑罰攏tī 伊ê 手頭。
總--是著愛靈魂不滅正有理氣；又koh beh刑罰人，是因為有hō͘ 人自由，所有ê 責成攏歸tī 眾自由ê人類。上帝是至善，眾人有順趁ê義務tī--teh。也著因為義務來盡義務。M̄-thang扑算行好是為著驚上帝刑罰，抑是為著愛得幸福、快樂；著無條件--ê,是無上ê命令。
以外iáu有濟濟thang講，也是佮咱較有關係--ê。親像靈魂不滅、罪惡、自由、拯救、上帝國，等等。可惜報紙有限，是向望lín家己講究。會曉看荷文ê人著買《講座》4月號去讀，就會幫贊你較明。
Boē斷筆ê第先ài翻譯紀念康德hit塊石碑所刻幾句話做這篇文ê結論。
碑ê文是用平生所常用ê話來刻tī hit--ni̍h--ê,講：「愈kā 伊想，想愈久，就愈有新ê感嘆佮尊敬來充滿tī 心--ni̍h ê有兩項：就是咱ê頂面燦爛ê星所照ê天，以及tī 咱心內ê道德律。」
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461