Pi-chhám ê Sió-toān
1924.08 473 koàn p.16
(Siāu-hong)
Liāu oa̍t sī Sai-lê kàu-hoē ê hoē-iú. Káu hoè chiū bô lāu-pē; lāu-bó kam-goān chiú-koáⁿ lâi khan-kiáⁿ. Kàu toā-hàn ê sî, ū khì Tâi-lâm kap Kam Bo̍k-su, Pa Bo̍k-su, Liâm Bo̍k-su toà. Phín-hēng toan-chong, jia̍t-sim sìn Chú, Tī An-hioh-ji̍t siông-siông àm-chīⁿ khì Tâi-lâm kīn-hū ê chi-hoē chò chú-lí, chhoā hiaⁿ-tī lé-pài. Tī Tāi-chèng 8 nî sî thâu-lō͘, tńg-lâi Sai-lê chò seng-lí. Sèng-chêng oa̍h-tāng, tī siā-hoē tiong ū sìn-iōng; ti kàu-hoē tiong tam-tng Chú-ji̍t-o̍h ê kàu-oân, ta̍uh-ta̍uh chhut-mn̂g pò͘-tō, tō-lí láu-liān, só͘ kóng hō͘ lâng ài thiaⁿ. Sui-jiân kīn-lâi seng-lí sit-pāi, ka-sū khùn-lân, iáu-kú chò kàu-hoē ê kang bô khah thè-pō͘. Bô phah-sǹg tī 6 goe̍h 26 hō khì pha-hî, soà hō͘ chuí kek--sí. Tng tī guî-hiám ê sî, goá siû oá khì kiù; khó-lîn tī saⁿ-tiâu-chuí sio-kap ê só͘-chāi, chuí chhim koh kip-lâu, goá soà hō͘ i giú-tio̍h ām-kún, kap i saⁿ-kap tîm. Kai-chài Thiⁿ Pē lâu goá ê sìⁿ-miā, goá koh phû chhut chuí-bīn, chóng-si i hō͘ chi̍t-niá chhiú-bāng só͘ liân-luī, chiū bē thang koh phû. Thèng-hāu lâng kàu, kau khí-lâi ê sî, í-keng koè-khuì. Saⁿ-cha̍p la̍k nî koè chi̍t-sì-lâng.
Chhám-ah! pàng i siú-chiat pe̍h thâu-mn̂g ê lāu-bó, 68 hoè; kap bó͘ kap saⁿ-ê sè-sè-hàn ê kiáⁿ, thî-thî khàu-khàu. Hit ê-hng sin-si kàu-uī ê sî, tiàm lāi-goā lâng-soaⁿ lâng-hái; ū ê an-uì i ê lāu-bó, ū-ê phō i ê thâu-khak thî-khàu; lâng lâng kóng, Bô chhái! Thêng tiap-á-kú kàu-hoē goā ū chin-chē lâng the̍h chîⁿ lâi beh chò i ê song-huì;in-uī chai i ê ka-kè khùn-lân, sí-lo̍h lóng khang-khang; koh hoē-lāi iā chin tông-chêng iû-goân saⁿ-kap chhut-chîⁿ, só͘-í tī 27 hō ē-po͘ pī-pān hó-sè kā i an-chòng.
Chit-tia̍p i ê ke-āu chiām-sî an-tùn, hoē-lāi hoē-goā ê lâng ū teh kā i tàu phah-sǹg tio̍h àn-choáⁿ î-chhî.
Tha̍k-tio̍h chit chām Sió-toān ê hiaⁿ-ché ah! ǹg-bāng lín uī-tio̍h chit-ke lâi tông-chêng, tī kî-tó-tiong saⁿ siàu-liām。Goān Thiⁿ Pē khui-lō͘ an-uì.
